Wagas a Kasla Makisarsarita

NATALGED ti rikna ti kaaduan a tattao no makisarsaritada kadagiti gagayyemda. Natural ti panagsasaoda. Naganaygay dagiti dadduma; adda met dagidiay di unay maun-uni. Nupay kasta, makaay-ayo no natural ti kasta a panagsao.

Ngem no kasaritam ti tao a dimo am-ammo, saan a maikanatad ti agsao iti wagas a pamiliar wenno impormal unay. Kinapudnona, iti dadduma a kultura, nakaporpormal ti panangirugida no makisaritada iti tao a dida am-ammo. Ngarud, no nalpasen dagiti kadawyan a pammadayaw, nainsiriban nga usaren ti di unay pormal a panagsao ken ti wagas a kasla makisarsarita.

No agpalawagka iti plataporma, masapul met ti panagannad. Ti impormal unay a wagas ti panagsao kissayanna ti dignidad ti Nakristianuan a gimong ken ti pateg ti maibagbaga. Iti dadduma a lenguahe, adda dagiti sasao a rumbeng nga usaren no ti kasarsaritam ket nataengan, mannursuro, opisial, wenno nagannak. (Imutektekam dagiti termino a naaramat iti Aramid 7:2 ken 13:16.) Sabali a sasao ti mausar no asawam wenno nasinged a gayyem ti kasasaom. Nupay saan koma a pormal unay ti panagsaotayo iti plataporma, nadayaw koma dayta.

Ngem adda dagiti makagapu a mamagbalin a nainget wenno pormal unay ti panagpalawag ti maysa a tao. Ti maysa kadagitoy isu ti pannakabukel dagiti sentensia, wenno ti panagkakadua ti sasao. Rumsua ti parikut no isao nga eksakto ti agpalpalawag dagiti naisurat a sasao. Adda naggidiatan ti naisurat ken ti naisawang a sao. Pudno nga agusarka iti naipablaak a material no agsukimatka para iti palawagmo. Nalabit a nayimprenta a balabala ti nakaibasaran ti palawagmo. Ngem no isaom dagiti ideya nga eksakto sigun iti pannakaisuratda wenno basaem a direkta iti naipablaak a balabala, mabalin a saan a kasla makisarsarita ti panagpalawagmo. Tapno kasla makisarsarita ti panagpalawagmo, iyebkasmo dagiti kapanunotan iti bukodmo a sasao ket liklikam dagiti narikut ti pannakabukelna a sentensia.

Ti sabali pay a makagapu isu ti panagduduma iti kapartak ti panagsao. Ti nainget ken pormal a panagpalawag masansan a ramanenna ti panangibbet iti sasao a parepareho ti kapaut ti panagsarimadeng ken kabannayat wenno kapartak ti panagsao. Iti gagangay a pannakisarsarita, agbaliwbaliw ti kapartak ken masansan ti panagsarimadeng a nagduduma ti kapautna.

Siempre, no dakkel a tallaong ti palawagam, masapul a ti kasla makisarsarita nga estilo ket nabuyogan iti napigpigsa a boses, napupuersa a timek, ken entusiasmo tapno matengngelmo ti atensionda.

Tapno maipakatmo ti wagas a kasla makisarsarita a maitutop iti ministerio, masapul a saysayaatem ti agsao iti inaldaw. Di kayat a sawen daytoy a nasken a nangato ti adalmo. Ngem nasayaat a sursuruem ti agsao iti wagas nga addaan panagraem tapno denggen dagiti sabsabali ti ibagam. Bayat a sipapanunotka iti dayta, amirisem no masapul a tandaanam dagiti sumaganad a punto iti inaldaw a pannakisarsaritam.

1. Liklikam dagiti ekspresion a di maitunos iti umiso a gramatika wenno daydiay manginaig kenka kadagiti tattao a ti kabibiagda ket maisalungasing kadagiti nadiosan a pagalagadan. Maitunos iti balakad ti Colosas 3:8, liklikam ti panagsasao a nagubsang wenno narasaw. Iti sabali a bangir, awan pagdaksanna ti panangusar kadagiti gagangay nga ekspresion (colloquial). Impormal dagiti gagangay nga ekspresion, ngem maitunos dagita iti maawat nga estandarte ti panagsao.

2. Saanmo nga ulit-uliten ti isu met la nga ekspresion ken sasao a mangyebkas iti tunggal naiduma nga ideya a pampanunotem. Sursuruem ti agusar iti sasao a sibabatad a mangyebkas iti kayatmo a sawen.

3. Nalawag koma iti panunotmo ti kayatmo nga ibaga tapno saanmo nga uliten; kalpasanna, rugiamon ti agsao.

4. Saanmo a gaburan dagiti nasayaat nga ideya babaen ti adu unay a sasao. Iyugalim nga iyebkas iti simple a sentensia ti punto a masapul a tandaanan.

5. Agsaoka nga addaan panagraem kadagiti sabsabali.