Dagiti Manangaywan a Mangidadaulo—Dagiti Konduktor ti Panagadal iti Libro ti Kongregasion
1 Naisangsangayan a pribilehio ti panagserbi ti kualipikado a panglakayen wenno ministerial nga adipen kas konduktor ti Panagadal iti Libro ti Kongregasion. Nadagsen a responsabilidad ti mangasikaso kadagiti naespirituan a kasapulan dagidiay adda iti grupona. Nagkatlo ti annongenna.
2 Epektibo a Panangisuro: Kasapulan ti naganetget a panagsagana ti konduktor ti Panagadal iti Libro ti Kongregasion tapno linawas a makaiburay iti pannakaawat iti grupona. Gutugotenna ida a mangapresiar iti maad-adal a material. Imbes a kaaduenna unay ti agkomento kabayatan ti panagadal, no kasapulan mangpataud kadagiti kanayonan a maitutop a saludsod a mangiruar kadagiti kangrunaan a punto iti adalen. Ti karit kenkuana isu ti panamagbalin a makapainteres ken makaisuro ti panagadal ken pakiramanenna amin ida iti diskusion. Ti panggepna ket mangpabileg iti naespirituan, mangitampok iti praktikal a pateg ti adalen, ken ipaagsepna ti material iti panunot ken puso.—1 Tes. 2:13.
3 Makatulong a Panangipastor: Ti konduktor ti Panagadal iti Libro ti Kongregasyon ket “kas maysa a paglemmengan no agangin, ken maysa a paglinongan no agbagyo.” (Isa. 32:2) Pudno a maseknan iti intero a grupona ken siguraduenna a maipaay ti naespirituan a tulong no adda maup-upay iti grupona.—Ezeq. 34:15, 16; 1 Tes. 2:7, 8.
4 Naregta a Panagebanghelio: Sipapanunot ti konduktor ti Panagadal iti Libro ti Kongregasion maipapan iti panagaramid kadagiti praktikal nga urnos para iti intero a grupona tapno makiramanda a naan-anay iti tay-ak ti ministerio. Isut’ mangidaulo iti trabaho a panagebanghelio, nga ammona a ti kinaregular, regta, ken kinapingetna iti serbisio ket makita ti intero a grupo. (Col. 4:17; 2 Tes. 3:9) Kadarato, ikagumaanna a kaduaen ti kada miembro ti grupona a mangasaba. No kayattayo ti lumaing a mangasaba ken mangisuro iti ministerio, matulongannatayo ti konduktor ti Panagadal iti Libro ti Kongregasion a mangragpat iti kalattayo.—1 Tim. 4:16; 2 Tim. 4:5.
5 Pudno a naparaburantayo kadagitoy a sagut a lallaki a sisasagana a mangipaay kadatayo iti naespirituan a tulong ken naayat a suporta. (1 Tes. 5:14) Sapay koma ta ipakitatay ti apresasiontayo iti daytoy nakaskasdaaw a probision ni Jehova babaen ti regular a pannakipasettayo iti panagadal iti libro ken ti matalek a panangsuportatayo iti trabaho a panagebanghelio.—Heb. 10:25.