SAFIRA

[manipud Aramaiko, ken kaipapananna ti “Napintas”].

Ti asawa ni Ananias. Inlakoda nga agassawa ti talonda ket pinagparangda nga intedda kadagiti apostol ti eksakto a gatad a naglakuanda, kas ar-aramiden idi ti dadduma a Kristiano idiay Jerusalem tapno mapunnuan ti timmaud a narigat a kasasaad kalpasan ti Pentecostes 33 K.P. Natayda nga agassawa gapu iti dayta a panagkumplotda.

Nagbasol da Ananias ken Safira saan a gapu ta saanda nga inted ti intero a gatad ti nakailakuan ti sanikuada no di ket gapu ta siuulbod nga ibagbagada nga intedda ti amin a naglakuanda. Inaramidda dayta ta kayatda a padayawan ida dagiti tattao imbes a mapadayawan ti Dios ken agaramidda iti naimbag iti kongregasionna. Imbutaktak ni Pedro ti panangallilawda babaen ti tulong ti nasantuan nga espiritu. Kinunana: “Ananias, apay a pinaturednaka ni Satanas nga agulbod iti nasantuan nga espiritu ken sililimed a mangibati iti paset ti naglakuan ti talon? Bayat ti panagtalinaedna kenka saan kadi a nagtalinaed a kukuam, ket kalpasan a nailako saan kadi a nagtultuloy nga adda iti panangaywanmo? Apay a pinanggepmo ita pusom ti kas itoy nga aramid? Nagulbodka, saan a kadagiti tattao, no di ket iti Dios.” Idi nangngeg ni Ananias ti sasao ni Pedro, napasag ket nauyos ti biagna.

Kalpasan ti agarup tallo nga oras, simrek ni Safira ket nagulbod met. Idin inimtuod kenkuana ni Pedro: “Apay a nagtulaganyo a dua a suboken ti espiritu ni Jehova?” Napasag met ni Safira ket nauyos ti biagna. Nagserbi daytoy a pasamak kas disiplina maipaay iti kongregasion, iti kasta naaddaanda iti dakkel a panagbuteng, panagraem. Kasta met, nabigbigda a pudno nga adda ni Jehova iti kongregasion babaen ti espirituna.​—Ara 4:34, 35; 5:1-11; 1Co 3:16, 17; Efe 2:22; idiligyo ti 1Ti 1:20.