Panangusar iti Naituding a Material

ITI Biblia, nayarig ti kongregasion Kristiano iti bagi ti tao. Nasken ti tunggal paset, ngem “saanda nga agpapada amin iti pakausaran.” Maitunos iti dayta, masapul nga asikasuentayo ti aniaman a pribilehio a naitalek kadatayo. Kalikaguman daytoy a tarusan ken tamingentayo a nalaing ti aniaman a palawag a naituding kadatayo, imbes a tagibassitentayo ti kinapateg ti dadduma a topiko gapu ta ipapantayo nga ad-adda a makapainteres dagiti sabali a topiko. (Roma 12:4-8) Responsabilidad ti klase matalek ken masirib nga adipen nga ipaay ti naespirituan a taraon “iti umiso a tiempo.” (Mat. 24:45) No usarentayo dagiti personal nga abilidadtayo a mangbukel kadagiti palawag sigun kadagiti instruksion a maaw-awattayo, ipakpakitatayo ti panangapresiar iti dayta nga urnos. Tumulong daytoy iti naannayas a panagandar ti kongregasion.

No Ania ti Iraman. No adda naituding kenka a topiko iti eskuelaan, siguraduem a buklen dayta a topiko a saan ket a ti sabali. Kaaduanna, maited ti espesipiko a material a reperensiam. No awan ti naibaga kenka a naipablaak a material nga usarem a pangibasaran iti palawagmo, mabalinmo ti agala iti material kadagiti pinilim a publikasion. Nupay kasta, iti panangisaganam iti palawagmo, siguraduem a naisentro iti naituding a topiko ti intero a presentasionmo. Iti panangikeddeng no ania ti iramanmo, masapul met nga ikonsiderarmo dagiti agdengngeg kenka.

Adalem a naimbag ti material a reperensiam, nga anagem dagiti kasuratan nga adda iti dayta. Kalpasanna, panunotem no kasano ti kasayaatan a panangusarmo iti dayta a pakagunggonaan dagiti agdengngeg. Mangpilika iti dua wenno nalabit tallo a punto iti naipablaak a material nga usarem a kas kangrunaan a punto iti palawagmo. Kasta met, pumilika manipud iti naituding a material kadagiti kasuratan a panggepmo a basaen ken ilawlawag.

Kasano kawadwad ti material a saklawem? Daydiay laeng kabaelam nga ipalawag a sieepektibo. Dimo isakripisio ti nasayaat a panangisuro gapu laeng ta kayatmo nga iserrek ti nakaad-adu nga impormasion. No ti dadduma a material ket di maikanatad iti panggep ti palawagmo, ipamaysam kadagiti paset a tumulong a mangibanag iti dayta a panggep. Iti naituding a material, usarem daydiay makaisuro ken makagunggona unay kadagiti agdengngeg. Ti panggepmo iti daytoy a punto a pakabalakadan ket, saan a ti kawadwad ti masaklawmo, no di ket ti panangusarmo iti naituding a material a pangibasaran iti palawagmo.

Saan a nairanta ti palawagmo a basta pananggupgop iti naituding a material. Masapul nga adda dagiti punto a panggepmo nga ilawlawag, palawaen, iyilustrar, ken nalabit mangtedka iti pagarigan ti aplikasionda. Mausar koma dagiti kanayonan nga ideya a mangbukel kadagiti napateg a punto iti naituding a materialmo imbes a mangsukat iti dayta a material.

Dagiti kakabsat a lallaki nga addaan kadagiti kasapulan a kualipikasion kas mannursuro ket mabalin a maawisda inton agangay a mangted iti instruksion iti Gimong ti Serbisio. Maawatanda a nasken ti epektibo a panangusar iti naituding a material imbes a sukatanda dayta iti sabali. Kasta met, dagiti kakabsat a mangipaay iti palawag publiko maikkanda kadagiti balabala a surotenda. Mabalin nga ibagaybagay dagitoy, ngem sibabatad nga ipakitada dagiti kangrunaan a punto a mailawlawag, dagiti mausar a mangsuporta nga argumento, ken dagiti kasuratan a maaramat a pundasion ti palawag. Ti panagsursuro no kasano nga usaren ti naituding a material a kas pangibasaran ket napateg a paset ti panagsagana para iti dadduma pay a pribilehio a panagpalawag.

Ti kastoy a panagsanay matulongannaka met a mangikondukta kadagiti progresibo a panagadal iti Biblia iti pagtaengan. Masursurom nga ipamaysa ti atension iti material a maadal imbes nga umadayo iti topiko babaen ti panangitampok kadagiti sabali a banag a nalabit makapainteres ngem saan a nasken iti pannakatarus iti dayta a topiko. Ngem no maawatam ti punto daytoy a leksion, saanka nga agbalin a nainget unay di la ket ta maliwayam ti mangipaay iti kanayonan a panangilawlawag a nalabit kasapulan ti iyad-adalam.