Maiparegta ti Panangusar iti Biblia

TARIGAGAYANTAYO nga iturong ti atension dagiti tattao iti Sao ti Dios, ti Biblia. Dayta a sagrado a libro ti nakaibasaran ti mensahe nga ikaskasabatayo, ket kayattayo a mabigbig dagiti tattao a ti ibagbagatayo ket saan a naggapu kadatayo no di ket iti Dios. Masapul a mapatanor ti panagtalekda iti Biblia.

Iti Tay-ak ti Ministerio. No agsagsaganaka a mapan mangasaba, kanayon a mangpilika iti maysa wenno dua a teksto nga iranudmo kadagiti tattao a madadaan a dumngeg. Uray pay no panggepmo nga apagbiit laeng ti panangiparangmo iti literatura ti Biblia, masansan a makagunggona ti panangbasa iti mayanatup a teksto ti Biblia. Nabilbileg ti Biblia a mangiturong kadagiti marakarnero a tattao ngem ti aniaman a personal a maibagatayo. No saanmo nga aktual a maibasa ti Biblia, mabalinmo ti agadaw iti dayta. Idi umuna a siglo, saan a nalaka ti makaala iti kopia dagiti lukot a nakailanadan ti Kasuratan. Nupay kasta, namin-adu a nagadaw ni Jesus ken dagiti apostolna iti Kasuratan. Ikagumaantay met koma ti mangikabesa kadagiti teksto ket usarentayo dagitoy a mayanatup iti ministeriotayo, a no dadduma adawentay laeng dagita.

No adda gundawaymo a mangbasa iti Biblia, iyasidegmo tapno mabasa met ti bumalay bayat nga ibasbasam. No suroten ti bumalay a basaen ti teksto iti mismo a Bibliana, mabalin a nasaysayaat pay ti reaksionna iti basbasaenna.

Ngem laglagipem nga adda dagiti nagipatarus iti Biblia nga impaulogda ti Sao ti Dios sigun iti kayatda. Mabalin nga adda dagiti patarusda a di mayataday kadagiti orihinal a lenguahe a nausar iti pannakaisurat ti Biblia. Adu dagiti moderno a patarus a nangikkat iti personal a nagan ti Dios, linibegda ti ibagbaga ti teksto iti orihinal a lenguahe maipapan iti kasasaad dagiti natay, ken inlimedda ti kuna ti Biblia maipapan iti panggep ti Dios iti daga. Tapno maipakitam iti bumalay no ania ti napasamak, mabalin a nasken a pagdidinniligem dagiti napateg a teksto iti nadumaduma a Biblia wenno kadagiti immun-una a patarus iti dayta met la a lenguahe. Kadagiti adu a topiko, pinagdidilig ti Panakirinnason Manipud Kadagiti Kasuratan dagiti wagas a panangipaulog ti nadumaduma a patarus kadagiti napateg a balikas kadagiti bersikulo a masansan a mausar. Agyaman la ketdi ti asinoman a mangipatpateg iti kinapudno no maammuanna dagiti pudno a napasamak.

Kadagiti Gimong ti Kongregasion. Maiparegta koma iti amin nga usarenda ti Bibliada kadagiti gimong ti kongregasion. Adu ti pagsayaatan daytoy. Matulonganna dagiti agdengdengngeg a mangipamaysa iti atensionda iti maipalpalawag. Ad-adda a maipaganetget kadakuada ti ibagbaga ti agpalpalawag no mabasada a mismo dayta. Ken maimula iti isip dagiti kabbaro nga interesado a ti Biblia, kinapudnona, ti gubuayan dagiti patpatientayo.

Sumurot dagiti agdengdengngeg a mangbasa kadagiti teksto iti bukodda a Biblia no gutugotem ida. Ti direkta a panangawis ti maysa kadagiti kasayaatan a pamay-an.

Sika nga agpalpalawag ti mangikeddeng no aniada a teksto ti kayatmo nga ipaganetget babaen ti panangawismo kadagiti agdengdengngeg a mangkita kadagita. Nasaysayaat nga ibasa dagiti teksto a tumulong a mangbukel kadagiti kangrunaan a puntom. Kalpasanna, no ipalubos ti tiempo, mangnayonka iti sumagmamano pay a teksto a mangsuporta iti puntom.

Siempre, masansan a saan nga umdas a dakamaten laeng ti teksto wenno awisen dagiti agdengdengngeg a mangkita iti kasuratan. No mangbasaka iti maysa a teksto sa umallatiwka iti sabali idinto ta di pay nabirokan dagiti agdengdengngeg daydiay immuna, inton agangay maupayda ket saandan a suroten a basaen dagiti teksto iti Bibliada. Agpaliiwka. Basaem ti teksto no nasarakanen ti kaaduan.

Agpanunotka a nasakbay. Dakamatem a nasapsapa ti teksto sakbay nga ibasam, iti kasta awan masayang a tiempo a resulta ti pananguray kadagiti agdengdengngeg a mangbirok iti teksto. Nupay basbassit ti material a masaklaw no ikkam dagiti agdengdengngeg iti gundaway a mangkita kadagiti teksto, dakkel ti magunggonada.