Apagisu ti Oras, Umiso ti Pannakabingbingayna

NUPAY ti kalidad ti panangisurom ti masapul a kangrunaan a maipaganetget, nasken met nga asikasuem ti kapaut ti oras a panagpalawagmo. Nayeskediul dagiti espesipiko nga oras a panagrugi ken panagngudo dagiti gimongtayo. Masapul ti kooperasion dagiti amin nga addaan paset iti programa tapno maaramid daytoy.

Idi tiempo ti Biblia, ti panangmatmat dagiti tattao iti panagbiag ket naiduma iti adu a lugar itatta. Nayebkas ti oras kadagiti di masnup a termino a kas iti “agarup maikatlo nga oras” wenno “agarup maikasangapulo nga oras.” (Mat. 20:3-6; Juan 1:39) Manmano idi ti maseknan iti masnup nga oras a panangaramid kadagiti inaldaw nga aktibidad. Iti dadduma a paset ti lubong itatta, kasta met laeng ti panangmatmatda iti oras.

Nupay kasta, uray no saan a nainget dagiti tattao no maipapan iti oras gapu iti lokal a kustombre wenno personal a kayat, magunggonaantayo no sursuruentayo nga ipaayan dayta iti maitutop nga atension. No adda sumagmamano a kakabsat nga agpaset iti programa, masapul a maikkan iti atension ti oras a naituding iti tunggal paset. Ti prinsipio nga “amin a bambanag maaramid koma a sitatakneng ken sigun iti urnos” ket mayaplikar unay iti oras a naituding para kadagiti pasettayo iti gimong.​—1 Cor. 14:40.

Panangragpat iti Umiso nga Oras. Ti panagsagana isu ti tulbek. Kaaduanna, kurang ti panagsagana dagiti agpalpalawag a saan nga apagisu ti orasda. Mabalin a sobra ti kompiansada. Wenno saan, naladawda nga agsagana. Apagisu ti orasmo no apresiarem ti pasetmo ken situtulokka nga agsagana a naimbag.

Panagbasa aya ti naituding a pasetmo? Umuna, repasuem ti Adalen 4 agingga iti 7. Maipapan dagitoy iti kinaannayas, panagsarimadeng, panangigunamgunam iti nasken a sasao, ken panangipaganetget kadagiti kangrunaan nga ideya. Kalpasanna, ipakatmo dayta a balakad bayat a basbasaem a napigsa ti material a naituding kenka. Orasam ti bagim. Masapul aya a naparpartak ti panagbasam tapno malpasmo iti las-ud ti naituding nga oras? Partakam a basaen dagiti benneg a saan unay a napateg, ngem agsarisarimadengka ken ibambannayatmo ti agbasa no ipaganetgetmo dagiti napateg nga ideya. Ulit-ulitem ti agensayo. Bayat nga uman-annayas ti panagbasam, nalaklaka a kontrolen ti orasmo.

Agusarka aya kadagiti nota? Saan a masapul a detalyado unay dagiti notam​—a gistay kasla manuskrito​—​tapno masigurado nga umiso ti orasmo. Idi inikkam iti atension ti Adalen 25, adda nasursurom a nasaysayaat a wagas. Laglagipem dagitoy lima a punto: (1) Mangisaganaka iti nasayaat a material, ngem saan unay nga adu. (2) Nalawag koma iti panunotmo dagiti kangrunaan nga ideya, ngem saanmo nga ikabesa nga interamente dagiti sentensia. (3) Markaam ti balabalam no mano a minuto ti panggepmo nga usaren iti kada paset ti palawagmo wenno no mano a minuto ti mabusbos no madanonmo dagiti dadduma a punto. (4) Iti panagsaganam, amirisem no aniada a detalye ti mabalin nga ikkaten no makitam a masobraam ti orasmo. (5) Ensayuem ti panagpalawagmo.

Nasken ti panagensayo. Iti panagensayom, siputam ti oras ti tunggal benneg ti palawagmo. Ulit-ulitem nga ensayuen ti palawagmo agingga a malpas ti intero a palawagmo iti naituding nga oras. Dika mangiserrek iti adu unay a material. Mangiwayaka iti sumagmamano a minuto ta ti panagpalawagmo iti sanguanan ti tallaong ket mabalin a napapaut bassit ngem no agen-ensayoka a bukodmo.

Panangbingbingay Kadagiti Benneg. Nainaig unay ti umiso nga oras iti umiso a panangbingbingay kadagiti benneg ti palawag. Rumbeng nga ad-adu a tiempo ti mausar iti bagi ti palawag a naglaon kadagiti kangrunaan a punto. Ti kapaut ti introduksion ket umdas laeng koma a mangibanag iti tallo a panggep a nasalaysay iti Adalen 38. Saan koma a nakaat-atiddog ti bagi ti palawag nga uray la awanen ti mabati a tiempo para iti epektibo a konklusion, maitunos iti Adalen 39.

No ikagumaam ti agpalawag iti las-ud ti naituding nga oras, nasaysayaat ti panagpalawagmo ken ipakpakitam ti panagraem kadagiti dadduma nga addaan paset iti programa agraman iti intero a kongregasion.