Panangitampok Kadagiti Kangrunaan a Punto

ANIA dagiti kangrunaan a punto ti palawag? Saan a basta makapainteres a punto dagitoy nga apagbiit laeng a madakamat. Napapateg dagitoy nga ideya a masapul a masalaysay a naimbag. Dagitoy dagiti nasken nga ideya tapno maibanag ti panggepmo.

Tapno maitampok dagiti kangrunaan a punto, nasken a piliem ken organisarem a naimbag ti materialmo. Iti panagsukimat para iti palawag, masansan nga ad-adu ti impormasion a magun-od ngem ti mausar. Kasano a maikeddengmo no aniada nga impormasion ti usarem?

Umuna, ikonsiderarmo dagiti agdengngeg kenka. Adu aya kadakuada ti di makaammo iti topikom, wenno pagaammodan dayta? Umanamong aya ti kaaduan kadakuada iti ibagbaga ti Biblia maipapan iti dayta, wenno agduadua dagiti dadduma? Ania dagiti karit a pakaipasanguanda iti inaldaw a panagbiag no ikagumaanda nga iyaplikar ti kuna ti Biblia maipapan iti dayta a topiko? Maikadua, siguraduem a nalawag iti panunotmo no ania ti panggepmo a mangipalawag iti topiko a planom nga usaren. Babaen dagita a dua a giya, tingitingem ti material ket daydiay laeng talaga a maitutop ti usarem.

No naikkanka iti pagibasaran a balabala nga addaan iti tema ken kadagiti kangrunaan a punto, masapul a surotem dayta. Nupay kasta, ad-adda a maitampok ti pateg ti ipalawagmo no laglagipem dagiti nadakamat a punto bayat a bukbuklem ti tunggal kangrunaan a punto. No awan naited kenka a balabala, sika ti mangpili kadagiti kangrunaan a punto.

No nalawag iti panunotmo dagiti kangrunaan a punto ken naorganisarmon dagiti detalye a saklawen dagita a punto, nalaklaka nga ipalawag dagita. Mabalin nga ad-adda a magunggonaan met dagiti agdengngeg kenka.

Nadumaduma a Wagas a Panangorganisar iti Materialmo. Adda nadumaduma a pamay-an a mabalinmo a suroten no organisarem ti palawagmo. No masursurom dagitoy, matakuatam nga epektibo ti sumagmamano kadagita, depende iti panggepmo.

Ti pamay-an nga adu ti pakausaranna isu ti panangbingaybingay kadagiti topiko. (Kasapulan ti tunggal kangrunaan a punto agsipud ta nayonanna ti pannakaawat dagiti agdengdengngeg iti topiko wenno tumulong a mangibanag iti panggep ti palawagmo.) Ti sabali pay a pamay-an isu ti kronolohikal. (Kas pagarigan, dagiti pasamak sakbay ti Layus ket mabalin a sarunuen dagiti pasamak sakbay ti pannakadadael ti Jerusalem idi 70 K.P., ket kalpasanna, sarunuen dagiti pasamak iti mismo a kaaldawantayo.) Ti maikatlo a pamay-an isu ti panangusar iti makagapu ken epekto. (Mabalin a buklen ti palawag a mangrugi iti uray ania kadagita a dua. Kas pagarigan, mabalinmo nga irugi iti maysa nga agdama a situasion, nga isu ti epekto, ket kalpasanna ipakitam ti makagapu.) Ti maikapat a pamay-an isu ti panamaggidiat. (Mabalin a paggidiatem ti naimbag ken dakes wenno ti positibo ken negatibo.) No dadduma, saan la a maymaysa a pamay-an ti mausar iti maysa a palawag.

Idi di nainkalintegan a napabasol iti saklang ti Sanhedrin dagiti Judio, nangipaay ni Esteban iti nabileg a palawag a nagusar iti kronolohikal a pamay-an. Bayat a basaem dayta iti Aramid 7:2-53, mapaliiwmo a nairanta dagiti pinilina a punto. Imbatad nga umuna ni Esteban nga isalsalaysayna ti historia a di mailibak dagiti agdengdengngeg kenkuana. Kalpasanna, inlawlawagna a nupay ni Jose ket linaksid dagiti kakabsatna, isu ti inusar ti Dios a mangisalakan. Insarunona nga impakita a sinukir dagiti Judio ni Moises, nga us-usaren idi ti Dios. Inngudona ti palawagna babaen ti panangipaganetgetna a ti kababalin nga imparangarang dagiti immun-una a kaputotan dagiti Judio ket isu met laeng ti impakita dagidiay nangisungsong iti ipapatay ni Jesu-Kristo.

Dika Agusar iti Adu Unay a Kangrunaan a Punto. Sumagmamano laeng ti kasapulan iti panangbukel iti aniaman a tema. Kaaduanna, mabilangmo dagitoy kadagiti ramaymo. Pudno daytoy uray no agpalawagka iti 5 a minuto, 10 a minuto, 30 a minuto, wenno napapaut pay. Dimo itampok ti adu unay a punto. Sumagmamano laeng a nagduduma nga ideya ti kabaelan a tiliwen dagiti agdengngeg iti maysa a palawag. Ket no at-atiddog ti palawag, nasaysayaat ti pannakaipaganetget ken nalawlawag koma ti pannakaidatag dagiti kangrunaan a punto.

Uray mano dagiti kangrunaan a punto nga usarem, siguraduem nga umdas ti pannakasalaysay ti tunggal punto. Ikkam dagiti agdengdengngeg iti umdas a tiempo a mangusig iti tunggal kangrunaan a punto tapno maimula a naimbag dayta iti panunotda.

Agparang a simple koma ti palawagmo. Saan a kanayon nga agpannuray daytoy iti kawadwad ti material a maidatag. No nalawag ti pannakagrupo dagiti ideyam iti babaen ti sumagmamano laeng a kangrunaan a paulo ken saggaysaem nga ilawlawag dagitoy, nalaka a suroten ti palawag ken narigat a malipatan.

Itampokmo Dagiti Kangrunaan a Punto. No umiso ti pannakaorganisar ti materialmo, saan a narigat nga ipaganetget ti pateg dagiti kangrunaan a punto babaen ti panagpalawagmo.

Ti kangrunaan a pamay-an ti panangitampok iti kangrunaan a punto isu ti panangidatag kadagiti pammaneknek, kasuratan, ken dadduma pay a material iti wagas nga ipamaysa dagitoy ti atension iti kangrunaan nga ideya ken pagminarenda dayta. Amin a segundario a punto ket rumbeng a manglawlawag, mangpaneknek, wenno mamagminar iti kangrunaan a punto. Saanka a manginayon kadagiti ideya nga awan pakainaiganda gapu laeng ta makapainteres dagitoy. No idatagmo dagiti segundario a punto, ibatadmo ti pakainaiganda iti kangrunaan a punto a supsuportaranda. Saanmo a bay-an dagiti agdengdengngeg a makaammo a mangtarus no kasano a nainaig dagita. Maipakitam no ania ti pakainaigan dagita a punto babaen ti panangulit iti kangrunaan a sasao a mangibuksil iti kangrunaan nga ideya wenno babaen ti sagpaminsan a panangulit iti kababagas ti mismo a kangrunaan a punto.

Dagiti dadduma a pumapalawag itampokda dagiti kangrunaan a punto babaen ti panangnumeroda kadagita. Nupay maysa dayta a wagas ti panangitampok kadagiti kangrunaan a punto, saan koma a daytoy ti mangsandi iti naannad a panangpili ken lohikal a panangbukel iti mismo a material.

Mabalin a kayatmo a dakamaten laeng a dagus ti kangrunaan a puntom sakbay nga idatagmo dagiti mangsuporta nga argumento. Daytoy ti tumulong kadagiti dumdumngeg a mangapresiar iti pateg dagiti sumaganad nga idatagmo, ken ipaganetgetna pay ti kangrunaan a punto. Mabalinmo nga ipaganetget ti punto babaen ti panangsumaria iti dayta kalpasan a nailawlawag a naan-anay.

Iti Tay-ak ti Ministerio. Saan laeng a kadagiti pormal a diskurso ti pakayaplikaran dagiti prinsipio a nasalaysay ditoy no di pay ket iti pannakisaritam kadagiti tattao iti tay-ak ti ministerio. No agsagsaganaka, ikonsiderarmo ti aniaman a kangrunaan a pakaseknan dagiti tattao iti teritoriayo. Mangpilika iti tema a mangted kenka iti gundaway a mangipakita no kasano a ti namnama nga ipaay ti Biblia risutenna dayta a kasasaad. Mangpilika iti nalabit dua a kangrunaan a punto a mangbukel iti dayta a tema. Ikeddengmo no ania dagiti kasuratan nga usarem a mangsuporta kadagita a punto. Kalpasanna, iplanom no kasanom nga irugi ti saritaan. Ti kasta a panagsagana ti tumulong kenka a makibagay kadagiti tattao a makasaritam. Tulongannaka met a mangdakamat iti banag a malaglagipto dagiti bumalay.