Magunggonaan iti Nateokratikuan a Panagpasakup

NASKEN nga agpasakuptayo iti Dios, ti Soberano iti Uniberso, tapno agbalintayo nga organisado a mangaramid iti pagayatan ni Jehova. Bigbigentayo ti kinaulo ti Anakna iti kongregasion Kristiano ken surotentayo met ti prinsipio ti kinaulo iti dadduma pay a benneg ti biag. Magunggonaan ti amin no agpasakupda iti Dios.

² Ti prinsipio a panagpasakup iti umiso nga autoridad ket nangrugi iti sangatauan idiay hardin ti Eden. Nairaman daytoy kadagiti bilin ti Dios a masarakan iti Genesis 1:28 ken 2:16, 17. Dagiti animal agpasakupda kadagiti tattao, ket da Adan ken Eva masapul nga agpasakupda iti pagayatan ken autoridad ti Dios. Ti panagtulnog iti autoridad ti Dios ket agresulta iti talna ken nasayaat nga urnos. Naitampok iti 1 Corinto 11:3 ti prinsipio ti kinaulo. Insurat ni apostol Pablo: “Kayatko a maammuanyo a ti Kristo ti ulo ti tunggal lalaki; ti lalaki ti ulo ti babai; ti Dios ti ulo ti Kristo.” Ipasimudaag ngarud daytoy nga urnos a malaksid ken Jehova, adda ulo a pagpasakupan ti amin.

³ Kaaduan a tattao ita, dida bigbigen ken sursuroten ti prinsipio ti kinaulo. Apay? Nangrugi ti problema idiay Eden idi a ti immuna a nagannak ti tao ket pinilida ti saan nga agpasakup iti kinasoberano ti Dios. (Gen. 3:4, 5) Ngem saanda a naaddaan iti wayawaya. Imbes ketdi, inturayan ida ti dakes nga espiritu a parsua, ni Satanas a Diablo. Gapu iti umuna a panagrebelde naisina ti tao manipud iti Dios. (Col. 1:21) Kas resultana, kaaduan a tattao ita ket iturturayan daydiay nadangkes.​—1 Juan 5:19.

⁴ Nawayawayaantayon iti impluensia ni Satanas gapu ta naammuantayon ti kinapudno ti Sao ti Dios ken inyaplikartayo dayta. Kas dedikado ken bautisado a Saksi, bigbigentayo ni Jehova kas Soberano iti biagtayo. Umanamongtayo ken ni Ari David a nangbigbig ken Jehova kas “panguluen ti amin.” (1 Cron. 29:11) Wen, sipapakumbaba a bigbigentayo: “Ammuenyo a ni Jehova ket Dios. Isu ti nangaramid kadatayo, ket kukuanatayo. Datayo ti tattaona ken dagiti karnero iti pagpastoranna.” (Sal. 100:3) Bigbigentayo a natan-ok ni Jehova ken maikari iti naan-anay a panagpasakuptayo gapu ta isu ti Namarsua iti amin a banag. (Apoc. 4:11) Kas ministro ti pudno a Dios, tuladentayo ni Jesu-Kristo, a nangipakita iti perpekto nga ulidan iti panagpasakup iti Dios.

⁵ Ania ti nasursuro ni Jesus kadagiti sinagabana idi adda ditoy daga? Kuna ti Hebreo 5:8: “Nupay isu ket Anak, nasursurona ti agtulnog gapu kadagiti sinagabana.” Wen, simamatalek latta a nagpasakup ni Jesus iti nailangitan nga Amana uray iti narigat a kasasaad. Kanayonanna, awan ti aniaman nga inaramid ni Jesus a kabukbukodanna. Saan a nagsao iti bukodna a kapanunotan ken dina met tinarigagayan a maidayaw ti bagina. (Juan 5:19, 30; 6:38; 7:16-18) Bayat ti ministerio ni Jesus, naragsakan a nangaramid iti pagayatan ni Amana, uray no binusbusor ken indadanes dagiti tattao nagpasakup latta iti Dios. (Juan 15:20) “Nagpakumbaba” ni Jesus agingga iti ‘ipapatayna iti kayo a pagtutuokan.’ Ti naan-anay a panagpasakupna ken Jehova ket nangyeg iti adu a gunggona​—ti agnanayon a pannakaisalakan ti sangatauan, pannakaitan-ok ni Jesus, ken pannakaidayaw ti Amana.​—Fil. 2:5-11; Heb. 5:9.

DAGITI ASPETO TI NATEOKRATIKUAN A PANAGPASAKUP

⁶ No agpasakuptayo iti Dios babaen ti panangaramidtayo iti pagayatanna, maliklikantayo ti adu a pakadanagan ken pakaupayan a mapaspasaran dagiti saan nga agpaspasakup iti kinasoberano ni Jehova. Kanayon a sipsiputannatayo ti Diablo a kabusortayo tapno maalun-onnatayo, ngem malabanantayo no busorentayo. Maisalakantayo met, no agpakumbaba ken situtulok nga agpasakuptayo ken Jehova.​—Mat. 6:10, 13; 1 Ped. 5:6-9.

⁷ Iti kongregasion Kristiano, bigbigentayo ti kinaulo ni Kristo ken ti autoridad nga intedna iti “matalek ken masirib nga adipen.” Makita daytoy iti kababalin ken kondukta nga ipakpakitatayo iti maysa ken maysa. Ti panagpasakup iti urnos ti Dios iti kongregasion tignayennatayo nga agtulnog iti Sao ti Dios iti amin nga aspeto ti panagdayawtayo. Ti panagtulnogtayo ramanenna ti pannakiramantayo iti ministerio, itatabuno ken pannakipasettayo kadagiti gimong, pannakitunos kadagiti panglakayen, ken ti panangsuporta kadagiti urnos ti organisasion.​—Mat. 24:45-47; 28:19, 20; Heb. 10:24, 25; 13:7, 17.

⁸ Makatulong ti panagpasakuptayo iti Dios tapno agbalin a natalna, natalged, ken nasayaat ti urnos ti kongregasion Kristiano. Dagiti galad ni Jehova ket makita kadagiti natulnog nga iturayanna. (1 Cor. 14:33, 40) Dagiti kapadasantayo iti organisasion ni Jehova ti nangtignay kadatayo a mangyebkas iti kas iti narikna ni Ari David. Idi nakitana ti nagdumaan dagiti agserserbi ken Jehova ken dagiti nadangkes, siraragsak a kinuna ni David: “Naragsak ti ili a ni Jehova ti Diosna!”​—Sal. 144:15.

⁹ Iti urnos ti panagasawa ken pamilia, “ti lalaki ti ulo ti babai.” Dagiti lallaki agpasakupda met ken Kristo, idinto ta ti ulo ni Kristo ket ti Dios. (1 Cor. 11:3) Dagiti assawa a babbai agpasakupda kadagiti assawada, ket dagiti annak agpasakupda kadagiti nagannakda. (Efe. 5:22-24; 6:1) Agbalin a natalna ti pamilia no suroten ti tunggal miembro ti prinsipio ti kinaulo.

¹⁰ Kas ken Kristo, usaren ti asawa a lalaki ti kinaulona iti naayat a pamay-an. (Efe. 5:25-29) No dina abusuen wenno baybay-an ti kinaulona, maragsakan nga agpasakup ti asawa ken annakna. Ti akem ti asawa a babai ket katulongan, wenno komplimento. (Gen. 2:18) No siaanus a suportaran ken raemenna ni lakayna, magun-odna ti anamong ni lakayna ken maidayawna ti Dios. (1 Ped. 3:1-4) No suroten dagiti agassawa ti balakad ti Biblia maipapan iti kinaulo, mangipakpakitada iti ulidan kadagiti annakda no iti panagpasakup iti Dios.

¹¹ Ti panagpasakuptayo iti Dios ket adda pakainaiganna iti panangmatmattayo kadagiti “nangatngato nga autoridad,” nga “insaad ti Dios . . . iti relatibo a saadda.” (Roma 13:1-7) Kas natulnog nga umili, dagiti Kristiano agbayadda iti buis, nga itedda ken ‘Cesar dagiti kukua ni Cesar, ngem itedda iti Dios dagiti kukua ti Dios.’ (Mat. 22:21) Kanayonanna, ti panangwanas iti teritoria ket maitunos kadagiti agaplikar a linteg maipapan iti pannakaprotektar dagiti impormasion. Agpasakup ken agtulnogtayo kadagiti addaan iti autoridad no la ket ta saan a maikontra dagita iti nalinteg a pagalagadan ni Jehova. No aramidentayo dayta, maipamaysa ti atensiontayo ken mausartayo ti pigsatayo a mangikasaba iti naimbag a damag.​—Mar. 13:10; Ara. 5:29.

¹² Ti panagpasakup iti urnos ti Dios apektaranna ti amin nga aspeto ti biag. Gapu iti pammati, makitkitatayon ti tiempo inton ti amin a tattao ket agpasakupen ken Jehova a Dios. (1 Cor. 15:27, 28) Sigurado a mabendisionan dagiti siraragsak a mangbigbig iti kinasoberano ni Jehova ken agtultuloy nga agpasakup kenkuana iti agnanayon!