Makapabileg ken Positibo

NAIMBAG a damag ti mensahe a naipaannong kadatayo nga ikasaba. Kinuna ni Jesus: “Kadagiti amin a nasion kasapulan a maikaskasaba nga umuna ti naimbag a damag.” (Mar. 13:10) Ni Jesus a mismo ti nangted iti ulidan babaen ti panangitampokna iti “naimbag a damag ti pagarian ti Dios.” (Luc. 4:43) Naawagan met ti inkasaba dagiti apostol a “ti naimbag a damag ti Dios” ken “ti naimbag a damag maipapan iti Kristo.” (1 Tes. 2:2; 2 Cor. 2:12) Makapabileg ken positibo ti kasta a mensahe.

Maitunos iti naideklara nga “agnanayon a naimbag a damag” babaen ti “anghel nga agtaytayab iti nagtangatangan,” idagadagtayo kadagiti tattao: “Agbutengkayo iti Dios ket idayawyo.” (Apoc. 14:6, 7) Ibagatayo kadagiti tattao iti amin a lugar ti maipapan iti pudno a Dios, ti naganna, dagiti nagsayaat a galadna, dagiti nakaskasdaaw nga aramidna, ti naayat a panggepna, ti sungsungbatantayo kenkuana, ken ti kalikagumanna kadatayo. Ramanen ti naimbag a damag ti maipapan iti panangdadael ni Jehova a Dios kadagiti nadangkes, nga awanan panagraem kenkuana ken mangrirriribuk iti biag dagiti dadduma a tattao. Ngem saantayo a biang ti mangukom kadagiti tattao a makasabaantayo. Napasnek ti tarigagaytayo nga adu koma dagiti mangakseptar iti mensahe ti Biblia tapno pudpudno nga agbalin a naimbag a damag dayta kadakuada.​—Prov. 2:20-22; Juan 5:22.

Limitaram Dagiti Negatibo a Material. Siempre, adda dagiti negatibo nga aspeto ti biag. Saantayo nga ikidem dagiti matatayo kadagitoy. Tapno marugiam ti saritaan, mabalin a mangidatagka iti parikut nga adda iti panunot dagiti tattao iti teritoriayo ket saritaem iti apagbiit dayta. Ngem bassit ti maitulongna no dayta ti kangrunaan a pagsaritaanyo. Kanayon a makangngeg dagiti tattao kadagiti makapaupay a damag, isu a no dagiti di makaay-ayo a banag ti pagsaritaanyo, mabalin nga iserraandaka iti ridaw wenno saanda a dumngeg. Ikagumaam nga iti rugi pay laeng ti saritaan, iturongmo ti atension kadagiti makapabang-ar a kinapudno a linaon ti Sao ti Dios. (Apoc. 22:17) Iti kasta, uray no di kayat ti bumalay nga ituloy ti panagsaritayo, makaibatika iti banag a makapabileg a pagpanunotanna. Mabalin nga ad-addanto a madadaan a makisarita iti sumaruno a gundaway.

Kasta met, no naawiska nga agpalawag, saanmo a gabsuonan dagiti agdengdengngeg iti negatibo nga impormasion gapu laeng ta adu dayta. Makapaupay ti epektona no atiddog ti panangsalaysay ti agpalpalawag kadagiti pagkurangan dagiti turayen, dagiti damag maipapan iti krimen ken kinaranggas, ken ti nakaam-amak a panagraira ti imoralidad. Mangdakamatka laeng iti negatibo nga impormasion no adda napateg a pakausaranna. Ti apagbiit a panangdakamat iti kasta nga impormasion maipaganetgetna ti kinanaintiempuan ti palawagmo. Mabalin nga ipabigbigna pay dagiti kangrunaan a makagapu a nangpakaro iti kasasaad ket iti kasta mausar a mangipakita no apay a praktikal ti solusion a nailanad iti Biblia. No mabalin, espesipiko ngem apagbiit laeng a dakamatem dagiti problema.

Masansan a di mabalin wenno di nasayaat nga ipuera amin a negatibo nga impormasion iti maysa a palawag. Ti karit isu ti panangidatag agpadpada iti positibo ken negatibo nga impormasion iti pamay-an a positibo ti epektona. Tapno maaramidmo daytoy, masapul nga ikeddengmo no ania ti iramanmo, no ania ti ipueram, ken no ania ti ipaganetgetmo. Iti Sermon iti Bantay, binalakadan ni Jesus dagiti umim-imdeng kenkuana a saanda a tultuladen dagiti agimbubukodan nga eskriba ken Fariseo, ken nangdakamat iti sumagmamano a pagarigan a mangyilustrar iti puntona. (Mat. 6:1, 2, 5, 16) Nupay kasta, imbes nga ipamaysana kadagiti di umiso nga aramid dagita a panguluen ti relihion, impaganetget ni Jesus ti panangtarus kadagiti umiso a dalan ti Dios ken panangsurot kadagitoy. (Mat. 6:3, 4, 6-15, 17-34) Positibo unay ti epekto daytoy.

Taginayonem a Positibo ti Panagsaom. No natudinganka nga agpalawag iti kongregasionyo maipapan iti maysa nga aspeto ti Nakristianuan nga aktibidad, ikagumaam ti agbalin a makapabileg imbes a manangbabalaw. Siguraduem nga ar-aramidem ti iparparegtam kadagiti dadduma nga aramidenda. (Roma 2:21, 22; Heb. 13:7) Ayat koma, imbes a rurod, ti manggutugot iti ibagbagam. (2 Cor. 2:4) No agtalekka a tarigagayan dagiti kapammatiam nga ay-aywen ni Jehova, ipalnaad ti ibagbagam dayta a panagtalek, ket nasayaat ti epekto daytoy. Intonaram no kasano nga inyebkas ni apostol Pablo ti kasta a panagtalek, kas nailanad iti 1 Tesalonica 4:1-12; 2 Tesalonica 3:4, 5; ken Filemon 4, 8-14, 21.

Adda dagiti tiempo a nasken a mamakdaar dagiti panglakayen maipapan iti di nainsiriban a kondukta. Ngem ti kinapakumbaba tulonganna ida a siaalumamay a mangbalakad kadagiti kakabsatda. (Gal. 6:1) Ti wagas a pannakaisao dagiti bambanag ipasimudaagna koma a mamatmatan dagiti kameng ti kongregasion a buyogen ti panagraem. (1 Ped. 5:2, 3) Balakadan ti Biblia dagiti ub-ubing a lallaki a nangnangruna a tandaananda koma daytoy. (1 Tim. 4:12; 5:1, 2; 1 Ped. 5:5) No kasapulan ti mangtubngar, mangdisiplina, mangilinteg iti bambanag, rumbeng nga aramiden daytoy a maitunos iti ibagbaga ti Biblia a mismo. (2 Tim. 3:16) Saan koma a pulos a lumbes wenno maballikug ti aplikasion ti Kasuratan tapno masuportaran ti ideya a magustuan ti agpalpalawag. Uray no kasapulan ti pannubngar, mapagtalinaed a positibo ti kababagas ti palawag no ad-adda a maipaganetget no kasano a maliklikan ti pannakairubo iti dakes nga aramid, marisut dagiti parikut, maparmek dagiti pakarigatan, makorehir ti dakes nga aramid, ken no kasano a saluadannatayo dagiti pagannurotan ni Jehova.​—Sal. 119:1, 9-16.

No isagsaganam ti palawagmo, panunotem a naimbag no kasano nga ingudom ti kada kangrunaan a punto ken ti intero a palawag. Masansan a ti maudi nga ibagam ti kabayagan nga agtalinaed iti panunotda. Positibo aya dayta?

No Makisarsaritaka Kadagiti Kapammatiam. Apresiaren dagiti adipen ni Jehova dagiti gundaway a makapaglalangenda kadagiti Nakristianuan a gimong. Panawen dagitoy ti naespirituan a pannakapabang-ar. Idagadag ti Biblia a laglagipentayo ti ‘agpipinnaregta’ no agtataripnongtayo kadagiti lugar a pagdaydayawantayo. (Heb. 10:25) Maaramid dayta saan laeng a babaen dagiti palawag ken komento no di pay ket babaen ti panagtutungtong sakbay ken kalpasan dagiti gimong.

Nupay gagangay a mapagsasaritaan dagiti banag iti inaldaw a panagbiag, ti kangrunaan a pammaregta ket agtaud iti panagsasarita maipapan kadagiti naespirituan a banag. Karaman kadagitoy dagiti kapadasan iti sagrado a panagserbitayo. Makapabileg met ti umiso a panaginteres iti tunggal maysa.

Masapul nga agannadtayo di la ket ta impluensiaannatayo ti lubong a nanglikmut kadatayo. Iti surat ni Pablo kadagiti Kristiano idiay Efeso, kinunana: “Ita ta inwaksiyon ti kinaulbod, sawenyo ti kinapudno tunggal maysa kadakayo iti padana a tao.” (Efe. 4:25) Ti panagsao iti kinapudno imbes a kinaulbod ramanenna ti di panangidayaw kadagiti bambanag ken tattao a pagrukrukbaban ti lubong. Kasta met, namallaag ni Jesus maipapan iti “makaallilaw a pannakabalin ti kinabaknang.” (Mat. 13:22) Isu a no agsasaritatayo, agannadtayo a ditay itantandudo ti kasta a panangallilaw babaen ti panangitan-ok iti panangtagikua kadagiti material a banag.​—1 Tim. 6:9, 10.

Idi nangbalakad ni apostol Pablo maipapan iti kinapateg ti panagpipinnabileg, indagadagna a ditay ukomen wenno laisen ti maysa a kabsat nga agkedked a mangaramid iti dadduma a banag gapu “kadagiti pagkapuyan iti pammatina,” kayatna a sawen, agsipud ta dina pay matarusan ti amin a saklawen ti Nakristianuan a wayawaya. Kinapudnona, tapno makapabileg ti panagsasaritatayo, masapul a panunotentayo ti nalikudanda ken ti rimmang-ayanda iti naespirituan. Anian a nakalkaldaang no “mangikabil[tayo] iti sanguanan ti maysa a kabsat iti pakaitibkolan wenno pakaigapuan ti pannakaikulbo”!​—Roma 14:1-4, 13, 19.

Dagidiay mangsarsaranget kadagiti nadagsen a personal a parikut​—kas pagarigan, napaut a panagsakit​—apresiarenda dagiti makapabileg a panagsasarita. Mabalin nga ikagkagumaan ti kasta a tao ti tumabuno kadagiti gimong. Mabalin a kunaen dagidiay makaammo iti kasasaadna: “Komustaka?” Di pagduaduaan nga apresiarenna ti pannakaseknanda. Nupay kasta, mabalin a saan a ti kasasaad ti salun-atna ti kangrunaan a makaparegta kenkuana a pagtungtonganyo. Nalabit nga ad-adda a maragsakan no apresiarem ti maar-aramidanna ken komendaram. Makitam kadi a di agbalbaliw ti panagayatna ken ni Jehova ken agtultuloy nga ib-ibturanna ti narigat a kasasaad? Maparparegtaka kadi kadagiti komentona? Saan ngata nga ad-adda a makapabileg no iturongmo ti atension kadagiti kabaelanna nga aramiden ken maitultulongna iti kongregasion imbes a kadagiti dina kabaelan?​—1 Tes. 5:11.

Tapno makapabileg ti panagsasaritatayo, nangnangruna a nasken a laglagipentayo ti panangmatmat ni Jehova iti adda a mapagsasaritaan. Iti nagkauna nga Israel, nakapungtot unay ni Jehova kadagidiay nagsao a maibusor kadagiti pannakabagina ken nagreklamo maipapan iti manna. (Num. 12:1-16; 21:5, 6) Pampaneknekantayo a nakasursurotayo kadagita a pasamak no raementayo dagiti panglakayen ken apresiarentayo ti naespirituan a taraon a maipapaay babaen ti klase matalek ken masirib nga adipen.​—1 Tim. 5:17.

Adu dagiti makagunggona a banag a mabalintay a pagsasaritaan no kaduatayo dagiti kapammatiantayo. Nupay kasta, no pammabalaw laeng ti sasawen ti maysa, pagbalinem a makapabileg ti saritaan.

Mangaskasabatayo man kadagiti sabsabali, agpalpalawag iti plataporma, wenno makisarsarita kadagiti kapammatiantayo, naannadtayo koma tapno mayebkastayo manipud kadagiti gameng ti pusotayo “ti aniaman a sasao a naimbag a maipaay a pangpabileg kas iti kasapulan, tapno maipaayna no ania ti mainugot kadagiti agdengdengngeg.”​—Efe. 4:29.