ABDON

[nagtaud iti sao a kaipapananna ti “adipen”].

1. Maysa nga ukom, anak ni Hillel a Piratonita iti Efraim. (Uk 12:13-15) Sigun ken Josephus (Jewish Antiquities, V, 273 [vii, 15]), natalna ti walo a tawen a panagturayna, ket awan ti dakamaten ti rekord ti Biblia a gubgubat bayat dayta a panawen. Amin dagiti 40 nga annak ken 30 nga appoko ni Abdon ket “nagsakay iti pitopulo a nataenganen nga asno,” pagilasinan ti dakkel a kinabaknang ken ranggo iti daydi a tiempo. Idi nagngudo ti panagturayna kas ukom, naitabon ni Abdon idiay nakayanakanna nga Efraim.

Ti dadduma inaigda ni Abdon ken “Bedan,” a nadakamat iti 1 Samuel 12:11; nupay kasta, ad-adda a nainkalintegan a kunaen a ni Bedan isu met laeng ni Barak, a ti naganna ket agparang iti daytoy a teksto agpadpada iti Griego a Septuagint ken iti Syriac a Peshitta.

2. Maysa a Benjamita, inauna nga anak ni Jeiel ken nalawag a kabsat ni Ner, apong ni Saul.​—1Cr 8:29, 30; 9:35, 36, 39.

3. Maysa nga opisial iti palasio ni Ari Josias (2Cr 34:20), naawagan iti Acbor iti 2 Ar-ari 22:12.​—Kitaenyo ti ACBOR Num. 2.

4. Anak ni Sasak iti tribu ni Benjamin; maysa a panguluen a lalaki nga agnanaed idiay Jerusalem.​—1Cr 8:23-28.

5. Maysa kadagiti uppat a siudad iti teritoria ti Aser a naited kadagiti Levita iti pamilia ni Gerson (Gersom). (Jos 21:27-31; 1Cr 6:71-75) Nalabit isu ti Khirbet ʽAbdeh (Tel ʽAvdon) agarup 6 km (3.5 mi) iti daya ti Aczib. Daytoy a lugar ket adda iti makin-amianan a deppaar ti Wadi Qarn (Nahal Keziv) ken adda iti sakaanan dagiti turod ti Galilea, ket asideg ngarud iti makin-amianan nga ungto ti Tanap ti Aser.