Agbiagto Kadi Manen Dagiti Natay?

TI KUNA TI BIBLIA

“Addanto panagungar.”—Aramid 24:15, Baro a Lubong a Patarus.

TI MAIPAAYNA KENKA NO PATIEM DAYTA

Saanmo a kabuteng ni patay.—Hebreo 2:15.

Maliwliwaka no adda matay nga ipatpategmo iti biag.—2 Corinto 1:3, 4.

Maaddaanka iti pudno a namnama a makaduamto manen ida.—Juan 5:28, 29.

MAPAGTALKANTAYO KADI TI KUNA TI BIBLIA?

Wen, gapu iti tallo a rason:

• Ti Dios ti Namarsua iti biag. Ti Biblia awaganna ni Jehova a Dios kas “ubbog ti biag.” (Salmo 36:9; Aramid 17:24, 25) Daydiay nangted iti biag iti amin a sibibiag a parsua sigurado a kabaelanna nga isubli ti biag ti asinoman a natayen.

• Adda idin dagiti pinagungar ti Dios. Dakamaten ti Biblia ti walo a tattao—ubbing, nataengan, lallaki, ken babbai—a napagungar ditoy daga. Kapatpatay pay laeng ti dadduma idi napagungarda, ngem ti maysa kadakuada ket uppat nga aldaw idin nga adda iti tanem!—Juan 11:39-44.

• Magagaran ti Dios a mangaramid manen iti dayta. Kagura ni Jehova ti ipapatay; ibilangna dayta kas kabusor. (1 Corinto 15:26) Kayatna a parmeken dayta a kabusor, a naan-anay a pukawenna ni patay babaen ti panagungar. Il-iliwenna a pagungaren dagidiay adda iti lagipna ken makita ida nga agbiag manen ditoy daga.—Job 14:14, 15.