Leksion 10
Dagiti Aramid a Kagura ti Dios
Kasano komat’ panagriknayo kadagiti banag a kuna ti Dios a dakes? (1)
Ania dagiti di umiso a kita ti seksual a kababalin? (2)
Kasano koma’t panangmatmat ti maysa a Kristiano iti panagulbod? (3) panagsugal? (3) panagtakaw? (3) kinaranggas? (4) espiritismo? (5) panagbartek? (6)
Kasano a makalapsut ti maysa a tao kadagiti dakes nga aramid? (7)
1. Ayaten dagiti adipen ti Dios ti naimbag. Ngem masapul a sursuruenda met a guraen ti dakes. (Salmo 97:10) Kayat a sawen dayta a liklikanda dagiti aramid a kagura ti Dios. Ania ti sumagmamano kadagitoy nga aramid?
2. Pannakiabig: Nadadagsen a basol iti Dios ti panagdenna sakbay ti kasar, pannakikamalala, bestialidad, insesto, ken homoseksualidad. (Levitico 18:6; Roma 1:26, 27; 1 Corinto 6:9, 10) No agkabkabbalay ti dua a tao a di nagkasar, masapul nga agsinada wenno saan, agkasarda a legal.—Hebreo 13:4.
3. Panagulbod, Panagsugal, Panagtakaw: Saan a makapagulbod ni Jehova a Dios. (Tito 1:2) Masapul a liklikan dagiti tao nga agtarigagay iti anamongna ti agulbod. (Proverbio 6:16-19; Colosas 3:9, 10) Napakuyogan iti kinaagum ti amin a kita ti sugal. Isu a saan a makiraman dagiti Kristiano iti aniaman a kita ti sugal, kas iti loteria, karera ti kabayo, ken bingo. (Efeso 5:3-5) Ken saan nga agtakaw dagiti Kristiano. Saanda a gagaraen ti gumatang iti tinakaw a sanikua wenno mangala kadagiti bambanag nga awan pammalubos.—Exodo 20:15; Efeso 4:28.
4. Panagpungpungtot, Kinaranggas: Mabalin a mangituggod iti kinaranggas ti di magawidan a pungtot. (Genesis 4:5-8) Saan a mabalin a gayyem ti Dios ti naranggas a tao. (Salmo 11:5; Proverbio 22:24, 25) Saan nga umiso ti agibales wenno supapakan iti dakes ti dakes a mabalin nga aramiden dagiti sabsabali kadatayo.—Proverbio 24:29; Roma 12:17-21.
5. Panaggamud ken Espiritismo: Adda dagiti tao nga umawag iti pannakabalin dagiti espiritu tapno padasenda nga agasan dagiti sakit. Gamuden met ti dadduma dagiti kabusorda tapno pagsakiten wenno patayenda pay ketdi. Ni Satanas ti pannakabalin nga adda iti likudan amin dagitoy nga aramid. Isu a masapul a saan a makiraman dagiti Kristiano iti aniaman kadagita. (Deuteronomio 18:9-13) Ti panagtalinaed a nadekket ken Jehova ti kasayaatan a salaknib iti pananggamud dagiti sabsabali kadatayo.—Proverbio 18:10.
6. Panagbartek: Saan a dakes ti uminum iti bassit nga arak, serbesa, wenno dadduma pay a naingel nga inumen. (Salmo 104:15; 1 Timoteo 5:23) Ngem di umiso iti imatang ti Dios ti nalabes a panaginum ken panagbartek. (1 Corinto 5:11-13; 1 Timoteo 3:8) Mabalin a dadaelen ti nalabes a panaginum ti salun-atyo ken riribukenna ti pamiliayo. Mabalin a dayta met ti makagapu a nalakakay a tumulok iti dadduma pay a sulisog.—Proverbio 23:20, 21, 29-35.
7. Dagiti tao nga agar-aramid kadagiti banag a kuna ti Dios a dakes “didanto tawiden ti pagarian ti Dios.” (Galacia 5:19-21) No pudno nga ay-ayatenyo ti Dios ken kayatyo nga ay-aywen, makalapsutkayo kadagitoy nga aramid. (1 Juan 5:3) Sursuruenyo a guraen ti kuna ti Dios a dakes. (Roma 12:9) Makitimpuyogkayo kadagiti tattao nga addaan kadagiti nadiosan a kababalin. (Proverbio 13:20) Mabalin a makatulong dagiti nataengan a Kristiano a kakadua. (Santiago 5:14) Kangrunaan iti amin, agpannuraykayo iti tulong ti Dios babaen ti kararag.—Filipos 4:6, 7, 13.
[Dagiti Ladawan iti panid 20, 21]
Kagura ti Dios ti panagbartek, panagtakaw, panagsugal, ken kinaranggas