SALUDSOD 2
Apay a Problemak ti Itsurak?
ANIA TI ARAMIDEM?
Panunotem daytoy nga eksena: Kada agsarming ni Julia, nakaluklukmeg a babai ti makitana. “Masapul nga agpakuttongak,” ibagbagana iti bagina—uray no ibagbaga dagiti nagannakna ken gagayyemna a “kasla iit” ti kakuttongna.
Itay nabiit, napanunot ni Julia ti saan a mangan iti sumagmamano nga aldaw tapno makissayan ti timbangna iti uray “dua a kilo laeng” . . .
No mariknam ti kas iti marikrikna ni Julia, ania ti aramidem?
AGPANUNOT!
Ti panangkitam iti bagim ket mabalin a kas iti makitam iti nauyaw a sarming
Saan met a dakes a panunotem ti itsuram. Kinapudnona, nagsayaat ti panangiladawan ti Biblia iti itsura dagiti babbai ken lallaki a kas kada Sara, Raquel, Abigail, Jose, ken David. Kuna ti Biblia a “napintas unay” ti babai nga agnagan Abisag.—1 Ar-ari 1:4.
Nupay kasta, adu a tin-edyer ti sobra ti panangpampanunotda iti itsurada. Mabalin nga agresulta dayta kadagiti nakaro a problema. Panunotem:
Iti maysa a panagadal, 58 a porsiento kadagiti babbai a nasurbey ti nangibaga a sobra ti kinalukmegda, ngem ti agpayso, 17 a porsiento laeng kadakuada ti talaga a kasta.
Iti sabali pay a panagadal, 45 a porsiento kadagiti babbai a nasurbey a nangibaga a sobra ti kinalukmegda ket agkurang ti timbangda!
Gapu iti panangikarigatanda nga agpakuttong, dadduma nga agtutubo ti naaddaan iti makapapatay a sakit a maawagan iti anorexia. Dagiti addaan iti kasta a sakit bisbisinenda ti bagida.
No addaanka iti sintoma ti anorexia wenno sabali pay a sakit nga adda koneksionna iti pannangan, agpatulongka. Ibagam dayta iti nagannakmo wenno iti mapagtalkan nga adulto. Kuna ti Biblia: “Ti pudno a kadua agayat iti isuamin a tiempo, ken ti kabsat a mayanak no adda rigat.”—Proverbio 17:17.
TI KASAYAATAN A MAARAMIDAM!
Ti personalidad ti talaga a mamagbalin iti maysa a makaay-ayo wenno saan. Panunotem ti anak ni Ari David a ni Absalom. Kuna ti Biblia:
“No maidilig ken Absalom awan idi ti lalaki a nakaliblibnos [wenno, nakaguapguapo] iti intero nga Israel tapno maidaydayaw iti kasta unay. . . . Isu awanan idi iti pilaw.”—2 Samuel 14:25.
Ngem napangato, ambisioso, ken traidor ni Absalom! Isu a negatibo ti ibagbaga ti Biblia maipapan kenkuana; iladawanna ni Absalom kas lalaki nga awan babainna, saan a matalek, napnuan iti gura, ken mammapatay.
Gapuna, ibaga kadatayo ti Biblia:
“Kawesanyo ti bagbagiyo iti baro a personalidad.”—Colosas 3:10.
“Ti arkosyo saan koma a daydiay makinruar . . . , no di ket isu koma ti nalimed a kinatao ti puso.”—1 Pedro 3:3, 4.
Saan met ketdi a dakes a kayattayo a nasayaat ti itsuratayo, ngem napatpateg nga amang ti personalidadtayo. Kinapudnona, mas makaay-ayo iti sabsabali ti nasayaat a kababalin ngem iti napintas a pammagi. “Nalaka a madlaw ti kinapintas,” kuna ti agtutubo a ni Phylicia, “ngem dagiti nasayaat a kababalinmo ti mas malaglagipto dagiti tattao.”
KOMUSTA TI PANANGKITAM ITI ITSURAM?
Madisdismayaka kadi iti itsuram?
Napanunotmo kadin ti agparetoke wenno agdieta iti nalabes tapno sumayaat ti itsuram?
No posible, ania ti kayatmo a balbaliwan iti bagim? (Piliem ti sungbatmo.)
KATAYAG
TIMBANG
BUOK
PAMMAGI
RUPA
KOLOR TI KUDIL
No wen ti sungbatmo iti immuna a dua a saludsod ken tallo wenno ad-adu pay ti pinilim iti maikatlo, panunotem daytoy: Dakkel ti posibilidadna a ti panangkita kenka ti sabsabali ket saan a kas kaalas ti panangkitam iti bagim. Adda tendensiatayo nga agbalin a saan a balanse ket masobraantayo ti panangpanunot iti itsuratayo.—1 Samuel 16:7.