Pannakitunos iti Konduktortayo ti Panagadal iti Libro ti Kongregasion
1 Ti Panagadal iti Libro ti Kongregasion ket akmenna iti nasken a papel ti pannakapatanor iti abilidadtayo a kas ministro. Nairanta a napabassit dagiti grupo tapno maparegta iti nabara, kaasping ti pamilia nga atmospera a maipaay iti panagadal ti Biblia. Ti personal a pammaregta ken asikaso isudat’ sidadaan a magun-od babaen iti urnos ti panagadal iti libro. Kasanotayo a makitunos a naan-anay iti konduktor ken magunggonaan manipud iti daytoy a nagsayaat a parabor?
2 Naregta a Pannakiraman iti Tay-ak ti Ministerio: Maysa kadagiti kaskenan a rebbengen ti konduktor iti panagadal ti libro isut’ panangtulong iti tunggal maysa ti grupo a maaddaan iti naregta a pannakiraman ti ministerio. Iti daytoy a banag, ipalagip kadatayo Ti Ministeriotayo a libro iti panid 44 a “ti kinaregular, regta ken kinarayray nga ipakitana a maipaay iti tay-ak ti aramid isut’ maisarming kadagiti agibumbunannag.” Kanayon kadi a suportaranyo dagiti taripnong a maipaay iti serbisio? Ti panangaramidyo iti dayta isut’ patgen unay ti konduktor iti panagadal ti libro ken dagiti dadduma nga agibumbunannag.
3 Dagiti taripnong sakbay ti panangasaba iti tay-ak ti maiyurnos kadagiti kombeniente a lugar tapno amin ket maaddaan iti naregta a pannakiraman ti panangasaba a trabaho. Bayat nga ited ti konsiderasion iti lokal a kasasaad, tunggal grupo ti agmayat iti nasapa a panangirugi ti ministerio.
4 Kayatyo aya ti tulong iti dadduma a benneg ti ministerio? Nalabit a ti konduktor iti panagadalyo ti makaiyurnos iti makabael nga agibumbunannag a makipagtrabaho kadakayo. Iti ngudo ti bulan, siguruenyo nga ited a sisasapa iti reportyo. Agpada ti konduktor iti panagadal ti libro ken sekretario a patgenda iti pannakitunosyo met ti daytoy.—Maidilig iti Lucas 16:10.
5 No Bumisita iti Manangaywan ti Serbisio iti Grupo: Ti manangaywan iti serbisio ti masansan a bumisita iti maysa a grupo ti panagadal iti libro ti kada bulan. Timudenyo a naimbag daydiay 15-minutos a palawagna idiay ngudo ti panagadal iti libro, ta daytoy ket mangted ti masinnunuo a balakad iti grupo no kasano a maparang-ay ti nagduduma a benneg iti panangasaba a trabaho. Sigagagar met daytoy manangaywan iti serbisio a makikuyog kadagiti adda ti grupo inton ngudo iti lawas. Siguruenyo a gundawayan daytoy a naiduma a parabor tapno magunggonaankayo iti kapadasan ken abilidadna idiay tay-ak.
6 Ti personal nga ehemplo iti pannakitunos ken kinatuloktayo a tumulong kadagiti saan pay unay a nasanay ti tumulong a mamatanor iti nabara, naingayyeman nga atmospera ti Panagadal iti Libro ti Kongregasion bayat a datayo ket “agaramid iti naimbag kadagiti amin, ngem nangruna kadagiti adda relasionda kadatayo ti pammati.”—Gal. 6:10.