Kinanatural

NO NATURAL ti panangyebkasmo iti pampanunotem, agtalek kenka dagiti sabsabali. Agtalekka aya iti ibaga ti maysa a tao a nakamaskara? Adda aya pagsayaatanna no napimpintas ti maskara ngem ti mismo a rupa ti agpalpalawag? Mabalin nga awan. Isu nga imbes a manglimlimoka, agsaoka a natural.

Saanmo koma nga ipapan a ti kinanatural kaipapananna ti kinaawan-annad. Saan a mayanatup ti nakapuy a gramatika, di umiso a panagibalikas, ken di nalawag a panagsao. Dika met agusar kadagiti sao a manmano ti makaammo. Kayattayo a kanayon nga iparangarang ti mayanatup a dignidad, iti panagsasao ken aw-awidtayo. Ti maysa a natural ti panagpalawagna ket saan a nakaporpormal wenno maseknan unay iti pammadayaw dagiti sabali.

Iti Tay-ak ti Ministerio. Agnerbioska aya no mapanka iti maysa a balay wenno asitgam a kasabaan ti maysa a tao iti publiko a lugar? Kaaduan kadatayo ti kasta, ngem nakarkaro kadagiti dadduma. Ti panagdanag pairtengenna wenno pagtigergerenna ti timek, wenno madlaw ti panagnerbios babaen ti di maitutop a panaggaraw ti ima wenno ulo.

Nadumaduma ti rason a mapasaran ti maysa nga agibumbunannag daytoy a problema. Nalabit pampanunotenna no ania ti makuna dagiti tattao kenkuana wenno parikutna no agballiginto ngata ti pannakisaritana. Gagangay laeng dagitoy, ngem rumsua dagiti parikut no maseknanka unay kadagita a banag. No agnerbioska sakbay a mangasabaka, ania ti makatulong? Ti naannad a panagsagana ken nasged a panagkararag ken ni Jehova. (Ara. 4:29) Utobem ti naindaklan nga asi ni Jehova a mangawis kadagiti tattao a mangtagiragsak iti perpekto a salun-at ken agnanayon a biag idiay Paraiso. Panunotem dagidiay ikagkagumaam a tulongan ken ti kinapateg ti pannakangngegda iti naimbag a damag.

Laglagipem met nga addaan dagiti tattao iti wayawaya nga agpili, isu nga adda kadakuada no awatenda wenno saan ti mensahem. Kasta met la ti kasasaad idi nangasaba ni Jesus iti nagkauna nga Israel. Ti annongem ket mangasaba laeng. (Mat. 24:14) Uray no didaka pagsawen dagiti tattao, nakakasabakan babaen ti mismo a kaaddam. Nagballigikan agsipud ta nagpausarka ken Jehova a mangaramid iti pagayatanna. No adda gundawaymo nga agsao kadagita a kasasaad, komusta ti panagsaom? No sipapanunotka iti kasapulan dagiti tattao, makaay-ayo ken natural ti panagsaom.

No mangasabaka, saan nga alusiisen ti agim-imdeng kenka no agtignay ken agsaoka iti gagangay a wagasmo. Ad-adda pay ketdi a denggenda dagiti Nainkasuratan a kapanunotan a kayatmo nga iranud kadakuada. Imbes a palawagam ida, kasaritam ida. Nainggayyemanka koma. Ipakitam nga interesadoka kadakuada, ken denggem dagiti komentoda. Siempre, no kadawyan iti lenguahe wenno kulturada ti mangipakita iti panagraem no makisarsarita kadagiti tattao a saanmo nga am-ammo, masapul nga annurotem dagitoy. Ngem kanayon koma a sidadaanka nga umisem a di mapilpilit.

Iti Plataporma. Iti panagpalawagmo iti maysa a grupo, nasaysayaat ti natural, kasla makisarsarita nga estilo ti panagpalawag. Siempre, no dakkel ti tallaong, masapul a napuerpuersa ti timekmo. No ikabesam ti palawagmo wenno detalyado unay dagiti notam, mabalin a maseknanka unay iti umiso a pannakaisao ti bambanag. Nasken ti mayanatup a pannakaisao dagita, ngem no dayta ti kangrunaan a pakaseknam, agbalin a nairteng ken pormal ti panagpalawagmo. Mapukaw ti kinanaturalna. Masapul a nasakbay a panunotem a siaannad dagiti ideyam, ngem dagita nga ideya ti kangrunaan nga ipaayam iti atension, saan a ti eksakto a pannakaisaoda.

Kasta met laeng no mainterbiuka iti gimong. Agsaganaka a nalaing, ngem saanmo a basaen wenno ikabesa dagiti isungbatmo. Ipalawagmo dagita a buyogen ti natural a modulasion, iti kasta, natural ken makaallukoy dagiti komentom.

Mabalin nga ipapan dagiti agdengdengngeg a saan a natural uray dagiti makaay-ayo a kualidad ti panagpalawag no masobraan dagitoy. Kas pagarigan, rumbeng a nabatad ti panagsaom ken umiso ti panagibalikasmo ngem saan koma a napalalo di la ket ta agbalin a nairteng wenno saan a natural. Ti panagkompas a mangipaganetget wenno mangiladawan, no nasayaat ti panangaramidmo iti dayta, biagenna ti palawagmo, ngem dagiti panagkompas a nairteng wenno aglablabes singaenda ti ibagbagam. Umdas koma ti kapigsa ti timekmo, ngem saan koma a nakapigpigsa. No dadduma, nasayaat no pagbalinem a napuersa ti panagpalawagmo, ngem saan koma a bombastiko. Ti modulasion, entusiasmo, ken addaan rikna ket mausar koma amin, ngem iti pamay-an a saan a sika ti pakaiturongan ti atension wenno mamagalusiis kadagiti agdengdengngeg.

Adda masnup a natural a wagas dagiti dadduma a tattao a mangyebkas iti kapanunotanda, uray no saanda nga agpalpalawag. Adda met dagidiay kadawyan ti panagsasaoda. Ti nasken isu ti makaay-ayo a panagsao iti inaldaw ken natakneng koma ti konduktam kas maysa a Kristiano. Iti kasta, no addakan iti plataporma, ad-adda a sisasaganaka nga agsao ken agtignay iti makaay-ayo ken natural a wagas.

No Agbasaka iti Publiko. Masapul ti panagregget tapno natural ti panagbasam iti publiko. Tapno maaramidmo dayta, siputam dagiti kangrunaan nga ideya iti material nga ibasam, ket amirisem no kasano ti pannakabukel dagitoy. Masapul a nalawag dagitoy iti isipmo; ta no saan, agbasbasakanto laeng iti sasao. Ammuem ti pannakaibalikas dagiti sao a saanmo a kabesado. Agsanayka nga agbasa iti napigsa tapno maalam ti maitutop a kangato ken kapigsa ti bosesmo ken tapno mapagkakaduam dagiti sasao a silalawag a mangyebkas kadagiti kapanunotan. Ulit-ulitem nga aramiden dayta agingga a naannayas ti panagbasam. Adalem a naimbag ti material tapno inton ibasam iti napigsa, ti panagbasam ket kasla nabiag a pannakisarita. Kinanatural dayta.

Siempre, kaaduan nga ibasbasatayo iti publiko ket aggapu kadagiti publikasiontayo a naibatay iti Biblia. Malaksid kadagiti naituding a basaentayo iti Teokratiko nga Eskuelaan ti Panagministro, agbasatayo kadagiti kasuratan iti tay-ak ti ministerio ken no agpalawagtayo iti plataporma. Dagiti kakabsat a lallaki ti matudingan a para basa iti adalen iti Panagadal iti Pagwanawanan ken Panagadal iti Libro ti Kongregasion. Dagiti dadduma a kualipikado a kakabsat a lallaki matudinganda nga agbasa iti manuskrito kadagiti kombension. Biblia man wenno dadduma pay a publikasion ti ibasam, basaem dagiti nakotar a paset iti wagas a nabiag ti pannakaidatag ti material. No nadumaduma ti adda a nakotar, baliwam bassit ti bosesmo para iti tunggal maysa kadakuada. Tandaanam: Saan koma a nakaar-arte ti panagbasam, no di ket nabiag koma ken natural.

Ti natural a wagas ti panagbasa ket kasla makisarsarita laeng. Saan nga artipisial no di ket buyogen ti kombiksion.