Panangisagana Kadagiti Palawag iti Kongregasion

NAISAGANA ti programa ti Teokratiko nga Eskuelaan ti Panagministro tapno magunggonaan ti intero a kongregasion. Maidatag met dagiti napateg nga impormasion kadagiti dadduma a gimong ti kongregasion agraman kadagiti asamblea ken kombension. No natudinganka nga agpaset iti maysa kadagitoy a programa, naikkanka iti nadagsen a responsabilidad. Indagadag ni apostol Pablo iti Kristiano a manangaywan a ni Timoteo a patinayon nga asikasuenna ti pannursurona. (1 Tim. 4:16) Dagidiay adda kadagiti Nakristianuan a gimong nangilatangda iti napateg a tiempo​—ket kasta unay ti panangikagumaan dagiti dadduma​—tapno makatabunoda ken makasursuroda kadagiti banag a mainaig iti relasionda iti Dios. Pudno a dakkel a pribilehio ti mangted iti kasta nga instruksion! Kasano a matamingmo a naimbag dayta?

Dagiti Tampok iti Panagbasa iti Biblia

Daytoy a paset ti eskuelaan ket naibasar iti linawas a panagbasa iti Biblia. Maigunamgunam koma no kasano a ti material apektarannatayo itatta. Kas naipadamag iti Nehemias 8:8, nagbasa iti publiko da Esdras ken dagiti kakaduana manipud iti Sao ti Dios, nga inlawlawagda dayta, ‘impaayanda iti kaipapanan,’ ken impaawatda. Ti panangiparangmo kadagiti tampok iti panagbasa iti Biblia ikkannaka met iti gundaway a mangaramid iti kasta.

Kasanom nga isagana ti kasta a paset? No mabalbalin, basaem a nasaksakbay iti makalawas wenno nasursurok pay ti naituding a benneg ti Biblia. Kalpasanna, panunotem ti kongregasion a nakaitimpuyogam ken dagiti kasapulan daytoy. Ikararagmo dayta. Aniada a balakad, ulidan, prinsipio iti daytoy a benneg ti Sao ti Dios ti agkalikagum kadagita a kasapulan?

Nasken ti panagsukimat. Addaanka kadi iti indese Ti Pagwanawanan iti kada ngudo ti tawen? No adda, usarem a nalaing. No sukimatem dagiti naipablaaken maipapan kadagiti bersikulo a pinilim, mabalin a makasarakka kadagiti makaited-lawag a material, mangilawlawag iti kaitungpalan dagiti padto, manganalisar iti ipalgak dagiti teksto maipapan ken Jehova, wenno mangisalaysay kadagiti prinsipio. Saanka a mangsaklaw iti adu unay a punto. Ipamaysam kadagiti sumagmamano laeng a napili a bersikulo. Nasaysayaat no manmano ti saklawem a bersikulo ket saysayaatem a saklawen ida.

Mabalin a ramanen met ti pasetmo ti panangawis kadagiti agdengdengngeg nga agkomento no kasano a nagunggonaanda iti nabasada iti Biblia iti naituding a lawas. Ania ti nabasada a makatulong kadakuada iti personal ken sangapamiliaan a panagadalda wenno iti ministerioda wenno iti wagas ti panagbiagda? Ania dagiti naiparangarang a galad ni Jehova no iti pannakilangenna kadagiti tattao ken nasnasion? Ania ti naadal dagiti agdengdengngeg a nangpabileg iti pammatida ken nangparayray iti panangipategda ken Jehova? Dika agbayag kadagiti detalyado ken komplikado a punto. Ipaganetgetmo ti kaipapanan ken praktikal a pateg dagiti punto a pinilim.

Mangisuro a Palawag

Naibasar daytoy iti naipablaak a material, kas iti artikulo iti Ti Pagwanawanan wenno Agriingkayo! wenno nalabit a paset ti maysa a libro. Kaaduanna, adu unay ti material para iti naikeddeng nga oras. Kasanom a tamingen ti pasetmo? Kas mannursuro, saan a basta saklawem ti material. Ti manangaywan masapul a “kualipikado a mangisuro.”​—1 Tim. 3:2.

Irugim ti agsagana babaen ti panangadalmo iti naituding a material. Basaem dagiti kasuratan. Agmennamennaka. Ikagumaam nga aramiden dayta a nasapa sakbay a dumteng ti aldaw a panagpalawagmo. Laglagipem a naparegta dagiti kakabsat a mangbasa nga antemano iti naipablaak nga artikulo a nakaibasaran ti palawagmo. Ti pasetmo ket saan a basta panangrepaso wenno pananggupgop iti material, no di ket tapno ipakitam no kasano nga iyaplikar dayta. Usarem dagiti maikanatad a benneg ti material a pudpudno a makagunggona iti kongregasion.

No kasano nga addaan ti tunggal ubing iti bukodna a personalidad, addaan met ti tunggal kongregasion kadagiti nagpaiduma a galad. Ti ama wenno ina nga epektibo ti panangisurona saan a basta isermonna dagiti moral a pagalagadan iti anakna. Makirinnason iti anakna. Silalagip iti personalidad ken kadagiti parikut ti anakna. Umasping iti dayta, dagiti mannursuro iti kongregasion ikagumaanda a tarusan ken tamingen dagiti kasapulan ti grupo a pagpalawaganda. Ngem ti mannakatarus a mannursuro liklikanna ti mangusar kadagiti pagarigan a mangpabain iti asinoman nga agdengdengngeg. Ipakitana dagiti pagimbagan a masagsagrap kas resulta ti pannagna iti dalan ni Jehova ken itampokna dagiti balakad a naibatay iti Kasuratan a tumulong iti kongregasion a mangrisut a sibaballigi kadagiti parikut a sarsarangtenda.

Ti umiso a panangisuro gutugotenna ti puso dagiti agdengdengngeg. Saan laeng a basta panangibaga kadagiti impormasion ti kalikaguman daytoy no di ket ti panangpatanor pay iti apresasion iti kaipapanan dagita. Kalikagumanna ti napudno a pannakaseknan kadagidiay mabalbalakadan. Dagiti naespirituan a pastor rumbeng a kabesadoda ti arban. No siaayat a panunotenda dagiti problema a sangsanguen ti nagduduma a kameng ti kongregasion, kabaelandanto ti agsao a buyogen ti pammaregta, nga ipakitada ti pannakaawat, pannakaseknan, ken empatia.

Kas pagaammo dagiti epektibo a mannursuro, ti palawag ket masapul nga addaan iti nalawag ken masnup a panggep. Maidatag koma ti material iti wagas nga agminar ken matandaanan dagiti kangrunaan a punto. Matandaanan koma dagiti nagdengngeg dagiti praktikal a kababagas ti palawag a mangapektar iti biagda.

Gimong ti Serbisio

No ti palawagmo ket naibasar iti Ti Ministeriotayo iti Pagarian, medio naiduma ti pannakataming dayta. Iti dayta a paset, masansan a nasken nga iyallatiwmo a naan-anay kadagiti agdengdengngeg ti linaon ti artikulo, a saan ket a piliem laeng no ania ti maikanatad a punto. Tulongam dagiti agdengdengngeg a mangutob kadagiti kasuratan a nakaibasaran ti naited a balakad. (Tito 1:9) Limitado ti oras, a kaaduanna ket awan tiempo para iti kanayonan a material.

Iti sabali a bangir, nalabit matudinganka a mangipalawag iti material nga awan ti nakaibatayanna nga artikulo iti Ti Ministeriotayo iti Pagarian. Mabalin nga artikulo ti Pagwanawanan ti reperensia, wenno sumagmamano la nga ababa nga impormasion ti pasetmo. Kas mannursuro, adda kenka a mangpanunot kadagiti kasapulan ti kongregasion a nainaig iti naituding a material. Mabalin a mangusarka iti ababa, nalawag nga ilustrasion wenno mangisalaysayka iti maitutop a kapadasan. Laglagipem a ti pasetmo ket saan a basta mangipalawag iti suheto no di ket idatagmo tapno matulongan ti kongregasion a mangitungpal ken mangtagiragsak iti trabaho nga impabaklay ti Sao ti Dios.​—Ara. 20:20, 21.

Bayat nga isaganam ti pasetmo, panunotem dagiti kasasaad dagiti kameng ti kongregasion. Komendaram ida gapu kadagiti agdama nga ar-aramidenda. Kasano a maparang-ay ti kinaepektibo ken maparayray ti rag-oda iti ministerio no ipakatda dagiti singasing a naipaay iti naituding a material?

Kalikaguman kadi ti pasetmo ti demostrasion wenno interbiu? No wen, maiplano koma a nasaksakbay. Kasla naglaka nga ibaga lattan iti maysa a kabsat a makaammon a mangyurnos iti dayta, ngem saan a kanayon a nasayaat ti resultana. No mabalbalin, ensayuenyo ti demostrasion wenno interbiu sakbay ti aldaw ti gimong. Siguraduem a maiparang daytoy a benneg ti pasetmo iti wagas a talaga a mayallatiw a naimbag ti naited nga instruksion.

Dagiti Asamblea ken Kombension

Dagiti kakabsat a lallaki a makapatanor kadagiti nasayaat a naespirituan a kualidad ken agbalin nga epektibo a pumapalawag iti publiko ken mannursuro ket mabalin a maikkan inton agangay iti paset iti programa ti asamblea wenno kombension. Pudno a naisangsangayan nga okasion dagitoy para iti teokratiko nga edukasion. Ti kasta a paset ket mabalin a maysa a manuskrito, balabala, instruksion para iti drama a naibatay iti Biblia nga addaan moderno nga aplikasion, wenno parapo a naglaon kadagiti instruksion. No maikkanka iti pribilehio iti kasta a programa, siaannad nga adalem ti material a naited kenka. Anagem dayta agingga a maapresiarmo ti pategna.

Kadagidiay matudingan iti palawag a manuskrito, rumbeng a basaenda ti material a sao por sao. Dida baliwan ti sao wenno ti urnos ti pannakaisaona. Adalenda tapno mailasinda a sibabatad no ania dagiti kangrunaan a punto ken no kasano ti pannakabukelda. Ensayuenda a basaen a sipipigsa agingga a maipalawagda a buyogen ti maitutop a panangigunamgunam iti nasken a sasao, entusiasmo, kinabara, addaan rikna, kinapasnek, ken kombiksion, agraman ti kapigsa ti timek ken kinaganetget a maibagay iti dakkel a tallaong.

Kadagiti kakabsat a naikkan iti balabala, nasken a buklenda ti palawagda iti wagas a masurot a naimbag ti balabala. Imbes a basaen ti agpalawag ti adda iti balabala bayat nga agpalpalawag wenno imanuskritona, idatagna koma ti material iti ekstemporanio a pamay-an, manipud iti puso. Nasken a surotenna ti oras a naipakita iti balabala tapno maidatagna a silalawag ti tunggal kangrunaan a punto. Siuumiso nga usaren koma ti agpalawag dagiti kapanunotan ken kasuratan a nailista iti baba dagiti kangrunaan a punto. Di rumbeng a mangiserrek kadagiti kanayonan a punto a magustuanna di la ket ta maipuera daydiay adda iti balabala. Siempre, ti Sao ti Dios ti nakaibatayan ti instruksion. Responsabilidad dagiti Kristiano a panglakayen nga ‘ikasaba ti sao.’ (2 Tim. 4:1, 2) Isu a ti agpalawag rumbeng nga ipangrunana nga ikkan iti atension dagiti kasuratan iti balabala​—nga ilawlawagna a naimbag ken no kasano a mayaplikar dagitoy.

Dimo Itungtungkua

Agserserbika aya iti kongregasion nga adu ti gundawaymo a makapagpalawag? Kasano a maasikasom a naimbag amin dagita a paset? Liklikam ti naladaw a panagsagana.

Tapno talaga a makagunggona dagiti palawag iti kongregasion, kasapulan ti umdas a panagsagana. Ngarud, iyugalim a basaen a dagus ti material apaman a maawatmo ti pasetmo. Ikkannaka daytoy iti gundaway a mangutob iti dayta bayat nga adda sabali nga ar-aramidem. Kadagiti aldaw wenno lawlawas sakbay nga agpalawagka, mabalin a makangngegka kadagiti komento a tumulong kenka tapno nasaysayaat ti panangyaplikarmo iti impormasion. Mabalin a rumsua dagiti situasion nga apagpagisu ti pannakaitiempona. Adu a panawen ti masapul iti panangbasa ken panangpampanunot iti pasetmo apaman a maawatmo dayta, ngem saan a masayang ti mausar a tiempo. Inton agtugawkan tapno buklem ti palawagmo a naibatay iti balabala, dakkelto ti maitulong kenka ti nasaksakbay a panangutobmo iti dayta. No kastoy ti panangtamingmo kadagiti naituding a pasetmo, saankanto unay a madanagan ket maidatagmo ti material iti praktikal a pamay-an ken dumanon iti puso dagiti kameng ti kongregasion.

No apresiarem unay ti sagut a naitalek kenka a nainaig iti programa ni Jehova a mangisuro iti ilina, maidaydayawmo ni Jehova ken magunggonaan dagidiay mangay-ayat kenkuana.​—Isa. 54:13; Roma 12:6-8.