Nakisarita ni Jehova ken Samuel

Adda dua nga annak a lallaki ti nangato a padi a ni Eli, da Hofni ken Finehas. Nagserbida kas papadi iti tabernakulo. Saanda nga agtultulnog kadagiti linteg ni Jehova, ken saan a nasayaat ti panangtratoda kadagiti tattao. No agidaton dagiti Israelita ken Jehova, alaen da Hofni ken Finehas ti kasayaatan a paset ti karne. Naammuan ni Eli ti ar-aramiden dagiti annakna ngem binaybay-anna latta ida. Baybay-an ngata ni Jehova nga agtultuloy dayta?

Uray adayo nga ub-ubing ni Samuel kada Hofni ken Finehas, saanna ida a tinulad. Naragsakan ni Jehova ken Samuel. Maysa a rabii, bayat a matmaturog ni Samuel, nakangngeg iti boses a mangaw-awag iti naganna. Bimmangon, nagtartaray a napan ken Eli, sa imbagana: ‘Addaakon!’ Ngem imbaga ni Eli: ‘Saanka nga inayaban. Inkan, ituloymo ti maturog.’ Nagsubli ni Samuel iti iddana. Idi kuan, adda manen immawag iti naganna. Iti maikatlo a pannakangngeg ni Samuel iti boses, nabigbig ni Eli a ni Jehova ti mangay-ayab ken Samuel. Imbagana ken Samuel a no mangngegna manen ti boses, ibagana: ‘Agsaoka, Jehova. Agdengdengngeg ti adipenmo.’

Naturog manen ni Samuel. Idi kuan, nangngegna: ‘Samuel! Samuel!’ Insungbatna: ‘Agsaoka, agdengdengngeg ti adipenmo.’ Imbaga ni Jehova: ‘Ibagam ken Eli a dusaek isuna ken ti pamiliana. Ammona nga agar-aramid dagiti annakna iti dakes iti tabernakulok, ngem baybay-anna latta ida.’ Kabigatanna, inlukat ni Samuel dagiti ruangan ti tabernakulo, kas iti kanayon nga ar-aramidenna. Mabuteng ni Samuel a mangibaga iti nangato a padi iti imbaga kenkuana ni Jehova. Ngem inayaban ni Eli ket dinamagna: ‘Anakko, ania ti imbaga ni Jehova kenka? Ibagam amin kaniak.’ Isu nga imbaga ni Samuel ken Eli ti amin.

Bayat a dumakdakkel ni Samuel, nagtultuloy a tinulongan ni Jehova. Iti intero nga Israel, ammo dagiti Israelita a pinili ni Jehova ni Samuel nga agbalin a propeta ken ukom.