No Kasano a Mangipakita iti Personal nga Interes Dagiti Manangaywan iti Panagadal iti Libro ti Kongregasion
1 Ti Panagadal iti Libro ti Kongregasion ket nadisenio tapno “posible ti ad-adu a personal nga atension a maipaay iti naespirituan a panagdakkel ti kada indibidual. . . . Ditoy ti nakaisarmingan ti kinamanagayat ni Jehova ken ti kinamanangngaasina kadagiti tattaona.” (om p. 75; Isa. 40:11) Napateg ti paset ti manangaywan iti panagadal iti libro no maipapan iti panangipaay iti kasta a personal nga atension.
2 Iti Panagadal iti Libro: Yantangay nairanta a babassit dagiti grupo iti panagadal iti libro, ti manangaywan iti panagadal iti libro maam-ammona a naimbag dagiti kameng ti grupona. (Prov. 27:23) Kaaduanna nga adda dagiti gundaway nga aglalangen sakbay wenno kalpasan ti panagadal iti kada lawas. Iti uneg ti makabulan, nalabit a makapatangna ti nganngani tunggal miembro ti grupona. Daytoy ti tumulong kadagiti kameng ti panagadal iti libro tapno dida alusiisen nga umasideg kenkuana no maipasangoda iti pakasuotan wenno no kasapulanda ti pammaregta.—Isa. 32:2.
3 Ti manangaywan iti panagadal iti libro ikagumaanna a paregtaen ti amin a kagrupona a makipaset bayat ti panagadal. Ti maysa a pamay-an a maaramidna daytoy ket babaen ti naasi, naalumamay a panangidaulona iti panagadal. (1 Tes. 2:7, 8) Mangkita kadagiti pamay-an a makiraman iti diskusion ti amin a kagrupona, agraman dagiti ubbing. No adda dagiti mabain nga agkomento, mabalin a pribado a tulonganna ida babaen ti nasakbay a pannakitulag kadakuada a basaenda ti maysa a kasuratan wenno komentuanda ti maysa a partikular a parapo. Wenno isurona ida no kasano ti agkomento iti bukodda a sasao.
4 No ministerial nga adipen ti katulongan ti manangaywan iti panagadal iti libro, iyurnos ti manangaywan a ti katulonganna ti mangidaulo iti panagadal maminsan kada dua a bulan. Iti kasta, ti manangaywan mapaliiwna ti katulongan ken makaipaay kadagiti makatulong a singasing. Anian a nagsayaat nga urnos tapno matulongan dagiti kakabsat a mangpasayaat iti arte ti panangisuroda!—Tito 1:9.
5 Iti Tay-ak ti Ministerio: Maysa kadagiti kangrunaan nga annongen ti manangaywan iti panagadal iti libro isu ti panangidaulona iti panagebanghelio. (Num. 27:16, 17) Mangaramid kadagiti praktikal nga urnos para iti grupo a panangasaba ken ikagumaanna a tulongan ti amin a kagrupona a maaddaan iti rag-o iti ministerioda. (Efe. 4:11, 12) Tapno maaramidna dayta, pagbalinenna a kalat a makadua iti panangasaba ti tunggal maysa iti grupona. Tumulong met iti manangaywan iti serbisio a mangaramid iti urnos tapno dagiti mayat a rumang-ay iti dadduma nga aspeto ti ministerioda ket makaawat iti tulong manipud kadagiti aduan kapadasan nga agibumbunannag.
6 Kas Naayat a Pastor: Ti manangaywan iti panagadal iti libro ket interesado kadagidiay limitado ti magapuananda iti panangasaba gapu iti kasasaadda. Siguraduenna a dagiti addaan kadagiti limitasion, gapu iti kinalakay wenno gapu iti pannakaidalit ken dagidiay temporario ti limitasionda gapu iti nakaro a sakit wenno dunor, ammoda koma ti urnos a mabalinda nga ireport ti 15, 30, wenno 45 a minuto a nabusbosda iti tay-ak ti serbisio no nababbaba ngem maysa nga oras ti maireportda iti maysa a bulan. (Ti Congregation Service Committee ti mangikeddeng no siasino dagiti makualipikar iti daytoy nga urnos.) Maseknan met ti manangaywan kadagiti kameng ti grupo a nalabit di aktibo, nga ikagumaanna a tulongan ida nga agbalin nga aktibo manen iti kongregasion.—Luc. 15:4-7.
7 Anian a yamantayo iti naayat a pannakaseknan nga ipakpakita ti manangaywan iti panagadal iti libro! Ti ipapaayda a personal nga atension tulonganna ‘a makagteng amin iti panagmaymaysa iti pammati . . . , iti rukod ti kinatayag ti kinanaan-anay ti Kristo.’—Efe. 4:13.