Ti Agkabsat a Balangkantis

Iti Ezekiel kapitulo 23, makitatayo ti nasakit a pannakababalaw ti ili ti Dios gapu ta saan a matalek. Adu ti pagpadaan daytoy a kapitulo iti kapitulo 16. Kas iti immun-una a mensahe, nagusar ti kapitulo 23 iti balangkantis kas pangiladawan. Ti Jerusalem ti makuna nga in-inaudi ket ti Samaria ti in-inauna. Ipakita ti dua a kapitulo no kasano a tinulad ti in-inaudi ti panagbalangkantis ti in-inauna ngem nakarkaro ti inaramidna a kinadakes ken immoralidad. Iti kapitulo 23, pinanaganan ni Jehova ti agkabsat: Ohola ti in-inauna nga isu ti Samaria, ti kabesera ti 10 a tribu a pagarian ti Israel; Oholiba ti in-inaudi nga isu ti Jerusalem, ti kabesera ti Juda.a—Ezek. 23:1-4.

Adda pay pagpadaan ti dua a kapitulo. Nalabit dagitoy ti kapatgan: Dagiti balangkantis ket arig assawa ni Jehova idi damo ngem liniputanda. Naglaonda met iti kari a mangyeg iti namnama. Basbassit a namnama ti pannakaisubli ti ipakita ti kapitulo 23, ngem maipada iti kapitulo 16 iti imbaga ni Jehova: “Pagpatinggaekto ti naalas nga aramidmo ken ti panagbalangkantismo.”—Ezek. 16:16, 20, 21, 37, 38, 41, 42; 23:4, 11, 22, 23, 27, 37.

Iladawanda Kadi ti Kakristianuan?

Ibagbaga idi dagiti publikasiontayo a ti agkabsat a da Ohola ken Oholiba ket padto a mangisimbolo iti Kakristianuan a nabingay iti Katoliko ken Protestante. Ngem kalpasan ti adu a kararag, panagpanunot, ken panagsukimat, adda dagiti timmaud a saludsod. Talaga kadi a nagbalin idi nga arig asawa ni Jehova ti Kakristianuan? Nakitulag kadi idin kenkuana? Saan. Awan pay ketdi ti Kakristianuan idi nagbalin ni Jesus kas manangibabaet iti “baro a tulag” iti naespirituan nga Israel; wenno saan man la a nagbalin ti Kakristianuan a paset ti naespirituan a nasion dagiti nadutokan a Kristiano. (Jer. 31:31; Luc. 22:20) Sa la timmaud ti Kakristianuan kalpasan a natay dagiti apostol. Nangrugi dayta idi maikapat a siglo C.E. kas apostata ken dakes nga organisasion a buklen dagiti “ruot”—dagiti sinsinan Kristiano—iti padto ni Jesus maipapan kadagiti trigo ken ruot.—Mat. 13:24-30.

Daytoy pay ti dakkel a pagdumaanda: Nangted ni Jehova iti namnama a masalbar ti di matalek a Jerusalem ken Samaria. (Ezek. 16:41, 42, 53-55) Adda kadi kasta a namnama nga ipaay ti Biblia iti Kakristianuan? Awan! Awanen ti namnamana a kas iti dadduma pay a paset ti Babilonia a Dakkel.

Isu a da Ohola ken Oholiba ket saan a padto a mangisimbolo iti Kakristianuan. Ngem makatulong ti kaaddada tapno maawatantayo ti banag a napatpateg: ti rikna ni Jehova kadagiti mangpadpadakes iti nasantuan a naganna ken kadagiti nangato a pagalagadanna iti nadalus a panagdaydayaw. Nagdakkel ti basol ti Kakristianuan iti daytoy a banag ta ibagbaga ti adu a relihionna nga agdaydayawda iti Dios a nadakamat iti Biblia. Nakarkaro pay ta ibagbagada a ti liderda ket ni Jesu-Kristo a dungdungnguen nga Anak ti Dios. Ngem konkontraenda met la ti ibagbagada ta pinagbalinda ni Jesus a paset ti nagkatlo a dios ken sinukirda ti nalawag a bilinna nga agtalinaed a ‘saan a paset ti lubong.’ (Juan 15:19) Ti agtultuloy a pannakiraman ti Kakristianuan iti idolatria ken kadagiti isyu iti politika ket pammaneknek a talaga a paset iti “agdindinamag a balangkantis.” (Apoc. 17:1) Sigurado a mairamanto iti agur-uray a dusa ti sangalubongan nga imperio ti ulbod a relihion!