Makapabilegkayo Koma

¹ Idinto ta agbibiagtayo iti “napeggad a tiempo a narigat a pakilangenan,” kasapulantay amin ti pammaregta. (2 Tim. 3:1) Ammona unay a kasapulan daytoy uray idi kaaldawanna, magagaran ni Pablo a mangusar ti pannakilangen kadagiti kakabsatna a kas oportunidad a “panagpipinnaregta.” Ginutugotna dagiti kakabsatna a “suroten[da] koma dagiti bambanag a makapabileg iti maysa ken maysa.” (Roma 1:11, 12; 14:19) Nagballigi dagitoy a panangikagumaan “a pinabpabilegda dagiti kararua dagiti adalan, a pinarparegtada ida nga agtalinaed iti pammati.” (Ara. 14:22) Pudno a kasapulantayo ita ti kasta a pammaregta.

² Makapabilegtayo kadagiti dadduma babaen ti sawentayo. No mausar a siuumiso, agbalin dagiti sasaotayo a “kasla dagiti mansanas a balitok iti sinukog a pirak.” (Prov. 25:11) Babaen ti pannakipaset kadagiti gimong, “agpipinnaregtatayo iti maysa ken maysa.” (Heb. 10:25) Mabalin a mausar ti dilatayo iti positibo a wagas no iranudtay dagiti kapadasan, mangted ti komendasion, wenno pagsasaritaan dagiti naespirituan a bambanag. Ti kakasta a makaay-ayo a panangusar ti dila ‘isut’ naimbag a pangpabileg, a maipaay no ania ti pagimbagan dagiti managdengngeg.’​—Efe. 4:29.

³ Sawen Dagiti Bambanag a Makapabileg: Iti Filipos 4:8, impaay ni Pablo dagiti makatulong a giya a maipaay iti panagsaotayo. Nakunana a masapul nga utobentayo dagiti bambanag a napudno, serioso a pakaseknan, nalinteg, nadalus, maay-ayat, naimbag a pakasarsaritaan, naimbag a kababalin, ken madaydayaw. Kanayon a masigurotay a ti sawentayo ket pudno ken makagunggona iti dadduma no naibasarda iti Sao ti Dios. (Juan 17:17) Ti Nakristianuan a dedikasiontayo, dagiti maad-adaltayo kadagiti gimong ti kongregasion, ti wagas a panangitungpaltay a naan-anay iti ministeriotayo, ken dadduma pay ket bambanag a serioso a pakaseknan. Ti makapabileg a panagsasarita maipapan kadagiti pagalagadan ken prinsipio iti Sao ti Dios ket sigurado a tumulong a “mamagsirib [kadatayo] maipaay iti pannakaisalakan.” (2 Tim. 3:15) Mabalintay nga iyebkas ti panangipategtayo iti nadalus a kondukta nga al-alagaden dagidiay adda iti nadalus nga organisasion ni Jehova. Mabalintay a padayawan dagiti makaay-ayo a kinamanagayat dagiti kakabsattayo. (Juan 13:34, 35) Dagiti bambanag a naimbag a pakasarsaritaan saklawenna dagiti nasayaat a Nakristianuan a galad a pammati, rag-o, talna, ken mabayag a panagitured a mapaliiwtay kadagiti kakabsattayo. Ti panagsasarita maipapan iti kasta a bambanag ket ‘naimbag a pakapabilgan’ dagiti dadduma.​—Roma 15:2.

⁴ Kada aldaw, mapasanguantayo kadagiti makapaupay a pakaringgoran ti lubong. Anian a makapabang-ar nga iwalin dagitoy a bambanag ket siaayat a makilangentayo kadagiti kakabsattayo! Apay a dikay sumangpet a nasapa idiay Kingdom Hall tapno maaramid daytoy? Manen, kalpasan ti gimong adda pay kanayonan a gundaway a makapagpipinnabilegtay iti maysa ken maysa. Daytoy a napateg a tiempo a makapaglalangentayo ket maysa a gameng a masapul nga ipateg. No kanayontay a makaparegta ken makapabileg, sipupudno a kunaen dagiti dadduma kadatayo: “Pinabang-aranda ti espirituk.”​—1 Cor. 16:18.