Ania ti kangrunaan a mangdeskribir iti panagriknam?
Pulos a diak kayat ti itsurak.
No dadduma, diak kayat ti itsurak.
Kanayon a kayatko ti itsurak.
Ania ti kangrunaan a kayatmo a baliwan iti bagim?
Katayag
Timbang
Korte ti bagi
Buok
Kolor ti kudil
Kadakkel ti masel
Dadduma pay
Kompletuem.
Masuronak unay iti bagik . . .
no kitaek ti timbangko.
no agsarmingak.
no idiligko ti bagik iti sabsabali (gagayyem, modelo, artista).
Kompletuem.
Kitkitaek ti timbangko iti . . .
inaldaw.
linawas.
sagpaminsan iti sumagmamano a lawas.
Ania kadagitoy a pagarigan ti kangrunaan a mangdeskribir iti riknam?
Naalas a panagkita iti itsura. (Pagarigan: “Kada agsarmingak, nakaluklukmeg ken nakaal-alas ti makitak. Diak payen mangmangan tapno kumuttongak.”—Serena.)
Balanse a panagkita iti itsura. (Pagarigan: “Adda latta nga adda ti ditay magustuan iti itsuratayo, ngem adda dagiti rumbeng nga akseptarentayo lattan. Awan maganabtayo iti kapapanunot iti ditay kabaelan a baliwan.”—Natanya.)
Ibaga kadatayo ti Biblia a ditay panunoten ti bagitayo nga ad-adda ‘ngem iti rebbeng a panangpanunottayo.’ (Roma 12:3) No kasta, maiparbeng laeng—ken kasapulan pay ketdi—ti balanse a panangpanunotmo iti bagim. Kas pagarigan, dayta ti makagapu nga agsipilioka ken pagtalinaedem a nadalus ti bagim.
Ngem kasanon no masansan a madismayaka wenno sobran ti pannakaseknanmo iti itsuram? No kasta, nalabit mapanunotmo . . .
‘Apay a naalas ti panagkitak iti itsurak?’
Mabalin nga adda sumagmamano a rason a kas kadagitoy:
Impluensia ti media. “Adu a ladawan ti masansan a makita dagiti agtutubo a mangiparikna a rumbeng a kanayon a nakakutkuttong ken nakapimpintastayo. Isu a makapasuron no saantayo a kasta!”—Kellie.
Impluensia ti nagannak. “Nadlawko a no maseknan unay ti maysa nga ina iti itsurana, masansan a kasta met ti balasangna. Agpayso met dayta kadagiti agama.”—Rita.
Nababa a kompiansa iti bagi. “Kayat dagidiay sobra ti pannakaseknanda iti itsurada ti masansan a madaydayaw. Makauma ti makikadua kadagiti kasta a tattao!”—Jeanne.
Aniaman ti makagapu, nalabit pampanunotem . . .
‘Rumbeng kadi a baliwak ti itsurak?’
Usigem ti kuna ti dadduma a padam nga agtutubo.
“Saanmo a kanayon a mabaliwan dagiti dimo kayat iti bagim, isu a nasaysayaat no akseptarem lattan dagiti pakapilawam. No kasta ti aramidem, posible a di pay ketdi madlaw dayta ti dadduma.”—Rori.
“Aramidem ti amin a kabaelam nga agbalin a nasalun-at. No nasalun-atka, makitanto dayta iti itsuram. No ti magustuan laeng ti maysa a tao kenka ket ti itsuram (imbes a ti agpayso a kinataom), isu ket saan a gayyem.”—Olivia.
Laglagipem: Aramidem ti kabaelam a mangpasayaat iti itsuram. Ngem dimo unay pakaseknan dagiti dimon mabalbaliwan. Ngamin, mabalin a makadangran ti nalabes a pannakaseknan iti itsuram. (Basaem ti “Kapadasan ni Julia.”)
Ngem no balanse ti kababalinmo, realistiko ti panangmatmatmo iti bagim, kas iti napaneknekan ti agtutubo a ni Erin. “Siempre, adda dagiti pakasikorak maipapan iti itsurak,” kunana, “ngem nadlawko a madismayaak laeng no dagiti diperensiak ti kitkitaek. Ita, regularakon nga agehersisio ken mangmangan kadagiti nasustansia isu nga in-inut a simmayaaten ti dadduma pay a banag.”
Ti kasayaatan pay laeng a makeover!
No balanse ti panangmatmatmo iti itsuram, nasaysayaat ti riknam (ken uray ti langam). Makatulong ti Biblia. Paregtaennaka nga agbalin a:
Kontento. “Nasaysayaat a mapnekka iti adda kenka ngem ti kanayon nga agtarigagayka iti sabali a banag, agsipud ta awan serserbina dayta a kas iti panangkamat iti angin.”—Eclesiastes 6:9, Contemporary English Version.
Balanse iti panagehersisio. “Ti panagsanay iti bagi bassit ti maigunggonana.”—1 Timoteo 4:8.
Mangpapintas iti makin-uneg a kinataom. “Ti maysa laeng a tao kitaenna no ania ti agparang kadagiti mata; ngem no maipapan ken Jehova, kitaenna no ania ti puso.”—1 Samuel 16:7.
“Makita iti rupatayo ti panangmatmattayo iti bagitayo. No kontento ti maysa a tao, makita dayta ti dadduma ket sigurado a maatrakarda kenkuana.”—Sarah.
“Nalaka a madlaw ti kinapintas. Ngem ti kinataom ken dagiti nagsayaat a kababalinmo ti kangrunaan a malaglagipto dagiti tattao kenka.”—Phylicia.
