Tulongan Dagiti Dadduma nga Agbalin a Nasigo iti Panangusar ti Sao ti Dios
1 Ni Jehova nangaramid kadagiti nagadu a probision tapno masanaytayo nga agbalin nga epektibo iti personal a ministeriotayo. Kas pangarigan, iti ngangnganin 50 a tawtawen ti Teokratiko nga Eskuelaan ti Panagministro ket nakaited ti progresibo a panagsanay iti panagpalawag ken panangisuro. Daytoy ket napakanayonan ti Gimong ti Serbisio, buyogen ti praktikal a palpalawag, demonstrasion, ken panawen ti diskusion.
2 Mabenepisiarantay met manipud kadagiti regular a panagbisita dagiti manangaywan ti sirkito. Ti manangaywan ti serbisio bumisita kadagiti tunggal grupo ti panagadal ti libro ket mangited ti naayat a tulong tapno maparang-ay dagiti abilidadtayo iti ministerio. Tunggal panawen nga agtataripnongtayo a mapan mangasaba makaawattayo ti sangapulo a minutos a praktikal nga instruksion ken makagunggona a suhestion para iti dayta nga aldaw.—Heb. 10:23-25.
TULONGAN DAGITI AGTUTUBO KEN ESTUDIANTE TI BIBLIA
3 Dagiti agkabanuag nga agibumbunannag ken babbaro pay kasapulanda ti regular a tulong iti ministerio iti publiko. Ti kangrunaan a responsabilidad ket maipabaklay kadagiti nagannak ken kadagidiay mangikunkundokta ti panangyadal ti Biblia kadakuada. (Gal. 6:6; Efe. 6:4) Ti kina-epektibo saan a bigla a mapasamak ngem adda ti pannakasapul para iti sistematiko a naayat a personal a tulong ken panagsanay.
4 Ti personal a tulong kasapulan a mangrugi sakbay a ti tao ket aktual a makiraman iti ministerio. Repasuen ti Topiko a Pagsasaritaan. Tulongan isuna a mangparnuay ti simple a presentasion, nalabit nga usaren laeng ti maysa a kasuratan iti rugina. Kabayatan a mangaskasabakayo a dua mangiwayaka ti panawen a mangited ti komendasion ken dagiti naasi a suhestion para iti irarang-ayna. Ipaganetget ti pannakasapul a mangmantener ti panagkarkararag iti amin a tiempo.—Efe. 6:18, 19.
5 Nasayaat la unay no dagiti eksperiensado nga agibumbunannag ken regular a payunir ket mangiskediolda ti panawen a mangsuporta ti panangasaba iti ngudo ti lawas tapno matulongan dagitoy a baro nga agibumbunannag babaen ti pannakipagtrabaho kadakuada. Dayta a personal a sakripisio iti pasetda ket apresiaren la unay dagiti agtartarigagay a rumang-ay babaen ti pannakipagtrabahoda a kadua dagiti eksperiensado a kakabsat.—Ecl. 4:9, 10.
6 Iti naminsan amintayo ket napadasantayo met ti barbaro pay iti kinapudno ken awanan ti adu a kapadasan ngem nakaawattayo ti pammaregta ken panagsanay manipud kadagiti eksperiensado a kakabsat. (Prov. 27:17; Ara. 20:35) Sapay koma ta ti panangapresiar iti daytoy a banag tignayennatayo a mangtulong kadagiti dadduma nga agbalin nga ad-adda a nasigo a mangusar ti Sao ni Jehova.