Parmekenyo Dagiti Tubeng iti Panagrang-ayyo!

DAREPDEPEM a nakakambio ti luganmo, agan-andar ti makinana, ngem saan met nga umabante. Nadadaelan ngata? Saan, adda dakkel a bato a naikalso iti maysa kadagiti pilid. Kasapulan laeng nga ikkaten dayta tapno umabante ti lugan.

Umasping iti dayta, dadduma a makipagad-adal iti Biblia kadagiti Saksi ni Jehova addaanda kadagiti tubeng a makalapped iti naespirituan nga irarang-ayda. Kas pagarigan, imballaag ni Jesus a dagiti bambanag a kas “ti pakaringgoran daytoy a sistema ti bambanag ken ti makaallilaw a pannakabalin ti kinabaknang” mabalin a “leppesenda ti sao” ti kinapudno ken lappedanda ti irarang-ay.​—Mateo 13:22.

Dagiti nakairuaman nga ugali wenno pakapilawan ti mangtiped iti panagrang-ay ti dadduma. Ti Hapones nga agnagan iti Yutaka nagustuanna ti mensahe ti Biblia, ngem parikutna ti kinasugadorna. Namin-adun a pinadasna a parmeken dayta a bisiona ngem napaay. Gapu iti panagsugal, naibusna ti dakkel a kantidad ti kuarta, napukaw ti tallo a pagtaenganna, ti panagraem kenkuana ti pamiliana, ken ti bukodna a dignidad. Maikkatna ngata daytoy a mangtubtubeng kenkuana nga agbalin a Kristiano?

Utobenyo met ti maipapan iti babai nga agnagan Keiko. Babaen ti tulong ti Biblia, naisardengna dagiti bisiona a kas iti idolatria, imoralidad, ken panagpadles. Nupay kasta, inaklon ni Keiko: “Ti panagsigariliok ti kakaruan a tubeng kaniak. Adun a daras nga inkagumaak nga isardeng ngem diak naaramid.”

Mabalin nga adda met ti kasla di maikkat a banag a manglaplapped iti irarang-ayyo. Aniaman dayta, mainanamayo a maparmekyo dayta babaen ti tulong ti Dios.

Lagipenyo ti imbalakad ni Jesus kadagiti adalanna kalpasan a napaayda a mangparuar iti demonio manipud iti agkissiw a lalaki. Kalpasan a naaramidan ni Jesus ti saanda a nabaelan, kinunana kadagiti adalanna: “No addaankayo iti pammati a kas iti kabassit ti bukel ti mustasa, kunaenyonto iti daytoy a bantay, ‘Umaliska manipud ditoy nga agturong sadiay,’ ket umalisto dayta, ket awanto ti di mabalin kadakayo.” (Mateo 17:14-20; Marcos 9:17-29) Wen, ti parikut nga agparang a kasla nagdakkel a bantay kadatayo ket nagbassitan ken awan kaimudinganna iti kabilgan a Namarsua kadatayo.​—Genesis 18:14; Marcos 10:27.

Panangilasin Kadagiti Lapped iti Panagrang-ay

Sakbay a maparmekyo dagiti pakalappedanyo, masapul nga ammuenyo no ania dagita. Kasanoyo a maaramid? No dadduma, bagbagaannakayo ti kakongregasionyo, a kas ti panglakayen wenno mangyad-adal kadakayo. Imbes a sakiten ti nakemyo ti kasta a naayat a balakad, sipapakumbaba koma nga “umimdengkayo iti disiplina ket agbalinkayo a masirib.” (Proverbio 8:33) Iti sabali a pamay-an, mabalin a mabigbigyo dagiti pagkapuyanyo babaen ti panagadalyo iti Biblia. Wen, ti Sao ti Dios ket “nabiag ken adda bilegna.” (Hebreo 4:12) Ti panagbasa iti Biblia ken kadagiti publikasion a naibatay iti Biblia mapagminarna dagiti kaunggan a pampanunot, rikrikna, ken motiboyo. Tulongannakayo a mangtingiting iti bagbagiyo sigun kadagiti nangato a pagalagadan ni Jehova. Ipalgak ken ipabigbigna dagiti banag a mabalin a mangtubeng iti naespirituan a panagrang-ayyo.​—Santiago 1:23-25.

Kas pagarigan, mabalin a ti maysa a mayad-adalan iti Biblia nayugalina ti imoral a panagar-arapaap. Mabalin a dina maamiris ti pagdaksan dayta, nga ikalinteganna a saan met nga aktual nga agar-aramid iti dakes. Ngem bayat ti panagadalna, mabasana ti sasao ti Santiago 1:14, 15: “Tunggal maysa masuot babaen ti pananggargari ken panangsulbog ti bukodna a derrep. Kalpasanna ti derrep, inton nayinawen, mangipasngay iti basol; kalpasanna, ti basol, inton naibanagen, mangpatanor iti ipapatay.” Ita, mautobnan no kasano a makadadael iti panagrang-ayna no itultuloyna ti kasta a panagpampanunot! Kasanona a maikkat ti kasta a lapped?​—Marcos 7:21-23.

Panangparmek Kadagiti Tubeng

Nalabit a babaen ti tulong ti maysa a nataengan a Kristiano, mabalin nga ad-adda pay nga agsukimat ti estudiante iti Sao ti Dios, nga usarenna ti Watch Tower Publications Index.a Kas pagarigan, ti paulo a “Thoughts” (pampanunot), iturongna ti agbasbasa iti adu a naipablaak nga artikulo a mainaig iti panangparmek kadagiti makadangran a panagar-arapaap. Dagitoy nga artikulo itampokda dagiti makatulong a teksto ti Biblia, kas iti Filipos 4:8, a kunana: “Aniaman a bambanag a napudno, aniaman a bambanag a serioso a pakaseknan, aniaman a bambanag a nalinteg, aniaman a bambanag a nadalus, aniaman a bambanag a maay-ayat, aniaman a bambanag a naimbag ti pakasarsaritaanda, aniaman ti adda a kinasingpet ken aniaman ti adda a banag a nadayaw, itultuloyyo nga utoben dagitoy a banag.” Wen, ti imoral a pampanunot masapul a masukatan iti nadalus ken makapabileg a pampanunot!

Bayat ti panagsukimatna, awan duadua a makasarak ti estudiante iti dadduma a prinsipio ti Biblia a tumulong kenkuana tapno saan a dumegdeg ti parikutna. Kas pagarigan, mamakdaar ti Proverbio 6:27 ken Mateo 5:28 maibusor iti panangtaraon iti isip kadagiti banag a mangtukay iti derrep. Inkararag ti Salmista: “Iliklikmo dagiti matak manipud panangkita iti awan pategna.” (Salmo 119:37) Siempre, saan nga umdas ti basta panangbasa kadagitoy a teksto ti Biblia. “Ti puso daydiay nalinteg agmennamenna,” kinuna ti masirib a tao. (Proverbio 15:28) No mennamennaen ti estudiante saan laeng a no ania ti ibilin ti Dios no di ket no apay nga ibilinna dayta, umuneg ti pannakaawatna iti kinasirib ken kinarasonable dagiti dalan ni Jehova.

Kamaudiananna, rumbeng a sidadaan nga agpatulong ken Jehova ti maysa a mangikagkagumaan a mangparmek iti kasta a lapped iti panagrang-ayna. Total, pagaammo unay ti Dios ti pakabuklantayo, nga imperpektotayo, naaramid manipud tapok. (Salmo 103:14) Inton agangay, ti kanayon a panangikararag iti tulong ti Dios, a napakuyogan iti napinget a panangliklik iti imoral a panagar-arapaap, ti mangitunda iti matarigagayan unay a resulta​—ti nadalus, nasalun-at a konsiensia.​—Hebreo 9:14.

Dikay Sumuko

Aniaman ti pakarigatan a sarsarangtenyo, bigbigenyo nga adda ti pannakapaay no dadduma. No mapasamak dayta, normal laeng a makariknakayo iti pannakapaay ken pannakaupay. Nupay kasta, laglagipenyo ti sasao iti Galacia 6:9: “Ditay koma sumuko nga agaramid iti nasayaat, ta iti naikeddeng a panawen agapittayto no ditay mabannog.” Dagiti napudno nga adipen ti Dios a kas kada David ken Pedro napasaranda dagiti nakababain a pannakapaay. Ngem saanda a simmuko. Sipapakumbaba nga inawatda ti balakad, nagbalbaliwda, ket pinaneknekanda a naisangsangayanda nga ad-adipen ti Dios. (Proverbio 24:16) Iti laksid dagiti biddut ni David, isu ket inawagan ni Jehova a “maysa a lalaki a naanamongan iti pusok, a mangaramidto iti amin a bambanag a tarigagayak.” (Aramid 13:22) Naparukma met ni Pedro dagiti pagkapuyanna ket nagbalin nga adigi iti kongregasion Kristiano.

Adu ita ti nagballigi met a nangparmek kadagiti tubeng. Ni Yutaka, a nadakamat itay, inawatna ti naidiaya a panagadal iti Biblia. Insalaysayna: “Ti panangtulong ken panangbendision ni Jehova iti tunggal panangikagumaak a rumang-ay ti timmulong kaniak a nangparmek iti kinasugadorko. Maragsakanak unay ta mapaspasarak ti kinapudno ti sasao ni Jesus​—a babaen ti pammati, mabalin a mayakar uray ti ‘bambantay.’” Idi agangay, nagbalin ni Yukata a ministerial nga adipen iti kongregasion.

Komusta met ni Keiko, a naadikto iti sigarilio? Insingasing ti kabsat a babai a mangyad-adal kenkuana a basaenna dagiti nadumaduma nga artikulo ti Agriingkayo! mainaig iti pannakaadikto iti sigarilio. Impaskil pay ketdi ni Keiko ti sasao ti 2 Corinto 7:1 iti luganna kas inaldaw a mangipalagip kenkuana nga agtalinaed a nadalus iti imatang ni Jehova. Kaskasdi a saanna latta a maisardeng. “Mariknak unay ti pannakapaayko,” malagip ni Keiko. “Isu a sinaludsodak ti bagik no ania a talaga ti kayatko​—kayatko kadi ti agserbi ken Jehova wenno ken Satanas?” Apaman a naikeddengna a ni Jehova ti kayatna a pagserbian, sipapasnek nga inkararagna ti tulong. Malagipna, “nasdaawak ta nabaelak nga insardeng ti panagsigarilio nga awan ti adu a rigatko. Masnaayanak laeng ta diak nagtignay a nasapsapa.”

Makapagballigikayo met a mangparmek kadagiti tubeng iti panagrang-ayyo. No ti pampanunot, tartarigagay, sasao, ken ar-aramidyo ket ad-adda nga itunosyo kadagiti pagalagadan ti Biblia, ad-adda met a maaddaankayo iti panagraem ken panagtalek iti bagiyo. Mabang-aran ken maparegta dagiti makitimpuyog kadakayo a kapammatianyo, kasta met dagiti kapamiliayo. Ti kapatgan iti amin, mapasingedyo ti relasionyo ken Jehova a Dios. Inkarina nga ‘ikkatenna ti aniaman a tubeng iti dalan ti ilina’ iti ilalapsutda iti impluensia ni Satanas. (Isaias 57:14) Ken mainanamayo a sibabaknang a bendisionannakayo ni Jehova no ikagumaanyo nga ikkaten ken parmeken dagiti tubeng iti irarang-ayyo iti naespirituan.

[Footnote]

[Ladawan iti panid 28]

Inkari ni Jesus a babaen ti pammati, mayakar dagiti arig-bantay a tubeng

[Ladawan iti panid 30]

Ti panangbasa iti Biblia pabilgenna ti reggettayo a mangparmek kadagiti naespirituan a pakapilawan