Tulong iti Umiso a Tiempo
1 Gapu ta maseknan iti kongregasion, kanayon nga ipaay ni Jesus ti “tulong iti umiso a tiempo.” (Heb. 4:16) Nawadwad iti daytoy a tulong ti maipaay babaen dagiti “sagsagut a lallaki,” kas naikari iti Efeso 4:8, 11, 12. Maysa kadagitoy a sagsagut isu iti manangaywan ti serbisio iti kada kongregasion.
2 Iti ania a wagas a makatulong kadatayo iti manangaywan ti serbisio? Adu a wagas: (1) Ikagumaanna iti panamagridamna kadatayo iti importansia ti panangasaba ken panagaramid iti disipulo a trabaho. (2) Siguruenna a ti naimbag nga organisasion ken panangidaulo ket maipaay babaen dagiti Panagadal ti Libro iti Kongregasion. (3) Iyurnosna ti personal a tulong a mangparang-ay iti kinaepektibotayo a kas ministro.
BISITA ITI MANANGAYWAN TI SERBISIO
3 Ti manangaywan iti serbisio isut’ gagangay a nadutokan a mangikondukta iti Panagadal ti Libro iti Kongregasion, ngem maminsan iti kada bulan a panawanna iti bukodna a grupo tapno makipagtrabaho iti maysa kadagiti dadduma a panagadal ti libro iti maysa a lawas. Ti katulonganna isut’ mangala iti lugarna bayat ti kaawanna. Pakaammuanna dagiti konduktor ti panagadal iti libro a nasakbay maipapan iti bisitana tapno maiplanoda iti naan-anay a pannakagunggona bayat iti makalawas nga aktibidad.
4 Bayat daytoy nga espesial a lawas, ti panagadal iti libro ti maikondukta laeng iti 45 minutos. Mangipalubos daytoy iti manangaywan ti serbisio iti 15 minutos a mangted iti pammaregta a palawag a nairanta a tumulong iti panagibanghelio a trabahotayo.
5 Amin dagiti agibumbunannag iti grupo ti masapul a naan-anay a makiraman iti serbisio bayat daytoy nga espesial a bisita. Kadagidiay pakaitutopanna, mabalin a maorganisar iti panangasaba iti rumabii a maipaay iti dayta a lawas. Maysa kadagiti kalat iti manangaywan ti serbisio isut’ pannakikuyogna iti serbisio kadagiti adu nga agibumbunannag agingga iti mabalin. Nalabit a makuyogna dagiti dadduma kadagiti panagsarungkar ken panagadal ti Biblia. Siasinoman nga agkasapulan iti tulong ken pammaregta iti ministerio ti mabalin nga umasideg kenkuana tapno agpatulongda.
6 Pagsaritaan iti manangaywan ti serbisio ken iti konduktor ti panagadal maipapan iti serbisio ti grupo. Marepaso dagiti urnos ti serbisio tapno maisiguro a praktikal ken kombeniente kadagiti amin. Mabalinna a maiyurnos ti panagsarungkar kadagiti iregular nga agibumbunannag a kaduana iti konduktor ti panagadal. Mairepasona met iti salansan dagiti report iti panagadal ti Biblia iti konduktor. Nalabit a makaduaanda dagiti dadduma kadagiti panagadalda ti Biblia ken itukonda iti espiritual a pammaregta.
7 Kadagiti kongregasion a nawadwad iti panagadal ti libro, ti panagbisita iti manangaywan ti serbisio isut’ nabattaway. Gapuna nga ikagumaan dagiti amin iti naan-anay a magunggonaan no isut’ bumisita. Kadagiti kongregasion a sumagmamano laeng iti Panagadal ti Libro iti Kongregasion, ti manangaywan iti serbisio ti mangikagumaan a bumisita iti kada grupo iti agkada innem a bulan.
8 Babaen ti pannangted iti napusuan a suporta iti manangaywan ti serbisio no bumisita iti grupo ti panagadal iti libro, maparang-ay iti kinaepektibotayo ken maragpattayo iti dakdakkel a rag-o iti ministerio.