No Ania ti Maitulong Kadatayo ti Urnos a Panagadal iti Libro ti Kongregasion
1. Ania ti maitulong kadatayo dagiti lima a linawas a gimongtayo?
1 Nagduduma ti wagas a pannakaikondukta ken panggep dagiti lima a linawas a gimongtayo. Ngem napateg amin dagitoy ta tulongandatayo a “mangparegta iti ayat ken nasayaat nga ar-aramid.” (Heb. 10:24, 25) Ania dagiti nakaidumaan ti Panagadal iti Libro ti Kongregasion ken ania dagiti maitedna a pagimbagan?
2. Ania dagiti pagsayaatan ti urnos a panagadal iti libro?
2 Tulongannatayo a Rumang-ay iti Naespirituan: Kaaduanna, basbassit nga amang ti bilang dagiti tumabtabuno iti panagadal iti libro ngem kadagiti tumabtabuno kadagiti dadduma a gimong ti kongregasion. Gapu ta kasta, sumingedtayo kadagiti kakabsat ket makatulong daytoy kadatayo iti naespirituan. (Prov. 18:24) Ikagkagumaam kadi nga am-ammuen ti tunggal kagrupom, a nalabit makikaduaka kadakuada iti ministerio? Ti urnos a panagadal iti libro ikkanna ti manangaywan iti grupo iti gundaway a mangammo iti kasasaad ti tunggal maysa iti grupona ken mangparegta kadakuada.—Prov. 27:23.
3. Apay a maallukoy dagiti mayad-adalan iti Biblia nga agkomento ken tumabuno iti panagadal iti libro?
3 Inawismo kadin dagiti iyad-adalam iti Biblia a tumabuno iti panagadal iti libro? Dagiti mayad-adalan iti Biblia a bumdeng a tumabuno kadagiti dadakkel a gimong ket nalabit saanda unay a mabain a tumabuno iti bassit a taripnong, nangruna no iti pribado a balay. Naturtured nga agkomento dagiti agtutubo ken kabbaro gapu ta natalged ti riknada iti kasta a kasasaad. Ket tangay basbassit ti grupo, ad-adu ti gundawaytayo nga agkomento ket iti kasta maidaydayawtayo ni Jehova.—Sal. 111:1.
4. Apay a kombeniente kadagiti agibumbunannag ti urnos a panagadal iti libro?
4 Kaaduanna, maang-angay ti panagadal iti libro kadagiti lugar nga asideg iti pagnanaedan dagiti agibumbunannag. Nupay saan a posible nga amin ket maikameng iti grupo a kaasitgan kadakuada, mabalin a nabibiit ti mapan iti grupo a nakaitudingantayo no idilig iti itatabuno iti dadduma pay a gimong ti kongregasion. Ti pakaangayan ti panagadal iti libro ket mabalin met a pagtataripnongan sakbay ti panangasaba.
5. Kasano a matulongannatayo iti ministerio ti manangaywan iti panagadal iti libro?
5 Tulongannatayo iti Ministerio: Ti manangaywan iti panagadal iti libro interesado a tumulong iti tunggal maysa tapno agbalin a regular, nabunga, ken naragsakda iti ministerio. Gapuna, ikagumaanna ti makipagtrabaho iti amin a kagrupona ken tulonganna ida iti nadumaduma nga aspeto ti ministerio. No marigatanka iti maysa nga aspeto ti ministerio, kas koma iti panagsarungkar, ipakaammom dayta iti manangaywan iti grupo a nakaitimpuyogam. Mabalinna nga iyurnos ti pannakipagtrabahom iti aduan kapadasan nga agibumbunannag iti grupoyo. Lumaingka a mangyadal iti Biblia no paliiwem a naimbag dagiti nasayaat a wagas ti panangisuro ti manangaywan iti panagadal iti libro.—1 Cor. 4:17.
6. Apay nga aprobetsarentayo a naan-anay ti urnos a panagadal iti libro?
6 Anian a bendision ti Panagadal iti Libro ti Kongregasion! Daytoy a naayat nga urnos ni Jehova tulongannatayo nga agtalinaed a natibker iti naespirituan kadagitoy narigat a tiempo a pagbibiagantayo.—Sal. 26:12.