Nagparang ni Jesus Kadagiti Mangngalap

Sumagmamano nga aldaw kalpasan a nagparang ni Jesus kadagiti apostol, napan nagkalap ni Pedro iti Baybay ti Galilea a kaduana da Tomas, Santiago, Juan, ken ti dadduma pay nga adalan. Nagpatnag a nagkalapda ngem awan naalada.

Idi aglawagen, adda nakitada a lalaki a nakatakder iti igid ti baybay. Insaludsodna: ‘Adda kadi naalayo?’ Insungbatda: “Awan!” Imbaga ti lalaki: ‘Itinnagyo ti iket iti makannawan ti bangka.’ Inaramidda dayta ket nagadu ti nakalapda nga uray la didan maguyod ti iket. Bigla a nabigbig ni Juan a ni Jesus ti lalaki ket imbagana: “Isu dayta ti Apo!” Dagus a timpuak ni Pedro ket naglangoy a napan iti igid ti baybay. Simmang-at met ti dadduma nga adalan nga adda iti bangka.

Idi addadan iti igid ti baybay, nakakitada iti tinapay ken iti matuntuno nga ikan. Imbaga ni Jesus a mangtedda iti ikan a nayon ti kanenda. Kalpasanna, kinunana: ‘Umaykayo mamigaten.’

Idi nakapangandan, insaludsod ni Jesus ken Pedro: ‘Mas ay-ayatennak kadi ngem iti panagkalap?’ Insungbat ni Pedro: ‘Wen, Apo, ammom nga ay-ayatenka.’ Imbaga ni Jesus: ‘Pakanem dagiti babassit a karnerok.’ Insaludsod manen ni Jesus: ‘Pedro, ay-ayatennak kadi?’ Imbaga ni Pedro: ‘Apo, ammom nga ay-ayatenka.’ Imbaga ni Jesus: “Ipastoram dagiti babassit a karnerok.” Iti maikatlo a panagsaludsod ni Jesus, nalidayan ni Pedro ket imbagana: ‘Apo, ammom ti amin. Ammom nga ay-ayatenka.’ Imbaga ni Jesus: “Pakanem dagiti babassit a karnerok.” Kalpasanna, imbagana ken Pedro: “Itultuloymo ti sumurot kaniak.”