KAHON 1B
Pakabuklan ti Ezekiel
Gagangay a nabingaybingay ti libro nga Ezekiel kas iti sumaganad:
KAPITULO 1-3
Idi 613 B.C.E., bayat nga agnanaed ni Ezekiel idiay Babilonia a kadua dagiti naipanaw a Judio, nakakita kadagiti sirmata maipapan ken Jehova ken nadutokan nga agipadto kadagiti Judio nga agnanaed iti igid ti karayan Kebar.
KAPITULO 4-24
Iti nagbaetan ti 613 ken 609 B.C.E., impakaammo ni Ezekiel dagiti padto a nangnangruna a naglaon iti pannakaukom ti Jerusalem ken dagiti umilina a rebelioso ken agdaydayaw iti idolo.
KAPITULO 25-32
Kalpasan ti Jerusalem, insublat ni Ezekiel nga ipakaammo ti mensahe ti pannakaukom kadagiti kabusor a nasion a kas iti Ammon, Edom, Egipto, Moab, Filistia, Sidon, ken Tiro, manipud idi tawen 609 B.C.E., a panangrugi ti maudi a panangsakup ti Babilonia iti Jerusalem.
KAPITULO 33-48
Nangrugi idi 606 B.C.E., bayat a rebba pay laeng ti Jerusalem ken ti templona, a ginasut a kilometro ti kaadayona manipud Babilonia, impamaysa ni Ezekiel ti mensahe a mangted iti namnama—ti makaparagsak a pannakaisubli ti nadalus a panagdaydayaw ken Jehova a Dios.
Ti libro nga Ezekiel ket gagangay a naurnos sigun iti panagsasaruno dagiti pasamak ken sigun iti topiko. Dagiti padto a madadael ti Jerusalem ken ti templona ket immun-una ngem iti adu a padto ti pannakaisubli ti nadalus a panagdaydayaw. Natural laeng a kasta ta dagiti padto maipapan iti pannakaisubli ti nadalus a panagdaydayaw ipasimudaagda a nagsardengen ti panagdaydayaw idiay templo.
Dagiti met padto ni Ezekiel kontra kadagiti kabusor a nasion iti aglawlaw (kapitulo 25-32) ket mabasa kalpasan dagiti mensahe a maukom ti Jerusalem ken sakbay dagiti padto a maisubli ti nadalus a panagdaydayaw. Kastoy ti imbaga ti maysa nga eskolar maipapan kadagiti mensahe ti panangukom nga impakaammo ni Ezekiel kadagiti nasion: “Maitutop dagita a panagbaliw manipud idi naipakaammo ti mensahe ti pungtot ti Dios agingga idi naipakaammo ti asina iti ilina ta ti pannakaukom dagiti kabusorda ket paset a mismo ti panangisalakanna iti ilina.”