Ania Ngata ti Mapasamak iti Masanguanan?

TI KUNA TI BIBLIA

“Ti Dios . . . punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot. Dagiti dati a bambanag ket limmabasen.”​—Apocalipsis 21:3, 4, Baro a Lubong a Patarus.

TI MAIPAAYNA KENKA NO PATIEM DAYTA

Maaddaanka iti makapnek ken makaparagsak a trabaho.​—Isaias 65:21-23.

Saankanton nga agsakit wenno agrigrigat.​—Isaias 25:8; 33:24.

Maaddaanka iti naragsak ken agnanayon a biag a kadua ti pamilia ken gagayyemmo.​—Salmo 37:11, 29.

MAPAGTALKANTAYO KADI TI KUNA TI BIBLIA?

Wen, gapu iti dua a rason:

• Kabaelan ti Dios a tungpalen ti karina. Iti Biblia, ni laeng Jehova a Dios ti maawagan a “Mannakabalin-amin,” ta awan pagpatinggaan ti pannakabalinna. (Apocalipsis 15:3) Talaga a kabaelanna ngarud a tungpalen ti karina a mangpasayaat iti lubongtayo. Kas kuna ti Biblia, “awan ti imposible iti Dios.”​—Mateo 19:26.

• Kayat ti Dios a tungpalen ti karina. Kas pagarigan, kailiw ni Jehova a pagungaren dagiti natay.​—Job 14:14, 15.

  Kuna met ti Biblia a ni Jesus, nga Anak ti Dios, pinaimbagna dagiti masakit. Apay? Gapu ta kayatna. (Marcos 1:40, 41) Naan-anay a tinulad ni Jesus ti personalidad ni Amana. Kayatna a tulongan dagidiay agkasapulan.​—Juan 14:9.

  Masiguradotayo ngarud a ni Jehova ken ni Jesus kayatdatayo a tulongan a maaddaan iti naragsak a masakbayan!​—Salmo 72:12-14; 145:16; 2 Pedro 3:9.