Agbalintayo a Progresibo a Ministro
1 Maay-ayo ti nailangitan nga Amatayo no rumang-ay iti naespirituan dagiti adipenna. Ramanen dayta ti panagrang-ay kas nataengan ken epektibo a ministro a mangikaskasaba iti naimbag a damag. Pinaregta ni Pablo ti manangaywan a ni Timoteo nga itultuloyna ti agregget tapno ti panagrang-ayna maiparangarang iti amin a tattao. (1 Tim. 4:13-15) Rumbeng nga ikagumaantay amin a pasayaaten ti kualidad ti ministeriotayo, uray dagidiay aduanen iti kapadasan kas agibumbunannag.
2 Mangipasdek Kadagiti Personal a Kalat: Masapul nga addaantayo kadagiti personal a kalat tapno rumang-aytayo. Ania ti sumagmamano a kalat a mabalintay nga ipasdek? Mabalintay nga ikagumaan ti agbalin nga ad-adda a nasigo iti panangusar iti naespirituan a kampilantayo, ti Biblia. (Efe. 6:17) Nalabit adda kita ti panangasaba a rumbeng a parang-ayentayo, kas iti panangasaba iti lansangan, panangasaba babaen ti telepono, wenno panangasaba iti lugar ti negosio. Baka mabalintay nga ikagumaan ti agbalin nga ad-adda nga epektibo iti panagsarungkar. Ti sabali pay a nagsayaat a kalat ket ti panangparang-ay iti abilidadtayo a mangirugi ken mangikondukta kadagiti panangyadal iti Biblia.
3 Dagiti Probision: Dagiti gimong iti kongregasion, nangnangruna ti Teokratiko nga Eskuelaan ti Panagministro ken ti Gimong ti Serbisio, ket nairanta a tumulong kadatayo nga agbalin a progresibo a ministro. Sigurado nga ad-adu a bendision ti maawattayo no ad-adda nga igaedtayo ti agsagana ken tumabuno kadagitoy a gimong ken iyaplikartayo dagiti naipaay a singasing.—2 Cor. 9:6.
4 Nasken met a tulongantayo a rumang-ay ti maysa ken maysa. (Prov. 27:17) Rumang-aytayo no imdengantayo a naimbag ti presentasion dagidiay makaduatayo iti panangasaba. Malaksid iti dayta, ti manangaywan iti panagadal iti libro ket mabalin a mangaramid iti urnos tapno matulongandatayo. Anian a bendision no adda aduan kapadasan a payunir wenno sabali pay nga agibumbunannag a mangtulong kadatayo nga agbalin nga ad-adda nga epektibo ken maaddaan iti dakdakkel a rag-o iti ministerio! Adda kadi kabbaro nga agibumbunannag iti grupotayo iti panagadal iti libro? Nalabit mabalintay nga awisen a makikadua kadatayo iti ministerio.
5 Ti kapatgan a trabaho a maar-aramid ita ket ti Nakristianuan a ministerio. Kayattay nga ipaay ken Jehova ti amin a kabaelantayo bayat nga idatdatontayo kenkuana ti ‘sakripisio ti panagdaydayawtayo.’ (Heb. 13:15) No ikagumaantayo ti rumang-ay iti ministerio, agbalintayo a trabahador ‘nga awan ti aniaman nga ibainna, nga aramatentayo a siuumiso ti sao ti kinapudno.’—2 Tim. 2:15.