Modulasion

NO SIMPLE ti panangigunamgunammo iti nasken a sasao, matulongam dagiti agdengdengngeg a mangtarus iti ibagbagam. Ngem no ipakatmo a nalaing ti nadumaduma a kapigsa, kapartak, ken kangato ti timek, ad-adda a makaay-ayo a denggen ti palawagmo. Maysa pay, mabalin nga ipaawatna kadagiti agdengdengngeg ti panangmatmatmo iti ibagbagam. Ti panangmatmatmo iti material impluensiaanna ti panangmatmatda iti dayta. Agaplikar daytoy uray agpalpalawagka iti plataporma wenno kasarsaritam ti maysa a tao iti tay-ak ti ministerio.

Nakaskasdaaw ti timek ti tao, ta mabalin a pagdudumaen. No umiso ti pannakausarna, biagenna ti palawag, tignayenna ti puso, abbukayenna dagiti emosion, ken gutugotenna ti maysa nga agtignay. Nupay kasta, saan a maragpat daytoy babaen laeng ti panangmarkam iti balabala tapno ammom no kaano a baliwam ti kapigsa ti timekmo, kapartakmo, wenno kangato ti timekmo. Saan a natural ti modulasion no surotem dagita a marka. Imbes a biagenna ti palawagmo, pagalusiisenna ketdi dagiti agdengdengngeg. Ti maitutop a panangusar iti modulasion ket aggubuay iti puso.

No nainsiriban ti pannakausarna, saan nga iturong ti modulasion ti nalabes nga atension iti agpalpalawag. Imbes ketdi, tulonganna dagiti agdengdengngeg a mangtiliw iti kababagas ti suheto a maisalsalaysay.

Ibagay ti Kapigsa ti Timek. Ti maysa a panangbaliw iti panagsaom isut’ panangibagaymo iti kapigsa ti timekmo. Ngem saan koma daytoy a basta panangipigsa wenno panangikapkapsut iti timek iti makauma a tonada. Dadaelenna ti kababagas ti ibagbagam. No sansanem nga ipigsa ti timekmo, saanto a makaay-ayo ti panagsaadna.

Rumbeng a mayanatup ti kapigsa ti timekmo iti material. Agbasbasaka man iti naganetget a bilin, kas iti masarakan iti Apocalipsis 14:6, 7 wenno iti Apocalipsis 18:4, wenno ebkas ti nabileg a kombiksion, kas nailanad iti Exodo 14:13, 14, maikalikagum ti mayanatup a panangipigsa iti timek. Kasta met, no adda ibasbasam iti Biblia a nainget a panangkondenar, kas ti masarakan iti Jeremias 25:27-38, ti panangbaliwbaliw iti kapigsa ti timekmo pagminarenna dagiti dadduma nga ebkas nga ad-adda ngem kadagiti sabali.

Amirisem met ti panggepmo. Kayatmo aya a gutugoten dagiti dumdumngeg nga agtignay? Kayatmo aya a pagminaren dagiti kangrunaan a punto iti palawagmo? Ti napigpigsa a timek, a naannad ti pannakaipakatna, ti tumulong a mangragpat kadagitoy a panggep. Nupay kasta, ti basta panangipigsa iti timek mabalin a dadaelenna ti panggepmo. Kasano a kasta? Mabalin a ti kalikaguman ti ibagbagam ket kinabara ken addaan rikna imbes a napigpigsa a timek. Pagsasaritaantayto daytoy iti Adalen 11.

No naannad ti pannakaipakatna, ti panangikapkapsut iti timek ket mangpasegga. Ngem masansan a kalikaguman daytoy ti napigpigsa a tono kalpasan unay dayta. Ti nakapkapsut a timek a mapakuyogan iti napaspasnek a kinaregget ket mabalin nga ipakat tapno maiparikna ti panagdanag wenno panagbuteng. Mausar pay ti nakapkapsut a timek tapno ipasimudaagna a ti maibagbaga ket segundario ti pategna no maidilig iti adda iti aglawlawna. Ngem no kanayon a nakapsut ti timekmo, mabalin nga ipasimudaagna ti panagduaduam wenno kinaawan ti kombiksionmo wenno kinaawan ti pudpudno nga interesmo iti topikom. Nabatad, masapul a naannad ti panagsao iti nakapsut a tono.

Baliwam ti Kapartakmo. Iti inaldaw a pannakitungtong, rumuar a bukodda dagiti sao bayat nga iyebkastay dagiti kapanunotantayo. No magagarantayo, naparpartak ti panagsaotayo. No kayattay a matandaanan dagiti sabsabali ti eksakto nga ibagatayo, nabambannayat ti panagsaotayo.

Ngem, manmano dagiti kabbaro a pumapalawag a baliwanda ti kapartakda. Apay? Napalalo ti annadda a mangisagana kadagiti sao nga usarenda. Mabalin a naisurat amin dagita. Uray no saan a manuskrito ti usarenda nga agpalawag, mabalin nga inkabesada dagiti sasao. Kas resultana, narukod ti kapartak ti panagpalawagda. No sursuruem ti agpalawag babaen ti panangusar iti balabala, tumulongto dayta a mangparmek iti daytoy a pagkapuyan.

No bigla a partakam ti agsao, mayarig dayta iti agpaspasiar a pusa a bigla a lumagto nga agtaray apaman a makakita iti aso. Ket dimo met partakan unay ti agsao ta maapektaran ti nalawag a panangyebkasmo.

Tapno agduduma ti kapartakmo, saan a basta pardasam ket kalpasanna iballaballaetmo nga inayaden. Ti kasta a panagpalawag dadaelenna ti material nga idatdatagmo imbes a pasayaatenna. Maibagay koma ti panagbaliw ti kapartakmo iti ibagbagam, dagiti emosion a kayatmo nga iyallatiw, ken ti panggepmo. Agpalawagka iti kalalainganna a kapartak. Tapno maipariknam ti kinagagar, iparpardasmo ti agsao, kas iti ar-aramidem iti inaldaw a pannakisaritam. Mayanatup met daytoy no ti punto nga ibagbagam ket saan unay a napateg wenno saan unay a nasken dagiti pasamak nga isalsalaysaymo. Mangnayonto daytoy iti panagduduma ken dinanto pagparangen a nakaserserioso ti palawagmo. Iti kasumbangirna, masansan a kasapulan ti nabambannayat a panagsao no ilawlawag dagiti napapateg nga argumento, kangrunaan a punto, ken dagiti tampok ti palawag.

Panagbaliwbaliw ti Kangato ti Timekmo. Iladawanmo iti panunotmo nga adda agtoktokar iti instrumento iti maysa nga oras wenno nasursurok pay. Bayat dagita nga oras, maymaysa laeng a nota ti toktokarenna​—umuna napigsa, sumaruno nakapsut, napartak no dadduma, kalpasanna nabannayat. Agbaliwbaliw ti kapigsa ken kapartakna, ngem saan nga agbaliwbaliw ti kangato ti tonadana, saan a makaay-ayo ti “musika.” Kasta met, no di agbaliwbaliw ti kangato ti timektayo, saan a makaay-ayo ti panagsaotayo kadagiti agdengdengngeg.

Laglagipem a saan nga agpapada ti epekto ti panangbalbaliw ti kangato ti timek kadagiti amin a lenguahe. Kadagiti lenguahe nga adda tonadana, kas iti Tsino, mabalin nga agbaliw ti kayulogan ti sao no agbaliw ti tonadana. Kaskasdi, uray kadagita a lenguahe, adu ti mabalin nga aramiden ti maysa a tao tapno mapagdudumana ti timekna iti panagsaona. Mabalinna a parang-ayen ti kangato ken kababa ti maabut ti bosesna bayat a pagtalinaedenna dagiti isu met laeng a tukad ti nagduduma a tonona. Iti kasta, mabalinna a pasinggiten dagiti nangatngato a tono ken mabalinna a pabangagen dagiti nababbaba a tono.

Uray kadagiti lenguahe nga awan tonadana, iyallatiw ti panagbaliwbaliw ti kangato ti boses ti nadumaduma nga ideya. Kas pagarigan, ti sangkabassit a panangpasinggit iti timek a napakuyogan iti napigsa a boses ket mausar a mangigunamgunam iti nasken a sasao. Wenno ti panagbaliw ti kangato ti timek ket mabalin nga ipasimudaagna ti kadakkel wenno kaadayo. Ti panagpangato ti ayug iti ngudo ti sentensia ipasimudaagna nga agsalsaludsodka. Kadagiti dadduma a lenguahe, agpababa ti ayugna.

Mabalin nga iyebkas ti kinagagar ken entusiasmo babaen ti nasingsinggit a boses. (Iti lenguahe nga addaan tonada, kalikagumanna a nalawlawa ti pangbennatan iti boses.) Ti ladingit ken danag mabalin a kalikagumanna ti nabangbangag a boses. (Wenno iti lenguahe nga adda tonadana, ak-akikid ti pangbennatan iti boses.) Dagiti nadakamat ditoy nga emosion ket makatulong iti pumapalawag a mangtignay iti puso. No kayatmo nga iyebkas dagita, saan a basta ibalikasmo dagiti sasao. Usarem ti bosesmo a mangipakita a mariknam met dagita.

Panangisaad iti Pundasion. Sadino, ngarud, ti pangrugian ti modulasion? Mangrugi iti panangpilim iti material nga ipalawagmo. No argumento amin a linaonna wenno bin-ig a balakad, bassit ti gundawaymo a mangbaliwbaliw iti estilo ti panagpalawagmo. Isu nga analisarem ti balabalam, ket siguraduem nga adda dagiti ramen a kasapulam tapno nabiag, napnuan impormasion ti panangiparangmo.

Kas pagarigan ta iti ngalay ti palawagmo ket mariknam a masapul ti kanayonan a panagbaliw ti timek gapu ta kasla bumambannayat ti panangiparangmo. Ania ngarud ti aramidem? Baliwam ti wagas a panangidatagmo iti material. Kasano? Ti maysa ket isu ti panangukag iti Biblia, awisem dagiti agdengdengngeg nga ukradenda ti kopiada, ket mangbasaka iti kasuratan imbes nga agsasaoka laeng. Wenno pagbalinem a saludsod dagiti dadduma a sentensia, nga agsarimadengka tapno adda maipaganetget. Mangiserrekka iti simple nga ilustrasion. Dagitoy dagiti pamay-an nga us-usaren dagiti nasanay a pumapalawag. Ngem uray adu wenno bassit ti kapadasam, mabalinmo nga usaren dagita met la nga ideya no isaganam ti materialmo.

Mabalin a kunaen a ti modulasion ket rekado ti maysa a palawag. No umiso ti rekado ken umiso ti templana, apagisu ti nanam ti materialmo ken makaay-ayo dayta kadagiti agdengdengngeg.