Makitinnulongka iti Manangaywan iti Panagadal iti Libro ti Kongregasion
1 Adu ti magunggona ti tunggal maysa kadatayo iti Panagadal iti Libro ti Kongregasion. Napagsasaritaantayo idi napan a bulan no kasano nga itungpal ti manangaywan iti Panagadal iti Libro ti Kongregasion ti annongenna. Ngem kasanotay a matulongan tapno magunggonaantayo ken dagiti sabsabali?
2 Linawas a Tumabuno: Yantangay babassit dagiti grupo iti panagadal iti libro, napateg ti kaaddam. Ikagumaam ti tumabuno iti kada lawas. Makatulongka met no saanka a naladaw a sumangpet, tapno mairugi ti manangaywan ti panagadalyo iti naurnos a wagas.—1 Cor. 14:40.
3 Makapabileg a Komento: Ti maysa pay a pamay-an a makatulongka ket babaen ti panagsagana a naimbag ken panangipaay kadagiti makapabileg a komento. Kaaduanna a kasayaatan dagiti komento maipapan iti maysa laeng a punto, ken dayta ti mangparegta kadagiti dadduma nga agkomento. Saanmo a komentuan ti intero a parapo. No adda punto a magustuam, palawaem ti diskusion babaen ti panangiranud iti kapanunotam no agkomentoka.—1 Ped. 4:10.
4 No naikkanka iti pribilehio nga agbasa kadagiti parapo para iti grupoyo, sipapasnek nga itungpalmo dayta nga annongen. Makaay-ayo ti panagadalyo no nasayaat ti panagbasam.—1 Tim. 4:13.
5 Panangasaba kas Grupo: Kadagiti adu a lokasion a pakaangayan ti panagadal iti libro, adda dagiti taripnong sakbay ti panangasaba. Ti panangsuportam kadagitoy nga urnos ket makatulong iti manangaywan a mangidadaulo iti trabaho a panagebanghelio. Ibilangmo dagitoy nga urnos a kas gundaway tapno ad-adda a sumingedka kadagiti kakabsatmo ken maparegtam ida.
6 Report iti Tay-ak ti Serbisio: Matulongam met ti manangaywan no itedmo a dagus ti reportmo iti ngudo ti tunggal bulan. Mabalinmo nga ited ti reportmo kenkuana wenno ikabil iti kahon a pagurnongan kadagiti report iti Kingdom Hall. Dayta a kahon ti mabalin a pangalaan ti sekretario kadagiti report a nakolekta dagiti manangaywan iti panagadal iti libro.
7 Maapresiar ti pannakitinnulongmo iti manangaywan iti Panagadal iti Libro ti Kongregasion. Kangrunaan iti amin, mainanamam a ni Jehova ket ‘adda iti espiritu nga ipakpakitam.’—Fil. 4:23.