Panangpabileg iti Maysa ken Maysa Bayat ti Pannakiramantayo iti Ministerio
1 Apresiarentay amin no adda mangpabileg kadatayo babaen ti “sao a naisao iti umiso a tiempona.” (Prov. 25:11) No makipagtrabahotayo kadagiti sabsabali iti ministerio, kasanotay a masigurado a makapabileg ti saritaantayo?
2 Makapabileg a Saritaan: Anian a makapabileg no dagiti naespirituan a bambanag ti pagsasaritaantayo bayat ti panangasabatayo! (Sal. 37:30) Mabalintay a pagtutungtongan ti presentasiontayo wenno dagiti makaparegta a kapadasantayo iti ministerio iti tay-ak itay nabiit. (Ara. 15:3) Adda kadi kayatyo nga iranud a makapainteres a punto a napidutyo manipud iti personal a panagbasayo iti Biblia, kadagiti nabiit pay a magasin, wenno kadagiti gimong ti kongregasion? Mabalinyo met a pagsasaritaan dagiti punto a nabiit pay a naidatag iti palawag publiko iti Kingdom Hall.
3 Nalabit a maupaykayo no gupden ti bumalay ti saritaan a dikay man la nakapagsao. Apaman a makapanawkayo ken ti kaduayo, makagunggona no pagtungtonganyo iti apagbiit no ania ti nasayaat nga aramidenyo no maipasangokayto manen iti kasta a situasion, a nalabit usarenyo ti libro a Pannakirinnason. Ket no magustuanyo ti presentasion ti kaduayo, mapabilegyo no komendaranyo.
4 Panagdisnudo: Adda kadi kagrupoyo iti panagadal iti libro a saanyo pay a nakadua iti ministerio? No dakayo a mismo ti mangkiddaw kadakuada a kaduaendakayo, mabalin nga agresulta dayta iti “panagsisinnukat iti pammaregta.” (Roma 1:12) Apresiaren dagiti regular ken auxiliary pioneer no adda kaduada a mangasaba ken mangyadal iti Biblia nangruna iti bigbigat wenno iti malmalem, a manmano ti agibumbunannag a makiramraman iti ministerio. Matulongantayo dagiti payunir no agdisnudotayo a makikadua kadakuada. Adda kadi agibumbunannag a limitado ti maar-aramidanna iti ministerio gapu ta nakapuy ti salun-atna? Agpada a mabenepisiarankayo no awisenyo a kumuyog iti panangyadalyo iti Biblia.—Prov. 27:17.
5 Kanayon a makaparegta ti panangyebkas iti komendasion ken apresasion uray no kadagiti babassit laeng a banag. Laglagipentayo dayta no makipagtrabahotayo kadagiti sabsabali iti ministerio, yantangay kayattayo nga ‘itultuloy a pabilgen ti maysa ken maysa.’—1 Tes. 5:11.