Kapitulo 71
Napinget a Di Panamati Dagiti Fariseo
DAGITI nagannak ti agpalpalimos a bulsek idi ket maam-amakda idi naayabanda iti sanguanan dagiti Fariseo. Ammoda a naikeddengen a ti siasinoman a mangiyebkas iti pammati ken Jesus ket maikkat manipud iti sinagoga. Ti kasta a pannakapugsat ti pannakilangen kadagiti dadduma iti komunidad mabalin a makaipaay iti kasta unay a rigat, nangnangruna iti maysa a napanglaw a pamilia. Gapuna dagiti nagannak naannadda.
“Isu daytoy ti anakyo daydi kunayon a naiyanak a bulsek?” inyimtuod dagiti Fariseo. “Kasano, ngarud, a makakita ita?”
“Ammomi a daytoy ti anakmi ken naiyanak a bulsek,” pinatalgedan dagiti nagannak. “Ngem dikam ammo no kasano ti pannakakitana ita, ken no asino ti nanglukat kadagiti matana.” Sigurado nga imbagan ti anakda kadakuada ti amin a napasamak, ngem siaannad a kinuna dagiti nagannak: “Isu ti pagimtuodanyo. Nataenganen. Isu agsaonto iti maipapan kenkuana.”
Ngarud, inayaban manen dagiti Fariseo ti lalaki. Iti daytoy a tiempo padpadasenda ti mangbutbuteng kenkuana babaen ti panangipamatmatda a nakaurnongda iti pammabasol a maibusor ken Jesus. “Ikkam ti pammadayaw ti Dios,” imbilinda. “Ammomi a daytoy a tao ket managbasol.”
Ti bulsek idi a lalaki dina libaken ti pammabasolda, a kunkunana: “No managbasol diak ammo.” Ngem kunana pay: “Maysa a banag ti ammok, isu nga idinto a bulsekak idi, ita makakitaak.”
Babaen ti panangpadasda a mangsapul iti biddut iti pammaneknekna, dagiti Fariseo nagimtuodda manen: “Ania ti inaramidna aya kenka? Kasano ti pananglukatna kadagiti matam?”
“Imbagakon kadakayo,” inreklamo ti lalaki, “ket dikay impangag. Apay-apay kayatyo manen a denggen?” Buyogen iti pananglais, inimtuodna: “Kayatyo met aya ti agbalin nga adalanna?”
Daytoy a sungbat ti namagpungtot kadagiti Fariseo. “Sika ti adalan dayta a tao,” impabasolda, “ngem dakami adalannakami ni Moises. Ammomi a ti Dios nakisao ken Moises; ngem daytoy a tao, dikam ammo no adino ti naggapuanna.”
Babaen ti pannakasdaawna, simmungbat ti napakumbaba nga agpalpalimos: “Adtoy ti nakaskasdaaw a banag, a dikay ammo no adino ti naggapuanna, ket idinto a linukatanna pay dagiti matak.” Ania a konklusion ti maadawtayo manipud itoy? Intudo ti agpalpalimos ti maawaten a kapanunotan: “Ammotayo a ti Dios dina ipangag dagiti managbasol, ngem no adda managdayaw iti Dios ket aramidenna ti pagayatanna, isu ti denggenna. Nanipud idi panangrugi ti lubong awan pay nangngegan a nanglukat kadagiti mata ti maysa a tao a nayanak a bulsek.” Gapuna, nalawag ti konklusion: “No daytoy a tao saan koma a naggapu iti Dios, awan koma ti mabalinna nga inaramid.”
Dagiti Fariseo awan ti maisungbatda iti kasta a direkta, nalawag a lohika. Saanda a mabalinan a sanguen ti kinapudno, gapuna padaksenda ti lalaki: “Naigamer ti basol ti pannakabukelmo, ket isuronakami?” Gapu itoy, pinaruarda ti lalaki, a nalawag ti panangikkatda kenkuana iti sinagoga.
Idi naammuan ni Jesus ti inaramidda, sinapulna ti lalaki ket kunana: “Mamatika iti Anak ti tao?”
Kas sungbat, daydiay dati a bulsek nga agpalpalimos nagimtuod: “Ket asino apo, tapno mamatiak kenkuana?”
“Isu met laeng ti makisasao kenka,” simmungbat ni Jesus.
Dagus, nagruknoy ti lalaki iti sanguanan ni Jesus ket kunana: “Mamatiak kenkuana, Apo.”
Inlawlawag ngarud ni Jesus: “Siak immayak ditoy lubong a maipaay iti pannakaukom: tapno dagiti saan a makakita makakitada ket dagiti makakita agbalinda a bulsek.”
Iti dayta, dagiti Fariseo a dumdumngeg nagimtuodda: “Bulsekkami met aya?” No aminenda a bulsek ti panagpampanunotda, adda koma ti pagpambarda iti panangbusorda ken Jesus. Kas imbaga ni Jesus kadakuada: “No bulsekkay koma, awan koma ti basolyo.” Kaskasdi, sipipinget nga ipapilitda a saanda a bulsek ket saanda a kasapulan ti pannakalawlawag iti naespirituan. Gapuna kuna ni Jesus: “Ngem ita kunayo, ‘Makakitakami.’ Iti kasta ti basolyo mataginayon.” Juan 9:19-41.
▪ Apay a mabuteng dagiti nagannak ti bulsek idi a lalaki nga agpalpalimos idi naayabanda iti sanguanan dagiti Fariseo, ket kasano a siaannad a simmungbatda?
▪ Kasano a padpadasen dagiti Fariseo a butbutngen ti bulsek idi a lalaki?
▪ Ania a lohikal nga argumento ti namagpungtot kadagiti Fariseo?
▪ Apay a dagiti Fariseo awan ti pagpambarda iti panangbusorda ken ni Jesus?