Ti Panagadal ti Kongregasion iti Libro—No Apay a Kasapulantayo
1. Kasano a nangrugi ti Panagadal ti Kongregasion iti Libro?
1 Idi 1895, Dawn Circles for Bible Study ti awag kadagiti grupo a panagadal dagiti Estudiante ti Biblia, kas pannakaawag idi kadagiti Saksi ni Jehova. Inadalda dagiti tomo ti Millenial Dawn. Idi agangay, naawagan dagitoy a panagadal kas Berean Circles for Bible Study. (Ara. 17:11) Masansan a maysa a bassit a grupo ti agtataripnong iti maysa a pagtaengan iti rabii a kombiniente iti grupo. Dagita a gimong ti nangrugian ti Panagadal ti Kongregasion iti Libro.
2. Kasano a ‘makapagsisinnukattayo iti pammaregta’ kabayatan ti panagadal iti libro?
2 Pammaregta ken Pannaranay: Gapu ta nairanta a bassit a grupo ti panagadal iti libro, dakdakkel ti gundaway dagiti timmabuno nga agkomento kas ebkas ti pammatida. Agbanag dayta iti “panagsisinnukat iti pammaregta . . . , tunggal maysa babaen ti pammati ti sabali.”—Roma 1:12.
3, 4. Kasano a ti panagadal iti libro tulongannatayo a mangitungpal iti ministeriotayo?
3 Ti panangpaliiw iti wagas ti panangisuro ti manangaywan iti panagadal iti libro ket makatulong kadatayo a ‘mangaramat a siuumiso iti sao ti kinapudno.’ (2 Tim. 2:15) Imutektekanyo no kasano ti panangipaganetgetna iti Kasuratan a nakaibatayan ti material. No maitutop iti publikasion a maadal, mabalin nga itampokna dagiti napateg a punto babaen ti pangserra a repaso, a ti Biblia laeng ti mausar. Ti panangtulad iti nasayaat a pamay-anna ket tumulong kadatayo a mangparang-ay iti panangisurotayo iti Nakristianuan a ministerio.—1 Cor. 11:1.
4 Malaksid iti panangikonduktana iti linawas a panagadal, ti manangaywan iti panagadal iti libro idauluanna ti panagebanghelio. Iti pannakitinnulongna iti manangaywan ti serbisio, mangaramid kadagiti praktikal nga urnos ti panangasaba. Ikagumaanna a tulongan ti amin a kameng ti grupo tapno matungpalda ti Nakristianuan nga annongenda a mangikasaba iti naimbag a damag ken mangaramid kadagiti adalan.—Mat. 28:19, 20; 1 Cor. 9:16.
5. Ania a personal a tulong ti magun-od babaen ti panagadal iti libro?
5 Ti manangaywan iti pangadal iti libro ket interesado iti naespirituan a panagrang-ay ti tunggal kameng ti grupo. Ipakitana dayta a pannakaseknan kabayatan dagiti gimong ti kongregasion ken bayat a makipagtrabaho kadagiti dadduma iti tay-ak ti serbisio. Gundawayanna met ti mangipaay iti naespirituan a pammabileg no sarungkaranna dagiti kakabsat kadagiti pagtaenganda. Marikna koma ti amin a nalakada nga asitgan ti manangaywan iti panagadal iti libro kaano man a kasapulanda ti naespirituan a tulong.—Isa. 32:1, 2.
6. (a) Kasano a napabileg dagiti kakabsat iti dadduma a pagilian babaen ti panaggigimongda iti babassit a grupo? (b) Kasano a personal a nagunggonaankayo manipud iti panagadal iti libro?
6 Agpipinnabileg: Kadagiti pagilian a maiparit ti trabaho dagiti adipen ti Dios, masansan nga agtataripnong dagiti kakabsat iti babassit a grupo. Malagip ti maysa a kabsat: “Uray maiparit idi dagiti Nakristianuan nga aktibidadmi, agingga a mabalin linawas nga aggigimongkami kadagiti grupo a buklen ti 10 agingga iti 15 a katao. Makapabileg iti espiritualidadmi dagiti gimong, agpadpada iti panagadalmi iti Biblia ken iti panaglalangenmi kalpasan ti panagadal. Pagsasaritaanmi dagiti kapadasanmi, banag a nakatulong tapno mabigbigmi nga adda sagsagabaen ti tunggal maysa.” (1 Ped. 5:9) Sapay koma ta agpipinnabilegtayo babaen ti naan-anay a panangsuportatayo iti Panagadal ti Kongregasion iti Libro.—Efe. 4:16.