Panangiparang ti Naimbag a Damag—Kas Maysa a Pamilia
1 Ti maysa a dedikado a pamilia a naan-anay a makipaset iti sagrado a serbisio isut’ maysa a dayaw iti nagan ni Jehova. Maragsakantayo unay agsipud ta adu ti kakasta a pamilia a masarakan iti sidong dagiti Saksi ni Jehova iti intero a daga.
2 Siempre, ti ama isut’ addaan iti umuna a responsabilidad a mangtaming iti espiritual a kasapulan iti pamiliana. (1 Cor. 11:3) Babaen ti kooperasion iti asawana ken annakna, maipaay ti pamiliana iti nabileg nga impluensia iti dadduma. (Mat. 5:16) Ania dagiti dadduma a beddeng a masapul a maipakita iti kooperasion?
DAGITI NAGANNAK TI MANGIDAULO
3 Iti adu nga instansia, mabalin a ti ama ket maysa a panglakayen wenno ministerial nga adipen. Kaipapananana daytoy a dadduma kadagiti tiempo ken asikasona ket maipaay kadagiti bambanag iti kongregasion. Masapul a ti ama ket bingayenna a nasayaat iti tiempona tapno saanna a maliwayan iti pamiliana. Agsipud ta ti pamiliana isut’ kangrunaan a responsabilidadna, masapul a regular nga iyiskediolna ti tiempo a maikadua iti pamiliana iti panagadal, panagserbi iti tay-ak, makigimong, ken iti maiparbeng a panaglinglingay.
4 Nasken ti kooperasion manipud iti asawa a babai. Mabalinna a danggayan ti asawana babaen iti panangtulongna a mangsanay kadagiti annakda iti ministerio. Ti regta ken debosionda ti dakkel a makaimpluensia iti annakda a rumang-ay ti panangipategda iti ministerio.—2 Tim. 3:14, 15.
5 Adu iti ehemplo a dagiti agwaywayas a nagannak a naibaklayda iti espiritual a pagrebbengan ken nagballigida a nangsanay iti annakda a maipaay iti ministerio. Gapu iti ekselente a paguadan iti nanang ken tatangda, adu dagiti agtutubo a tattao ti nakapagtakder a natibker iti kinapudno.
RESPONSABILIDAD ITI ANNAK
6 Uray pay iti perpekto nga Anak ti Dios, ni Jesus, bayat ti kaubingna, isut’ nagpaituray iti direksion ken instruksion dagiti nagannakna. (Luc. 2:51) Gapuna, no ti ama ken ina ket maiyurnosda ti panagkukuyog iti ministerio, obligasion dagiti annak ti mangipakita iti nadiosan a debosion babaen ti pannakitunosda kadagiti nagannakda.—Efe. 6:1-3.
7 Ti panagdayaw a sangsangkamaysa kas maysa a pamilia isut’ mamabileg iti ayat ken panagkaykaysa ti pamilia. Dagiti nagannak ken annak ti masapul nga agdadanggay iti daytoy a responsabilidad.