Ti Biag ken Ministerio ni Jesus

Idiay Baybay ti Galilea

DAGITI apostol agsublida itan idiay Galilea, kas nasapsapa nga imbilin kadakuada ni Jesus nga aramidenda. Ngem dida masigurado no ania ti aramidenda sadiay. Kalpasan sumagmamano a kanito, imbaga ni Pedro kada Tomas, Natanael, Santiago ken ti kabsatna a Juan, ken dua a sabsabali pay nga apostol: “Innak agdaklis.”

“Umaykami met sumurot kenka,” insungbat dagiti innem.

Kabayatan ti intero a rabii, awan aniaman a naalada. Nupay kasta, idi a bumigaten, nagparang ni Jesus idiay igid ti baybay, ngem dagiti apostol dida nailasin nga isu ni Jesus. Impukkawna: “Annakko, adda kadakayo ti aniaman a makan?”

“Awan!” impukkawda iti ballasiw ti danum.

“Iwayatyo ti iket iti bakrang a makanawan ti barangay ket makaalakayto,” kinunana. Ket idi nga inaramidda, saanda a nabalinan a ginuyod ti iketda gaput’ kaadu dagiti ikan. “Isu ti Apo!” impukkaw ni Juan. Imbarikes ni Pedro ti pagan-anayna, timpuak idiay baybay, ket linangoyna ti agarup siam a pulo a metro ingganat’ takdang. Dagiti dadduma nga apostol simmurotda a nakalugan iti bilog, a guyguyodenda ti iket a napno ti ikan.

Idi simmangladdan, adda naisagana a dumardarang a beggang, nga adda ikan a naiparabaw, ken adda ti tinapay. “Mangiyegkayo kadagiti ikan a naalayo ita,” kinuna ni Jesus. Limmugan ni Pedro ket ginuyodna ti iket iti takdang. Naglaon ti 153 a dadakkel nga ikan!

“Umaykayo, mamigatkayo,” inyawis ni Jesus.

Awan kadakuada ti makaitured a mangimtuod kenkuana, “Siasinoka?” agsipud ta ammoda nga isu ni Jesus. Daytoy ti maikapito a panagparang ni Jesus kalpasan panagungarna, ken maikatlo kadagiti apostol kas grupo. Inyawatna ti pamigat, tunggal maysa kadakuada inikkanna ti tinapay ken ikan.

Idi nakapangandan, nalabit nagtung-ed ni Jesus a kimmita iti daydiay adu a naala nga ikan ket insaludsodna ken Pedro: “Simon anak ni Juan, ay-ayatennak kadi nga ad-adda ngem dagitoy?” Nalabit kayatna a sawen, Nadekdekketka kadi iti panagdaklis ngem ti trabaho nga insaganak para kenka nga aramidem?

“Ammom nga ayatenka,” insungbat ni Pedro.

“Pakanem dagiti korderok,” insungbat ni Jesus.

Manen, iti maikadua a daras, sinaludsodna: “Simon anak ni Juan, ayatennak?”

“Wen, Apo, sika ammom nga ayatenka,” simmungbat ni Pedro.

“Ipaarabmo dagiti karnerok,” imbilin manen ni Jesus.

Ket, iti maikatlo a daras, sinaludsodna: “Simon anak ni Juan, ayatennak?”

Itan nagladingit ni Pedro. Mabalin a pampanunotenna no pagduaduaan ni Jesus ti kinamatalekna. Ta, idi a ti biag ni Jesus adda iti pannakasuot iti nabiit, inlibak ni Pedro iti tallo a daras nga isut’ am-ammona. Gapuna kinuna ni Pedro: “Apo, sika ammom dagiti isuamin; sika ammom nga ayatenka.”

“Pakanem dagiti karnerok,” imbilin ni Jesus iti maikatlo a daras.

Us-usaren laeng ni Jesus ni Pedro a pangilawlawagan ti ideya tapno ipaawatna met kadagiti dadduma ti trabaho a kayatna nga aramidenda. Iti mabiit panawannanton ti daga, ket kayatna nga idauloda ti panagserbi kadagidiay maiyeg iti pagtaraknan ti Dios.

No kasano a napungo ken napapatay ni Jesus gapu ta inaramidna ti nangibaonan ti Dios kenkuana, gapuna, impalgakna, ni Pedro agsagabanto iti umas-asping a kapadasan. “Idi ubingka,” kinuna ni Jesus kenkuana, “agbarikeska ket magmagnaka idi iti kayatmo. Ngem inton lakaykan unnatemto dagiti imam ket bariksannakanto ti sabali ket ipannakanto iti dika kayat.” Uray pay agur-uray ken Pedro ti ipapatay kas martir, imbalakad ni Jesus kenkuana: “Itultuloymo ti sumurot kaniak.”

Idi a timmaliaw, ni Pedro nakitana ni Juan ket inimtuodna: “Apo, anianto ti aramiden daytoy a tao?”

“No kayatko nga isut’ agbati nga agingga iti umayak,” insungbat ni Jesus, “iti ania ti pakaseknanna kenka dayta? Ituloymo ti sumurot kaniak.”

Dagitoy a sasao ni Jesus naawatan dagiti adu kadagiti adalan a kaipapananna a ni apostol Juan dinto matay. Nupay kasta, kas inlawlawag ni apostol Juan iti naud-udi, saan a kinuna ni Jesus a dinto matay, ngem kinuna laeng ni Jesus: “No kayatko nga isut’ agbati nga agingga iti umayak, iti ania ti pakaseknanna kenka dayta?” Juan 21:1-25; Mateo 26:32; 28:7, 10.

◆ Aniat’ mangipakita a di masigurado dagiti apostol no aniat’ aramidenda idiay Galilea?

◆ Kasano a dagiti apostol nabigbigda ni Jesus idiay Baybay ti Galilea?

◆ Namin-ano a daras itan a nagparang ni Jesus nanipud panagungarna?

◆ Kasano nga impaganetget ni Jesus no aniat’ kayatna nga aramiden dagiti apostol?

◆ Kasanot’ panangipakita ni Jesus ti pamay-an ti ipapatay ni Pedro?

◆ Ania a komento ni Jesus maipapan ken Juan ti di naawatan dagiti adu kadagiti adalan?