PANAGSARUNGKAR
LEKSION 7
Panagregget
Prinsipio: “Intultuloyda nga insuro ken impakaammo ti naimbag a damag.”—Ara. 5:42.
Ti Inaramid ni Pablo
1. Buyaem ti VIDEO, wenno basaem ti Aramid 19:8-10 sa sungbatam dagitoy a saludsod:
Imbes nga isardeng ni Pablo ti mangasaba idi adda nangbusor kenkuana, kasano nga intultuloyna a tinulongan dagidiay nangipakita iti interes?
Kasano kasansan a nagsubli ni Pablo tapno isurona dagiti interesado, ken kasano kabayag nga inaramidna dayta?
Ania ti Masursurotayo ken Pablo?
2. Masapul ti adu nga oras ken panagregget tapno epektibo ti panagsarungkartayo ken makairugitayo iti panangyadal iti Biblia.
Tuladem ni Pablo
3. I-adjust-mo ti eskediulmo iti eskediul ti sarungkaram. Isaludsodmo iti bagim: ‘Kaano ngata ti kasayaatan a panangsarungkarko kenkuana? Sadino ken ania nga oras ti mas kombiniente kenkuana a makisarita kaniak?’ Situtulokka koma nga agsarungkar uray no saan a kombiniente kenka ti oras a kayatna.
4. Makitulagka. Iti ngudo ti tunggal pannakisaritam, ikagumaam nga ammuen ti espesipiko nga oras a mabalinmo ti makisarita manen kenkuana. Siguraduem a suroten ti nagtulaganyo.
5. Agtalinaedka a positibo. Saanmo a dagus nga ipapan a saan nga interesado ti maysa a tao a manmanom a madanon iti balayda wenno kanayon a busy. (1 Cor. 13:4, 7) Itultuloymo ketdi ti agregget nga agsarungkar. Ngem siempre, siguraduem a saan a masayang ti tiempom.—1 Cor. 9:26.