ADRIA

Natukoy iti Aramid 27:27 ti “baybay ti Adria.” Ditoy a binusbos ni Pablo ti 14 nga al-aldaw iti nadawel a baybay sakbay a ti barko a naglugananna narba iti isla ti Malta. Kuna ni Strabo a naadaw daytoy a nagan iti siudad ti Atria, a masarakan iti wangawangan ti Karayan Po iti maaw-awagan ita iti Gulpo ti Venice. (Geography, 5, I, 8) Ti agdama a siudad ti Adria idiay Italia ket ad-adayo bassit iti igid ti baybay. Agparang nga idi agangay, ti nagan nga Adria nagaplikar iti dandanum iti dayta a lugar ket in-inut a limmawa ti saklawna a mangiraman iti intero nga agdama a Baybay Adriatiko, Baybay Ioniano, ken dagidiay dandanum ti Mediteraneo iti daya ti Sicilia (ken Malta) ken iti laud ti Creta. Ngarud ti nagan sinaklawna ti dandanum a maibilbilang ita nga adda iti ruar ti Baybay Adriatiko; ngem idi kaaldawan ni Pablo, mayanatup a kunaen a ti isla ti Malta ket adda iti beddeng ti “baybay ti Adria.”