No Apay a Saantayo Koma nga Agulbod

KINUNA ti maysa a balasitang iti nanangna: “Wen, agawidakto a dagus kalpasan ti klase.” Ngem saan met a nagawid no di ket nakiay-ayam pay laeng kadagiti gagayyemna ket kalpasanna imbagana ken ni nanangna: “Pinagbatinak ti maestrak kalpasan ti klase.” Umiso kadi nga ibaga ti kasta?—

Wenno kunaen ti maysa a barito ken ni tatangna: “Saanko a kinugtaran ti bola ditoy balay.” Ngem ania ngay no talaga a kinugtaranna? Dakes kadi nga ibagana a dina kinugtaran?—

Impakita kadatayo ti Naindaklan a Mannursuro no ania ti umiso nga aramidentayo. Kinunana: ‘Ti koma saoyo a Wen kaipapananna ti Wen, ti saoyo a Saan, Saan; ta ti aniaman a surokna ket nagtaud iti daydiay nadangkes.’ (Mateo 5:37) Ania ti kayat a sawen ni Jesus?— Kayatna a sawen a no ania ti imbagatayo, aramidentayo.

Adda estoria iti Biblia a mangipakita no kasano kapateg ti panagsao iti pudno. Maipapan dayta iti dua a tao a nagkuna nga adalan ida ni Jesus. Kitaenta ti napasamak.

Nasurok a makabulan kalpasan ti ipapatay ni Jesus, adu a tattao manipud kadagiti adayo a lugar ti napan idiay Jerusalem gapu iti napateg a piesta dagiti Judio a maawagan iti Pentecostes. Nangipaay ni apostol Pedro iti naisangsangayan a palawag maipapan ken ni Jesus, a pinagungar ni Jehova. Daytoy ti kaunaan a gundaway nga adu kadagidiay napan idiay Jerusalem ti nakangngeg maipapan ken Jesus. Ita, kayatda a maammuan ti ad-adu pay. Gapuna, ania ti inaramidda?

Nagtalinaedda sadiay iti nabaybayag ngem iti ninamnamada. Ngem di nagbayag, naibusan iti kuarta ti dadduma kadakuada ket kasapulanda ti tulong tapno makagatangda iti taraon. Kayat dagiti adalan idiay Jerusalem ti tumulong kadagiti bisita. Gapuna, adu kadakuada ti nangilako kadagiti sanikuada sada impan ti kuarta kadagiti apostol ni Jesus. Kalpasanna, dagiti apostol ti mangted iti kuarta kadagidiay agkasapulan.

Ni Ananias ken ni Safira nga asawana ket kameng ti kongregasion Kristiano idiay Jerusalem. Nangilakoda iti talonda. Awan ti nangbilin kadakuada nga ilakoda dayta. Isuda a mismo ti nangikeddeng nga ilakoda. Ngem inaramidda dayta saan a gapu ta ay-ayatenda dagiti baro nga adalan ni Jesus. Kinapudnona, kayat da Ananias ken Safira a pagparangen a nakasaysayaatda. Gapuna, inkeddengda nga ibaga nga itedda amin ti kuarta a pangtulong kadagiti sabsabali. Kinapudnona, ti laeng dadduma a naglakuanda ti itedda ngem ibagada nga itedda amin. Ania ti makunam maipapan iti dayta?—

Napan ngarud ni Ananias kadagiti apostol. Intedna kadakuada ti kuarta. Siempre, ammo ti Dios a saanna nga inted amin. Gapuna, impalgak ti Dios ken ni apostol Pedro a saan a napudno ni Ananias.

Kalpasanna kuna ni Pedro: ‘Ananias, apay nga impalubosmo a tignayennaka ni Satanas a mangaramid iti kastoy? Kukuam ti talon. Saanmo koma a kasapulan nga ilako dayta. Ken uray no nailakomon ti talon, sika ti mangikeddeng no ania ti aramidem iti kuarta. Ngem apay a pagparangem nga itedmo amin ti kuarta idinto ta dadduma laeng iti dayta ti intedmo? Gapuna agul-ulbodka, saan laeng a kadakami, no di ket iti Dios.’

Nadagsen unay dayta. Agul-ulbod ni Ananias! Saan nga agsasao iti pudno. Pagparparangenna laeng a pudno ti ibagbagana. Ibaga kadatayo ti Biblia no ania ti simmaruno a napasamak. Kunana: ‘Idi mangngegna ti sasao ni Pedro, napasag ni Ananias ket natay.’ Pinatay ti Dios ni Ananias! Kalpasanna, inruarda ti bangkayna ket intabonda.

Kalpasan ti agarup tallo nga oras, simrek ni Safira. Saanna nga ammo ti napasamak iti asawana. Gapuna, dinamag ni Pedro kenkuana: ‘Inlakoyo kadi a dua ti talon iti gatad nga intedyo kadakami?’

Simmungbat ni Safira: ‘Wen, inlakomi ti talon iti kasta laeng a gatad.’ Ngem saan a pudno dayta! Indulinda ti dadduma a naglakuanda iti talon. Gapuna, ti Dios pinapatayna met ni Safira.​—Aramid 5:​1-​11.

Ania ti masursurotayo koma iti napasamak kada Ananias ken Safira?— Naammuantayo a saan a kayat ti Dios dagiti managulbod. Kayatna a kanayon nga agsaotayo iti pudno. Ngem adu a tattao ti agkuna a saan a dakes ti agulbod. Panagkunam umiso ngata dagita a tattao?— Ammom kadi nga amin a sakit, rigat, ken ipapatay ditoy daga ket maigapu iti panagulbod?—

Laglagipem nga inulbodan ti Diablo ti immuna a babai, a ni Eva. Imbagana kenkuana a saan a matay ni Eva no agsukir iti Dios ken mangan iti prutas nga imparit ti Dios. Namati ni Eva iti Diablo ket nangan iti prutas. Inallukoyna met ni Adan a mangan. Nagbasolda gapu iti dayta, ken nayanak a managbasol dagiti amin nga annakda. Ket gapu ta managbasolda, agsagaba ken matay dagiti amin nga annak ni Adan. Kasano a timmaud dagitoy a parikut?— Gapu iti panagulbod.

Di pakasdaawan a kinuna ni Jesus a ti Diablo ket “managulbod ken ti ama ti kinaulbod”! Isu ti kaunaan a nagulbod. No adda asinoman nga agul-ulbod, ar-aramidenna ti immuna nga inaramid ti Diablo. Laglagipentayo koma daytoy no masulsulisogtayo nga agulbod.​—Juan 8:44.

Kaano a mabalin a masulisogka nga agulbod?— Saan aya a no adda dakes nga inaramidmo?— Nupay saanmo nga igagara, mabalin a madadaelmo ti maysa a banag. No damagenda dayta kenka, rumbeng kadi nga ibagam a ti kabsatmo ti nangdadael? Wenno rumbeng kadi a pagparangem a kasla dimo ammo ti napasamak?—

Ania ngay no adda homework a masapul nga aramidem ngem saanmo a naileppas? Rumbeng kadi nga ibagam a naileppasmo, uray saan met?— Laglagipentayo koma da Ananias ken Safira. Saanda nga imbaga ti agpayso. Ket impakita ti Dios no kasano kadakes dayta babaen ti panangpapatayna kadakuada.

No kasta, aniaman ti aramidentayo, kanayon a dakdakes ti ibungana no agulbodtayo. Saantayo koma nga agulbod uray bassit laeng. Kuna ti Biblia: “Sawenyo ti kinapudno.” Kunana pay: “Dikay pagulbodan ti maysa ken maysa.” Kanayon nga agsasao ni Jehova iti pudno, ket inanamaenna a kastatayo met koma.​—Efeso 4:​25; Colosas 3:9.