Salsaludsod Dagiti Agbasbasa

Sadino ti ayan ni Daniel idi nasuot dagiti tallo a Hebreo iti sango ti dakkel a ladawan nga imbangon ni Nabucodonosor iti tanap ti Dura?

Saan nga ibaga ti Biblia, isu nga awan ti makaibaga ita no sadino ti ayan ni Daniel bayat dayta a kanito ti pannakasuot.

Kunaen ti dadduma a yantangay ti saad ni Daniel wenno ti pabor ni Nabucodonosor kenkuana ket nangatngato ngem kada Sidrac, Mesac, ken Abednego, saan ngarud nga obligado ni Daniel a mapan iti tanap ti Dura. Ipasimudaag ti Daniel 2:49 nga adda idi tiempo a nangatngato ti saadna ngem kadagiti tallo a kakaduana. Ngem ditay mapaneknekan a daytoy ti nangilaksid kenkuana iti pannakitipon iti sabsabali iti sango ti ladawan.

Iti panangpadasda a mangilawlawag iti kaawan ni Daniel, kinuna ti dadduma a mabalin nga adda nakaibaonanna wenno masakit ket saan a makatabuno. Nupay kasta, saan nga ibaga ti Biblia dayta. Aniaman ti napasamak, awan la ketdi ti pakababalawan ti kabibiag ni Daniel idi, ta no adda koma, awan duadua a dayta ti panggapuan dagiti agim-imon nga opisial ti Babilonia a mangakusar kenkuana. (Daniel 3:8) Agpada a sakbay ken kalpasan dayta a pasamak, pinaneknekan ni Daniel nga isu ket manangsalimetmet iti kinatarnaw, nasungdo iti Dios aniaman ti pakasuotanna. (Daniel 1:8; 5:17; 6:4, 10, 11) Isu nga uray pay saan nga ibaga ti Biblia no apay nga awan idi ni Daniel iti tanap ti Dura, makapagtalektayo a di naikompromiso ti kinamatalekna ken ni Jehova a Dios.​—Ezequiel 14:14; Hebreo 11:33.