Ti Panagadal ti Libro iti Kongregasion Itandudona Dagiti Edukasional nga Ar-aramid
1 Ti Panagadal ti Libro iti Kongregasion alaenna ti napateg a papel iti edukasional a programa ti organisasion ni Jehova. Dagiti grupo iti panagadal ti kumbeniente ti panaglugarda. Idinto ta ti panagadal ket naglugar iti sangakaarrubaan, nalaka laeng kadagiti interesado ti tumabuno.
2 Naikagumaan a napabassit dagiti grupo. Mangipalubos daytoy iti konduktor a maitedna ti personal a tulong iti tunggal maysa. No adda marigatan a mangawat iti maysa a punto, mabalin nga ilawlawag dayta ti konduktor iti kalpasan ti adal. Mainayon pay, babaen iti bassit a grupo, ad-adu ti makakomento ken makabasa iti kasuratan. Kanayonkayo kadi nga agkomento? Pinadasyon aya ti simmungbat iti bukodyo a sasao? Bayat nga agsaganakayo, usarenyo ti pannakaawat a kumita no kasano a maiyaplikaryo a mismo dagiti puntos iti leksion.—Heb. 5:14.
3 Babaen ti panangimutektek iti metodo ti konduktor a mangisuro, maadalyo no kasano ti mangidaulo iti panagadal ti Biblia iti lalo pay a makaisuro a wagas. Kalpasan a mabasa ti parapo babaen iti kualipikado a kabsat a lalaki, malawagan dagiti saludsod. Ikagumaan ti konduktor iti panagadal nga awisen ti komento kadagiti kasuratan a tumulong kadatayo a mangawat ken mangiyaplikar. (Maidilig iti Nehemias 8:8.) No dadduma manayonanna ti ababa a komento wenno mangusar iti kanayonan a saludsod a mangiruar iti panulbek a punto. Mabalin a makatulong kadatayo ti maysa nga ilustrasion a kumita no kasano a ti leksion ket naisinggalut iti biagtayo.
4 Ti bilang iti tumabtabuno kadagiti dadduma a Panagadal ti Libro iti Kongregasion ket nababa unay. Kanayonkayo aya a tumabuno? Ti urnos iti panagadal ti libro isut’ maysa a wagas a pangidemostraan ni Jehova iti asikasona kadatayo. (1 Ped. 5:7) Kayatnatayo nga agprogreso iti sirib tapno bumilegtayo iti naespirituan. Iti sabali a bangir, kayat ni Satanas a pabuntogen iti espiritual a panagrang-aytayo tapno saantayo a nausar ken Jehova ken ti organisasionna. Dikay ipalubos a mapasamak daytoy! Ti koma nabara, naayat nga atmospera daytoy nadekket a grupo ti mangsagid iti puso ken motiboyo nga agtultuloy a mangidayaw ken Jehova.—Sal. 111:1.
5 Dagiti taripnong sakbay ti panangasaba ti masansan a maiyurnos iti lugar ti pagadalan ti libro. Ti konduktor iti panagadal ti mangsiguro nga adda umdas a teritoria ken adda mangidaulo iti tay-ak. Dagiti taripnong sakbay ti panangasaba ti agpaut iti saan a nasursurok ngem 10-15 minutos. Nalabit nga irepaso ti konduktor iti apagbiit ti inaldaw a teksto no adda singgalutna iti panangasaba nga aktibidad ken maitukon iti maysa wenno dua a singasing iti serbisio ti tay-ak wenno maiparang iti ababa a demostrasion iti agdama a tukon.
6 Ikagumaan ti konduktor ti makipagtrabaho iti tunggal maysa iti grupona, a maited ti pammaregta ken panangsanay.—Maidilig iti Marcos 3:14; Lucas 8:1.