ADRIEL

Ti anak ni Barzillai, manipud siudad ti Abel-mehola.

Ni Merab nga inauna nga anak a babai ni Saul ket naited ken Adriel kas asawa, nupay immuna a naikari ken David. (1Sm 18:17-19) Idi agangay, ti amin a lima nga annak ni Adriel ket nayawat iti pannakapapatay tapno agpaay a pangabbong iti ginandat ni Saul a panangtalipupos kadagiti Gabaonita. (2Sm 21:8, 9) Iti daytoy a salaysay, ni Mical ti nadakamat nga ina ti lima nga annak ni Adriel, imbes a ni Merab. Yantangay natay ni Mical nga awanan anak (2Sm 6:23) ken saan a pulos nadakamat a nagbalin nga asawa ni Adriel, ibilang ti dadduma a managipatarus a ti panagparang ti nagan ni Mical ket biddut ti eskriba. Nupay kasta, gistay amin a Hebreo a manuskrito usarenda ti nagan ni Mical, ket sigun iti nabayagen a patpatien a pannakailawlawag, ni Merab (in-inauna a kabsat ni Mical) nasapa a natay kalpasan ti panangipasngayna iti lima nga annak ken Adriel, ket ni Mical ti nangpadakkel iti lima nga annak ti kabsatna kalpasanna, iti kasta naikuna nga annakna ida. Iti patarus ni Isaac Leeser, mabasa iti 2 Samuel 21:8: “Ken ti lima nga annak ni Mical nga anak a babai ni Saul, a pinadakkelna maipaay ken Adriel.”