Maysa a Nakaskasdaaw a Masanguanan
Iti mabiiten ni Satanas ken dagiti demoniona mapapataydanton
Ni Satanas ken dagiti demoniona didanton allilawen ti sangatauan iti napapaut pay. Ni Jehova pinagtalawna idan manipud langit. (Apocalipsis 12:9) Iti asidegen a masanguanan, agtignayto manen ti Dios maibusor ken Satanas ken dagiti demoniona. Iti maysa a sirmata manipud iti Dios, kinuna ni apostol Juan: “Ket nakitak ti maysa nga anghel a bumaba nanipud langit nga adda kenkuana daydi tulbek ti mangliwengliweng nga abut ken ti maysa a dakkel a kawar iti imana. Ket tiniliwna daydi dragon, daydi uleg a kadaanan, nga isu ti Diablo ken Satanas, ket pinarautanna iti bayat ti sangaribo a tawen. Ket isu inggarangugongna iti abut a mangliwengliweng ket inrikepanna ken sinelioanna ti rabawna, tapno dina allilawenen dagiti nasion agingga iti maturpos dagiti sangaribo a tawen.” (Apocalipsis 20:1-3) Iti maud-udi, ti Diablo ken dagiti demoniona madadaeldanton iti agnanayon.—Apocalipsis 20:10.
Dagiti dakes a tattao ditoy daga madadaeldanto met.—Salmo 37:9, 10; Lucas 13:5.
Agbiagto Manen dagiti Natay!
Dagiti natay agsublidanto iti biag ditoy daga
Kalpasan a mapukaw ni Satanas ken dagiti demoniona, iyegton ni Jehova ti adu a bendision iti sangatauan. Malagipyo a dagiti natay awan biagda, naawanda. Inyasping ni Jesus ti ipapatay iti pannaturog—maysa a nargaan a turog nga awanan tagtagainep. (Juan 11:11-14) Imbagana dayta agsipud ta ammona nga umayton ti oras a dagidiay matmaturog ken patay mariingdanto iti biag. Kinunana: “Ti oras umay inton amin dagidiay adda kadagiti tanem a pakalaglagipan . . . rummuarda.”—Juan 5:28, 29; idiligyo ti Aramid 24:15.
Maiyegdanto iti biag ditoy daga. Imbes a dagiti anunsio a natay dagiti tattao, dagiti makaparagsak a damag ti mangibaganto kadagidiay naisublin iti biag! Anian a rag-o nga abrasaen dagiti inay-ayat a nagsubli manipud iti tanem!