Edukasion nga Ipapaay ti Pagarian—Panangsanay Kadagiti Adipen ti Ari

NAKAISEMKA bayat a dumdumngegka iti agpalpalawag iti plataporma. Ti ispiker ket maysa nga agkabannuag iti kongregasionyo, ken dayta ti umuna a panagpasetna iti asamblea. Bayat a maragragsakanka a dumdumngeg iti palawagna, masmasdaawka iti panangsanay a maipapaay iti ili ti Dios. Malagipmo pay idi damo a nagpaset daytoy a kabsat​—ket ita nagdakkelen ti rimmang-ayanna! Alisto ti panagprogresona kalpasan a nageskuela iti Pioneer Service School ken nabiit pay a nageskuelada ken ni baketna iti School for Kingdom Evangelizers. Bayat nga agpalpalakpakkayo iti nagsayaat a palawag ti kabsat, kimmitaka iti aglawlawmo ken napanunotmo dagiti instruksion a maipapaay iti ili ti Dios.

Impakpakauna ti Biblia nga addanto tiempo a ‘sursuruan ni Jehova’ ti ilina. (Isa. 54:13) Agbibiagtayon iti dayta a tiempo. Umaw-awattayo iti edukasion saan laeng a babaen kadagiti publikasiontayo no di ket kadagiti pay gimong, asamblea, kombension, ken iti nagduduma nga eskuelaan a nairanta a mangisagana kadatayo kadagiti annongen iti organisasion ni Jehova. Iti daytoy a benneg, usigentayo no kasano a mangipaay dagitoy nga edukasion iti natibker a pammaneknek nga agturturayen ti Pagarian ti Dios.