Nasayaat nga Ulidan​—Dagiti Tallo a Hebreo

Nakatakder da Hananias, Misael, ken Azarias idiay tanap ti Dura, nga asideg iti Babilonia. Amin a tattao iti aglawlawda ket nakarukob iti sanguanan ti dakkel a ladawan. Iti laksid ti panangpilit dagiti kapatadada ken ti pangta ti ari, nagtalinaed a natibker dagitoy nga agtutubo a lallaki. Napnuan panagraem ngem sititibker nga imbagada ken Nabucodonosor a saan nga agbalbaliw ti desisionda nga agserbi ken Jehova.​—Daniel 1:6; 3:17, 18.

Dagitoy a lallaki ket agtutubo pay laeng idi naidestieroda idiay Babilonia. Ti kinamatalekda bayat ti kinaagtutuboda, kas iti panagkedkedda a mangan kadagiti taraon nga iparparit ti Linteg ti Dios, ti nangisagana kadakuada a mangsango kadagiti naririgat a karit inton nataengandan. (Daniel 1:6-20) Maibatay iti kapadasanda, ammoda a nainsiriban ti agtulnog ken Jehova. Determinadoka kadi met a mangsalimetmet kadagiti pagalagadan ti Dios iti laksid ti panangpilit dagiti kapatadam? No bayat ti kinaagtutubom ket masursuromon ti agtulnog ken Jehova no kadagiti kasla babassit a banag, ad-addanto a nakasaganaka nga agtalinaed a matalek inton maipasangoka kadagiti daddadakkel a karit inton tumataenganka.​—Proverbio 3:5, 6; Lucas 16:10.