ADALEN 14

Ipaganetget Dagiti Kangrunaan a Punto

Hebreo 8:1

SUMARIO: Tulongam ti agdengdengngeg a makasurot iti palawagmo, ken pagbalinem a nalawag ti koneksion ti tunggal kangrunaan a punto iti panggep ken temam.

TI ARAMIDEM:

Maaddaan iti panggep. Ammuem no ti panggep ti palawagmo ket mangpakaammo, mangkombinsir, wenno mangtignay kadagiti agdengdengngeg, sa itunosmo iti dayta ti palawagmo. Siguraduem nga usaren ti amin a kangrunaan a punto tapno maaramidam ti panggepmo.

Isaludsodmo iti bagim: ‘Ania ngata dagiti saludsod wenno di anamongan dagiti agdengdengngeg iti daytoy a topiko? Ania ti lohikal a panagsasaruno dagiti saludsodda wenno dagiti saanda nga anamongan?’ Sa urnosem dagiti puntom iti kasta a panagsasaruno tapno masurotan, maawatan, ken akseptaren dagiti agdengdengngeg ti ibagam nga impormasion.
Ipaganetgetmo ti tema ti palawagmo. Dakamatem ti temam iti intero a palawagmo babaen ti panangulitmo kadagiti kangrunaan a sasao iti tema wenno babaen ti panagusarmo iti umasping a sasao.
Pagbalinem a nalawag ken simple dagiti kangrunaan a punto. Piliem dagiti kangrunaan a punto a konektado iti temam ken maisurom a naimbag iti naikeddeng nga oras. Limitaram dagiti kangrunaan a punto, silalawag nga ibagam ti tunggal punto, sumardeng biit sakbay ti sabali a punto, ken siaannayas a mapanka iti sumaruno a kangrunaan a punto.

Mabalin a dakamatem dagiti kangrunaan a punto iti introduksionmo tapno makasurot dagiti agdengdengngeg wenno ulitem dagita iti konklusionmo tapno malagipda.