NAIN

Maysa a siudad ti Galilea a nangpagungaran ni Jesu-Kristo iti kakaisuna nga anak ti maysa a balo. (Lu 7:11-17) Maikunkuna a ti Nain ket isu ti purok ti Nein (Naʽim) iti makin-amianan a laud a deppaar ti Jebel Dahi (Givʽat Ha-More; ti turod ti More), agarup 10 km (6 mi) iti abagatan nga abagatan-a-daya ti Nazaret. Ti kadaanan a disso nga ayanna ket masarakan iti pangkaaduan a lugar a dinakamat da Jerome ken Eusebius. Ti Nein a tumannawag iti Tanap ti Jezrael (Esdraelon) ket adda iti maysa a makaatrakar a nainkasigudan nga aglawlaw. Kasta met, ti maysa nga ubbog sadiay ti pagtataudan ti danum dagiti nasayaat a minuyongan dagiti kayo nga olibo ken higos. Ita nakabasbassit daytoy a purok, ngem ipakita dagiti rebrebba iti dayta a disso a dakdakkel dayta kadagidi immun-una a siglo.​—LADAWAN, Tomo 2, p. 738.

Idi 31 K.P., bayat ti umuna a panagdaliasatna a panangaskasaba idiay Galilea, simrek ni Kristo Jesus iti Nain iti panaggapuna iti Capernaum. (Lu 7:1-11) Ti nagbaetan dagitoy dua a lugar ket agarup 35 km (22 mi). Adda nadakamat a “ruangan” a mabalin a maysa laeng a pagserkan iti nagbaetan ti balbalay a dayta ti pagdalanan a sumrek iti Nain, yantangay awan pammaneknek a ti siudad ket napalikmutan iti pader. Mabalin nga iti makindaya a pagserkan ti Nain ti nakasabtan ni Jesus ken dagiti adalanna iti pamumpon, a nalabit agturong kadagiti tanem iti sikigan ti turod nga adda iti abagatan a daya ti agdama a Nein. Gapu ta simnek ti asina iti balo nga awanan itan iti anak, immasideg ni Jesus iti andas ket pinagungarna ti anak ti balo. Ti damag maipapan iti daytoy a milagro ket nagrakurak iti intero a rehion ken nakagteng pay idiay Judea. Mabalin a daytoy met laeng a pasamak ti tuktukoyen ti sasao a “dagiti natay maibangbangonda,” a karaman iti insungbat ni Jesus kadagiti mensahero nga idi agangay ket imbaon ti naibalud a ni Juan a Manangbautisar.​—Lu 7:11-22.