ADIN

[Naigamer iti Ragragsak].

Maysa kadagiti pannakaulo ti Israel iti dasig ti amma, a ti sumagmamano a gasut kadagiti kaputotan dayta ket nakipagsubli ken Zorobabel manipud pannakaidestiero idiay Babilonia. (Esd 2:15; Ne 7:20) Idi agangay, 51 pay manipud iti kapuonanna ti nakipagsubli ken Esdras idi 468 K.K.P. (Esd 8:6) Ti maysa a prinsipe a pannakabagi ti sangakabbalayan ni Adin iti dasig ti amana ket karaman kadagidiay nangpatalged iti “mapagpiaran nga urnos” a naibalabala idi kaaldawan ni Nehemias.​—Ne 9:38; 10:1, 16.