Kapitulo 37
Inep-ep ni Jesus ti Panagladingit ti Balo
DI NAGBAYAG kalpasan ti panangagasna ti adipen ti panguluen dagiti buyot, nagturong ni Jesus idiay Nain, maysa a siudad a nasurok a 32 kilometros iti abagatan a laud ti Capernaum. Dagiti ad-adalanna ken maysa a dakkel a bunggoy ti kimmuyog kenkuana. Nalabit agsipngeten idi umadanida iti masungadan ti Nain. Ditoy nasabatda ti maysa a pamompon. Ti bangkay ti maysa nga agtutubo a lalaki imbaklayda nga inruar iti siudad tapno maitabon.
Ti kasasaad ti ina ket nakalkaldaang unay, agsipud ta isut’ maysa a balo ket daytoy ti kakaisuna nga anakna. Idi natay ni lakayna, naliwliwa iti kinapudno nga isut’ addaan iti maysa nga anak a lalaki. Dagiti namnamana, tartarigagayna, ken ambisionna naigamerda amin iti masanguanan ti anakna. Ngem itan awanen ti uray maysa a pakasarakanna ti liwliwa. Kasta unay ti leddaangna bayat nga isut’ kinuyog dagiti umili nga agturong iti pakaitabonan.
Idi nakita ni Jesus ti baket, natignay ti pusona iti napalalo a kinaladingitna. Gapuna, buyogen iti kinamanangngaasi, ken kaskasdi nga addaan kinatibker a nangiparikna iti panagtalek, kunana iti baket: “Dika agsangit.” Ti kababalinna ken ti panagtignayna inawisna ti atension dagiti umariwekwek. Gapuna idi umasideg ket sagidenna ti nakaikabilan ti bangkay nga aw-awitenda, nagsardeng dagiti manangibaklay. Mabalin nga amin pampanunotenda no aniat’ aramidenna.
Pudno a dagidiay kimmuyog ken ni Jesus nakitada isuna a nangpaimbag a simimilagro iti adu a tattao kadagiti saksakitda. Ngem kaawatan a saanda pay pulos a nakitkita a nangpagungar iti asinoman manipud ken patay. Maaramidanna aya ti kasta a banag? Nagsao iti bagí, imbilin ni Jesus: “Baro, kunak kenka, Bumangonka!” Ket bimmangon daydi lalaki! Isut’ kinasaritana, ket inted ni Jesus ken inana.
Idi nakita dagiti tattao a ti baro ket pudpudno a sibibiag, kunada: “Ti maysa a dakkel a mammadto timmaud kadatayo.” Dadduma kunada: “Ti Dios sinarungkaranna dagiti tattaona.” Dagdagus a daytoy a damag maipapan iti nakaskasdaaw nga aramid ket nagrakurak iti intero a Judea ken iti pay met amin a daga a kabangibang.
Ni Juan a Mammautisar kaskasdi nga adda pay la idiay pagbaludan, ket kayatna a maammuan ti ad-adu pay maipapan kadagiti naaramidan ni Jesus. Dagiti adalan ni Juan ibagada kenkuana ti maipapan kadagitoy a milagro. Aniat’ riknana? Lucas 7:11-18.
▪ Aniat’ mapaspasamak idi umadani ni Jesus idiay Nain?
▪ Kasano a naapektaran ni Jesus iti inna nakita, ket ania ti aramidenna?
▪ Kasanot’ panagtignay dagiti tattao iti datdatlag nga inaramid ni Jesus?