‘Siputam No Kasano ti Panagimdengmo’
NAPATEG ti panagimdeng iti panagsursuro. Maapektaranna met ti namnama ti maysa a tao iti pannakaisalakan. Idi agsagsagana ni Jehova tapno ispalenna ti ilina idiay Egipto a nakaadipenanda, binilinna ni Moises nga ibagana kadagiti panglakayen ti Israel no ania ti rumbeng nga aramidenda tapno maispal dagiti inauna nga annakda iti anghel a mangpapatay. (Ex. 12:21-23) Inyallatiw dagiti panglakayen daytoy nga impormasion iti tunggal sangakabbalayan. Berbal nga inaramidda daytoy. Masapul nga umimdeng a naimbag dagiti umili. Ania ti inaramidda? Ipadamag ti Biblia: “Amin ti annak ti Israel inaramidda kas iti imbilin ni Jehova kada Moises ken Aaron. Inaramidda ti kasta met laeng.” (Ex. 12:28, 50, 51) Nagbanaganna, napasaran ti Israel ti nakaskasdaaw a pannakaispal.
Iti kaaldawantayo, isagsagananatayo ni Jehova iti dakdakkel pay a pannakaispal. Pudno unay a masapul a sipapasnek nga ipangagtayo ti instruksion nga ipapaayna. Maipapaay ti kasta nga instruksion kadagiti gimong ti kongregasion. Naan-anay met la kadi a magunggonaanka kadagiti kasta a panagtataripnong? Agpannuray dayta iti panagimdengmo a naimbag.
Matandaanam kadi dagiti napateg a punto a maad-adalmo iti gimong? Ugalim kadi, iti kada lawas, nga iyaplikar iti mismo a biagmo ti maipapaay nga instruksion wenno iranud dayta kadagiti sabali?
Isaganam ti Pusom
Tapno naan-anay a magunggonaantayo iti instruksion a maipapaay kadagiti Nakristianuan a gimong, masapul nga isaganatayo ti pusotayo. Naitampok ti kinapateg daytoy iti napasamak kabayatan ti panagturay ni Jehosafat nga ari ti Juda. Situtured nga intandudo ni Jehosafat ti pudno a panagdayaw. ‘Inikkatna dagiti nangato a disso ken dagiti sagrado a teddek manipud Juda’ ket binaonna dagiti prinsipe, Levita, ken papadi a mangisuro iti Linteg ni Jehova kadagiti umili iti amin a siudad ti Juda. Kaskasdi, “saan a nagpukaw dagiti mismo a nangato a disso.” (2 Cron. 17:6-9; 20:33) Nairamut ti panagdayaw iti didiosen ken ti ballikug a porma ti panagdayaw ken Jehova kadagiti nangato a disso dagiti pagano, isut’ gapuna a saan a naikkat a namimpinsan dagitoy.
Apay a di nagpaut ti epekto ti instruksion nga inyurnos ni Jehosafat? Kuna pay ti rekord: “Dagiti met laeng umili saanda pay a naisagana ti pusoda maipaay iti Dios dagiti ammada.” Saanda a nagtignay a mayannurot iti nangngegda. Nalabit rigatenda ti mapan agdaton iti templo idiay Jerusalem. Aniaman ti kasasaad, saan a natignay ti pusoda babaen ti pammati.
Tapno saantayo nga agsubli kadagiti aramid ti lubong ni Satanas, masapul nga isaganatayo ti pusotayo nga umawat iti instruksion nga ipapaay ni Jehova itatta. Kasano? Ti maysa a napateg a pamay-an ket babaen ti panagkararag. Masapul nga ikararagtayo nga awatentay a siyayaman ti nadiosan nga instruksion. (Sal. 27:4; 95:2 ) Tumulong daytoy kadatayo a mangapresiar iti panagregget dagiti kakabsattayo a, nupay imperpektoda, madadaanda a pausar ken Jehova a mangisuro iti ilina. Dayta ti mangtignay kadatayo nga agyaman ken Jehova saan laeng a gapu kadagiti baro a banag a maad-adaltayo no di ket gapu pay iti gundawaytayo a mangpauneg iti panangipategtayo kadagiti banag a datin nga ammotayo. Gapu ta tarigagayantay nga aramiden a naan-anay ti pagayatan ti Dios, ikararagtayo: “Isuronak, O Jehova, maipapan iti dalanmo. . . . Pagkaykaysaem ti pusok nga agbuteng iti naganmo.”—Sal. 86:11.
Agatensionka
Adu dagiti makasinga iti napasnek a panagimdengtayo. Mabalin nga adu ti pakadukotantayo. Mabalin a mangsinga kadatayo ti panagtatagari ken panagkutikuti dagiti timmabuno wenno dagidiay adda iti ruar ti paggigimongan. Narigat ti agatension no alusiisentayo. Masansan a mabingay ti atension dagidiay addaan kadagiti babassit nga ubbing. Ania ti tumulong kadatayo a mangipamaysa iti atensiontayo iti programa?
No sadino ti nakaiturongan dagiti matatayo, isu ti pakaipamaysaan ti atensiontayo. Tapno maipamaysam ti isipmo, iturongmo dagiti matam iti agpalpalawag. No adda dakamatenna a teksto ti Biblia—uray no kabesadom dayta—kitaem, ket surotem ti panangibasana. Dika tumaliaw iti paggapuan ti tunggal panagtatagari wenno panagkutikuti. No malapunos ti panunotmo kadagiti makasinga a bambanag gapu kadagiti makitam, adu ti pakaikapisam nga impormasion a maidatdatag iti plataporma.
No marigatanka a mangipamaysa iti isipmo iti programa gapu kadagiti ‘mangrirriribuk a pampanunot,’ ikararagmo ken Jehova a pagsimbengenna ti isip ken pusom tapno makapagatensionka. (Sal. 94:19; Fil. 4:6, 7) Ulit-ulitem dayta no kasapulan. (Mat. 7:7, 8) Dagiti gimong ti kongregasion ket sagana ni Jehova. Makapagtalekka a kayatna a magunggonaanka kadagita.—1 Juan 5:14, 15.
Panagimdeng Kadagiti Palawag
Nalabit malagipmo dagiti kaay-ayom a punto a nangngegmo kadagiti palawag. Ngem ti panagimdeng iti palawag ket saan laeng a basta panangurnong kadagiti napateg a punto. Mayarig ti palawag iti panagbiahe. Nupay adu dagiti makapainteres a mabuya iti dalan, ti kangrunaan a banag isu daydiay destinasionmo, daydiay panggepmo. Mabalin nga adda masnup a konklusion a pangiturongan ti agpalpalawag kadagiti dumdumngeg wenno gutugotenna ida nga agtignay.
Amirisem ti impalawag ni Josue iti nasion ti Israel, a nailanad iti Josue 24:1-15. Ti panggepna isu ti pananggutugot kadagiti umili nga agtakder a sititibker maipaay iti pudno a panagdayaw babaen ti naan-anay a panangidianda iti idolatria nga ar-aramiden dagiti nasion iti aglawlawda. Apay a nakapatpateg dayta? Ti panagraira ti ulbod a panagdayaw pagpeggadenna ti nasayaat a takder ti nasion iti imatang ni Jehova. Kastoy ti insungbat dagiti umili iti dawat ni Josue: “Narigat a pagarupen, iti biangmi, a panawanmi ni Jehova tapno agserbikami kadagiti sabali a didios. . . . Agserbikamto ken Jehova.” Ket dayta ti inaramidda!—Jos. 24:16, 18, 31.
Bayat nga agdengdengngegka iti palawag, tarusam no ania ti panggepna. Amirisem no kasano a dagiti punto nga iruar ti agpalpalawag ket agturong iti dayta a panggep. Utobem no ania ti ipaaramid kenka ti impormasion.
Panagimdeng No Adda Mapagsasaritaan
Iti Panagadal iti Pagwanawanan, Panagadal iti Libro ti Kongregasion, ken dadduma a paset ti Gimong ti Serbisio ket maikonkondukta iti nayimprenta a material a naibasar iti Biblia babaen ti saludsod ken sungbat.
Iti dadduma a kasasaad, ti panagimdeng no adda mapagsasaritaan ket kasla panagsasarita. Tapno naan-anay a magunggonaanka, umimdengka a naimbag. Denggem ti pagturturongan ti saritaan. Imutektekam no kasano nga ipaganetget ti konduktor ti tema ken dagiti kangrunaan a punto. Sungbatam iti panunotmo dagiti saludsodna. Imdengam ti panangilawlawag dagiti dadduma ken panangyaplikarda iti ad-adalenyo. No matmatam ti impormasion sigun iti panangmatmat dagiti dadduma, mabalin a makaalaka iti sabali a panirigan iti suheto a pamiliar kenka. Makiramanka iti panagsisinnukat ti kapanunotan babaen ti panagkomentom kas ebkas ti pammatim.—Roma 1:12.
No nasakbay nga adalem ti leksion, maipamaysam ti isipmo iti saritaan ken masurotam ti ikomento dagiti dadduma. No dimo maadal a detalyado dagiti leksion gapu iti sirkumstansiam, sakbay ti gimong ammuem ti pakabuklan ti impormasion iti uray sumagmamano la a minuto. No kasta ti aramidem, ad-adunto ti masursurom iti mapagsasaritaan.
Panagimdeng Kadagiti Asamblea ken Kombension
Mabalin nga ad-adu ti pakasingaan kadagiti asamblea ken kombension ngem kadagiti gimong ti kongregasion. Nalabit a narigrigat ti agimdeng. Ania ti makatulong kadatayo?
Napateg ti umdas nga inana iti rabii. Sakbay a mangrugi ti programa iti kada aldaw, imalditmo iti panunotmo ti tema. Taldiapam ti paulo ti tunggal palawag, ket seggaam no ania ti maidatag. Usarem a nasayaat ti Biblia. Adu dagidiay nakapadas a ti ababa a panaginotar kadagiti kangrunaan a punto ti tumulong kadakuada a mangisentro iti isipda iti programa. Isuratmo ti instruksion a kayatmo nga iyaplikar iti biagmo ken iti ministeriom. Pagsasaritaanyo ti sumagmamano a punto no agturong ken aggapukayo iti pagasambleaan kada aldaw. Tumulong daytoy tapno saanmo a malipatan ti impormasion.
Panangsanay Kadagiti Ubbing nga Agimdeng
Dagiti Kristiano a nagannak matulonganda dagiti annakda—uray dagiti maladaga—nga ‘agmasirib maipaay iti pannakaisalakan’ no ikuyogda kadagiti gimong ti kongregasion, asamblea, ken kombension. (2 Tim. 3:15) Tangay nagduduma ti kababalin ken kapaut ti panagatension dagiti ubbing, masapul ti pannakaawat tapno matulonganda nga agsursuro nga agatension. Makatulong dagitoy sumaganad a singasing.
Iti pagtaenganyo, iyeskediulyo a dagiti annakyo agtugawda a sitatalna ket basaen wenno kitaenda dagiti ladawan a masarakan kadagiti Nakristianuan a publikasiontayo. Kadagiti gimong, saanyo nga ik-ikkan dagiti ubbing kadagiti ay-ayam a pangpatalna kadakuada. Kas iti nagkauna nga Israel, tumabuno met dagiti agtutubo ita “tapno makapagimdengda ken tapno makasursuroda.” (Deut. 31:12) No praktikal, adda dagiti nagannak nga ikkanda uray dagiti ubbing pay unay nga annakda kadagiti bukodda a kopia dagiti publikasion a maadal. Bayat a dumakdakkel dagiti ubbing, tulonganyo ida nga agsagana tapno makiramanda kadagiti programa a mabalin a makipaset dagiti agdengdengngeg.
Ipakita dagiti Kasuratan nga agkanaig unay ti panagimdeng ken Jehova ken ti panagtulnog kenkuana. Nabatad daytoy iti kinuna ni Moises iti nasion ti Israel: “Inkabilko ti biag ken ti patay iti sangom, ti bendision ken ti lunod; ket masapul a piliem ti biag . . . babaen ti panagayat ken Jehova a Diosmo, babaen ti panagimdeng iti timekna ken babaen ti panagtalinaed kenkuana.” (Deut. 30:19, 20) Iti kaaldawantayo, ti panagimdeng iti pannursuro ni Jehova ken ti sitatallugod a panangtungpal iti dayta ket nasken tapno magun-odtayo ti anamong ti Dios ken ti bendision a biag nga agnanayon. Ngarud, masapul nga ipangagtayo ti pammagbaga ni Jesus: “Siputanyo no kasano ti panagimdengyo”!—Luc. 8:18.